उमाशेक उदेल्लो गंडभैरांव

भांगरभूंय | प्रतिनिधी

मीटिंग सोंपतगेर घरा वच्चे पयलीं रातचे एकठांय मेळून मेणवातीच्या उजवाडांत पार्टी करया असो उलो तीमण्णान मारलो. (आतां मुखार….)
था रिल्ले प्रमाणे आमी क्लब हावसात रातच्या आठ वरांचेर एकठांय जावपाची तयारी करताले. सकाळीं आमच्या पांच जाणांच्या पंगडान औपचारिकपणान सोसायटीचीं सुत्रां हातात घेतिल्लीं. तीमण्णा, भटाल्या पसऱ्यार वचून माराण आनीक बाण घेवन आयिल्लो. सालू वाॅचमेन जनेलांच्या धडेर एक पांचवी, एक धवी अशो मेणवाती दसोवन आपुणूय ख़ुशी परगटावक सोदतालो. उमाशेची रात आशिल्ल्यान मिणमिणत्या बल्बा उजवाडाक तशें कमीच झळकतालें. मळबांतूय काळी कुट्ट कुंपा एकठांय जावपाक लागिल्ली. घडयेक तीं रातचो गडगडटान पावस येतलो अशे सांगूक सोदतालीं. रातकिड्याचो आवाज किर्र्रर्र्र किर्र्रर्र्र किर्र्रर्र्रर्र्र कानाक भेदतालो. चारूय वाटेन काजूले उजवाड दित उडटात तें दिश्टी पडूंक लागिल्ले. आठाच्या ठोक्यार आमी पांच- स लोक एकठांय जाल्ले. हांवे सांजवेळा हुर्राकाची वेवस्था गार्राव कोनशाक हाडून दवरून केल्ली. दंडबिंडा लिंबू मिरसांग मीठ आनीक झेल घेऊन हजर झालो. पुरतोषम लिमका आनीक सोडा घेऊन आयलो. ग्लास भल्ले. हुर्राक, लिमका आनीक सोडा मिक्स करून ग्लासाच्या पोतांक मीठ सारोवन उबी चिरिल्ली मिरची सोडून आमी चियर्स केले. ग्लास आपटून थोडे हुर्राक जमनीर पडलें आनी सालून फोगोत्या माराणाचो गडगडाट केलो. आमी जल्लोश करताले, इतल्यांत …
… तीमण्णाक बाण लावपाची उमेद आयली. ताणें पेटयिल्लो बाण वाकडो जाऊन सूर्रर्रर्र करीत गंडभैरावाल्या घरामुखा वेल्या आंगणात वचून फुटलो आनी थंय कुशीन आशिल्ल्या एका सुण्यान भोकपाक सुरवात केली..इतले म्हणसर दुसरें सुणें भुंकलें …तिसरें …चवथें.. पांचवें ….भू …भू …भू…भो …भो… भोअ …. भोअ… आनीक तातूंत गंडभैरावाले घरचे सुणेय सामील झाले. थोड्याच खिणा भितर फोर्सान वारें येत लायटी गेल्यो आनी वाऱ्यान मेणवाती वाडवल्यो. उमाशेची रात… किट्ट काळोख आनीकच किट्ट जाल्लो. जोगला मारतालीं आनी सुण्यांनी अच्छेव मांडिल्लो. उमाशेच्या भयाण राती आमी मात कोनशाचो आडोसो घेत हुर्राकाची मजा लुटताले. इतल्यान कान फुटपा येदो आवाज करीत गडगडाट झालो आनी सुण्याच्या घोळक्या भितरल्यान शेपडेक उजो पेटिल्ले बशेन गंडभैरांव प्रगट झालो. एका हातात सत्री.. आनीक सत्रेक भेदून वचपी पावसाचे उदक, सत्रेचे मुठीक लटकायिल्लो लापयांवा बशेन दिसपी बॅटरीदिवो, तकले वेल्यान मानेर सुटिल्लें केंस आनीक मुखा वेल्यान खाडाचे वाडिल्ले केंस, ताचेर पडपी पावस आनीक तांतूंतल्यान व्हांवपी उदक, कपलार लायिल्ली पिंजर व्हांवून तांबडेच जाल्ले तोंण, आनी दुसऱ्या हातांत लांब दांडो घाल्ले पिकांदर घुंवडायत ताचो हो भयानक अवतार पळयतगेर आमगेली हुर्राकाची नशा झटक्याक देंवली… साक्षात परब्रह्म पाड्डेच्या पर्वता वेलो भूतनाथ ताचे भीतर झळकतालो… दोळ्यांची पापणी धांपून उगडता म्हणसर जोगलांच्या उजवाडांत वेगवेगळे अवतार आमका गंडभैरावा भीतर दिसूंक लागिल्ले… केन्हा सांग्यावेलो वीरभद्र तर केन्ना सांखळेचो तर केन्ना पुरुषम्हारु तर केन्हा पाड्डेचो कातरर्शी म्हारु … दंडबिंडा त्या खिणाक जय बोडगेश्वर फुतफुतलो.
आमी बिलू जाऊन एकमेकाक घश्टत लागीं आयिल्ले. इतल्यान गंडभैरावांन मोठ्यान सालूक उलो मारलो. सालू काचाबूल जाल्लो. गंडभैरावांन सालू कडे कितें चवकशी केली ती समजलीना, पूण ताणें “हे सोसायटी कशे चलयतात तें हांव पळयतलो ” म्हणत तकली हालयत केंसांनी उदक शिंपडायत दुसरे वाटेन पासार जालो. काळोख आशिल्ल्यान गंडभैरांवाल्या तोंडावयले रंग, भाव पळोवपाक आमकां कोणाक जमलेंना. आमगेल्या सगल्यांल्या ग्लासांत हुर्राका भितर घाल्ली पाचवी ताल्ल मिरसांग तकली वैर काडत उबी- उबी हुबताली. घडयेक ती सांगूक सोदताली की फुडलो रस्तो कितलो तिखट आसतलो !
