भांगरभूंय | प्रतिनिधी
वास्को, प्रतिनिधी : वास्को पुलिसांनी बुधवार १३ सप्टेंबराक अटक केल्ले उमा पाटील हे बायले आड आयज आनीक एक कागाळ नोंद जाली. उमा हिणें नौदळांत प्यूनाची नोकरी दिवपाचें आस्वासन दिवन १ लाख ७० हजार रुपया घेतिल्ल्याची कागाळ बायणाचे केंचाव्वा रघुनाथ मदार (३२) हांणी बिरेस्तारा वास्को पुलीस स्टेशनांत केली. उमा आनी तिचो पूत शिवम हांकां न्यायालयांत उबीं केलीं तेन्ना तांकां दोन दीस पुलीस बंदखणींत दवरपाचो आदेश न्यायाधीशांनी दिला.
मेवणो यमनुर दुर्गाप्पा हरिजन हाका नौदळांत प्युनाची नोकरी दिवपाचें आस्वासन दिवन बायणाच्या झुआरी कॉम्प्लेक्सांत रावपी उमा पाटील हिणें एक लाख ७० हजार रुपया घेतिल्ल्याचे बायणाच्या उस्मान सोडा फॅक्टरी लागसारा रावपी केंचाव्वा मदार हांणी कागाळींत म्हणलां. पयशे घेतले उपरांत नोकरी दिवंक ना. ताका लागून केंचव्वा हांणी पयशे मागले, तेन्ना उमान ते दिवपाक न्हयकार दिलो.
उमाक आनीक कोणा कडल्यान नोकरे खातीर पयशे घेतल्यात हाचो तपास वास्को पुलीस करतात. सरकारी नोकरी दिवपाचें हांयस दाखोवन पयशे घेवप्यां मदल्या चार जाणांक आतां मेरेन वास्को पुलिसांनी अटक केल्ली. तांतल्या दोगांची जामिनाचेर सुटका जाल्या. तपासा उपरांत आनीक कितले जाण पुलिसांचे तावडेंत सांपडटात हें बेगीनूच स्पश्ट जातलें.
जांणी नोकरे खातीर पयशे दिल्ले ते आतां ल्हव ल्हव कागाळ करपा खातीर मुखार सरतात. ताका लागून जांणी सरकारी नोकरी दिवपाचें हांयस दाखोवन पयशे घेतिल्ले ते भियेल्यात. जांणी नोकरे खातीर पयशे घेवन फटवणूक केल्या ते पयशे परत करतले अशें मुख्यमंत्री डॉ. प्रमोद सावंत हांणी स्पश्ट केल्ल्यान धीर आयिल्ले कांय जाण पुलीस कागाळ करपाचे तयारेंत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