गंडभैरावाक आपुण नासतना आपल्यालो सल्लो घेनासतना समिती जाता हाची नसाय जाल्ली. तो फुगार जातालो आनी डुक धरून बशिल्लो. केन्ना संद मेळटली आनी आपुण हल्लो करतलो हाची वाट पळोवपाची ताणें थारायलें. वेण्णाक चैन पडनाशिल्ली, सुख नाशिल्लें, कीड वळवळटाली, तो दुर्गानंद आनी दुसरी एक वांगडी सुकांतीक कुशीक घेऊन मीटिंग करूंक लागलो. तीमण्णान ताका मेळून समिती विरघळावपाची बी तयारी दाखयली. हांवे वचून दुर्गानंदाक मेळून हांव भायर सरतां, तू यो म्हणपाची ऑफर दिली. निमाणे जबाबदारी घेवक कोणाची तयारी नाशिल्ल्यान आमकांच मुखार वच्चें पडलें.
आमी समितीचेर नवे, आमका कांय पूर्वानुभव ना म्हणुन फुडलें पावलं उखलचे पयलीं आमी एका आदोगादा कडल्यान कायदेवीशी सल्लो घेतलो. आमच्या सगळ्याच्या इस्क्रितूरांत एक कलम आशिल्लें आनी त्या कलमांत डेव्हलपरान जो कितें कॉमन जागो आसा, तो सोसायटीच्या नावार ट्रान्सफर करतलो अशें बरयिल्लें. आदोगादान आमका सांगलें की हें कलम एक विलक्षण आनी वेगळें आसा आनी ताणें असलीं कलमां पळयलीनांत. घडयेक बिल्डराचे तकलेंत कितेंय वेगळे आसूंये म्हूणन ताणें बरयलां आसत. घडये हो इस्क्रितूरांचो मसुदो बरोवप्यान चूक केल्या आसूंये वा दुसऱ्यालो मसुदो कॉपी पेस्ट करून हें कलम हटोवपाक विसरला आसुये. आमी आमगेल्या आदवोगादाक ताका जशें दिसता तशें ताचें मत बरोवन दिवूंक सांगलें. ताणें दिल्लो लीगल रिपोर्ट आमी वांगड्यां मदीं जनरल बॉडी सभेची मिनिट्सच्या वांगडा धाडलो.
संदीची वाट पळयत राविल्या गंडभैरांवान ई- मेल घालून आमगेली सगळीं कुंतां काडलीं. बारीक सारीक चुको काडून आमकां आपुण हुशार आनी शाणो आनी आमी कशी अवचिन्ना वा नालायक अशें दाखयत ताणें आपलें ज्ञान सगळ्या वांगड्यांक वाटलें. वर्माक लागपी उतरां वापरलीं. कॉमन जागो सोसायटीच्या नावार करप शक्य ना आनी आमीच ते तशे आदोगादाक बरोवपाक सांगलां असोय टोमणो ताणें मारलो. सोसायटी रजिस्टर करून वर्स मायज जालें, पयलीं जनरल बॉडी मीटिंग रजिस्टर जावन तीन म्हयन्यां भितर जावपाक जाय, आमगेली मिटिंग सवाय वर्सांन जाता ताका रजिस्ट्रार ऑफिसान मान्यताय दिल्या काय ना, दिल्या जाल्यार ती खंय आसा अशेंय विचारलें. सगळ्या वांगड्यांक आमी बाय लाॅचे लिंक धाडचें, हार्ड कॉपी सोसायटी ऑफिसात उपलब्ध करून दिवची अशेंय बरयलें. तागेल्या बरोवपांत एक तिरस्काय आशिल्ली. आमगेली समिती जणू काय तागेली नोकर अशा कोत्या वृत्तीचें ताणें प्रदर्शन ह्या मेलांतल्यान मांडलें. एकवटेन बिल्डर आमकां सांगतालो की ताका मेंटेनन्साच्या जबाबदारींतल्यान भायर सरपाक जाय आनी दुसऱ्या वटेन गंडभैरांव सध्या बिल्डरा कडे चालू आसा तो मेंटेनन्स कॉन्ट्रॅक्ट सोंपतगेर परत ताचेच कडेन दिवपाक ताका मनयात अशेंय बरयले. शेक्सपीयराची इंग्लिश भास ताणें आपणें बरयिल्ल्या इ-मेलांत वापरिल्ली. त्या शब्दांचे अर्थ समजूपाक म्हाका डिक्शनरीचो आसरो घेवचो पडलो. ह्यो गोश्टी ताच्यान मीटिंगेच्या पयलीं वा मागीर आमकां कोणाकूय मेळून वैयक्तिकरित्या उलोवपाक जातालें आनी तशें केल्यार एक सकारात्मक पावल म्हणून सगळ्यांनी मेळून सुटावो करुक जातलें आशिल्लें, पूण तशें केल्यार तो गंडभैरांव कसलो? गंडभैरांव मारुकूय व्हेल्यार रडटालो आनीक पोसूंकूय व्हेल्यार रडटालो! तागेली वृत्तीच तसली म्हणून आमी मुखार पावल घालचें थारायलें. … (फुडें चलता…)

अजय करमली
93737 46957