भांगरभूंय | प्रतिनिधी
संवसारीक वन डे क्रिकेट सर्तींत आयज येजमान भारत आनी पाकिस्तान ह्या पंगडां मदीं हांगाच्या नरेंद्र मोदी स्टेडियमाचेर मॅच जातली.
दोनूय पंगडांनी सर्तींत दरेकी दोन मॅची जिखल्यात.भारतान आपले पयले मॅचींत ऑस्ट्रेलिया पंगडाक 6 विकेटींनी हारयिल्लो, जाल्यार दुसरे मॅचींत अफगाणिस्ताना आड 8 विकेटींनी जैत जोडिल्लें. रोहित शर्मान दुसरे मॅचींत शेंकड्याची खेळी केल्ली. ताणें 84 बॉलांनी 16 चवके आनी पांच सक्यांचे मजतीन 131 धांवड्यो केल्ल्यो.
दुसरे वटेन पाकिस्तानान आपले पयले मॅचींत दुबळ्या नॅदरलॅण्डाक हारयिल्लो जाल्यार दुसरे मॅचींत श्रीलंके आड जैत जोडिल्लें. दोनूय पंगड फॉर्मांत आसात, ताका लागून आयची मॅच उमळशीक वाडोवपी थारुये.
भारत आनी पाकिस्तान संवसारीक वन डे क्रिकेट सर्तींत एकामेका आड सात खेपे खेळ्ळ्यात आनी सातूय खेपे भारतान जैत जोडलां. सगल्यांत उमळशीक वाडोवपी मॅच 2011तली सेमी फायनल आशिल्ली. त्या वेळार भारतान 29 धांवड्यांनी जैत जोडिल्लें. 2019त भारतान 89 अशा व्हडा फरकान जैत जोडिल्लें. मजगतीं, 1992त पयले खेपे हे पंगड एकामेका आड खेळिल्ले.
दोनूय पंगडांचेर नदर मारली जाल्यार कागदाचेर भारताचेंच दालें जड दिसता. भारता कडेन साबार स्टार बॅट्समन आसात. पूण, तांकां फास्ट बॉलर शाहिन शाह आफ्रिदी पसून सादूर रावपाची गरज आसा, खासा करून पयल्या स्पेलांत. तशेंच बॅटिंगेंत मुखेली बाबर आजम आनी मोहम्मद रिझवान हांकां बेगीन बाद करपाची गरज आसा.
बाबज आजमाक पयल्या दोन मॅचींनी म्हणपा सारकें बरें प्रदर्शन करपाक जमूंक ना. पूण, ताका उणो लेखपाची चूक भारताक म्हारग पडुये. बाबर लयेंत आयलो जाल्यार तो स्वताच मॅच जिखून दिवपाक शकता.
रिझवान फॉर्मांत आसा. श्रीलंके आड ताणें नाबाद 131 धांवड्यांची खेळी केल्ली. ताच्या कडल्यान सादूर रावपाची गरज आसा. दरेक बॉलाचेर धांवडी करपाक तो प्रसिद्द आसा. ताका शांत दवरप भारताच्या बॉलरांक कठीण थारुये. ताणें अंदूंचे सर्तींत दोन मॅचींनी खेळटना 199 धांवड्यो केल्यात.
भारता खातीर निमाण्या इकरांत कोणांक खेळप हो प्रस्न आसा. आयचे मॅची खातीर ऑफ स्पिनर आर आश्विनाक खेळोवचो काय मध्यमगतीचो बॉलर शार्दुल ठाकूराक हे विशीं पंगड वेवस्थापनां मदीं एकमत ना. दोगूय आठवे सुवाते खातीर योग्य आसात. खेळपट्टी बॅट्समनांक अनुकूल आसल्यार शार्दुल एक बरो पर्याय आसा पूण, बॉल थांबून येता जाल्यार आश्विन अदीक वेव्हारीक पर्याय आसा.
शुभमन गिल खेळुये
बॅट्समन शुभमन गिल आयचे मॅचींत खेळपा खातीर 99 टक्के तंदुरुस्त आसा अशें मुखेली रोहित शर्मान म्हणलें.
डेंग्यू जाल्ल्यान शुभमन गिलाक पयल्यो दोन मॅची चुकिल्ल्यो. ताचे गैरहाजेरेंत इशान किशनाक निमाण्या इकरांत सुवात दिल्ली. पूण, ताका व्हड खेळी करपाक जमली ना. ताका लागून शुभमन आयलो जाल्यार इशान किशानाक भायर बसचें पडुयें.
रोहित शर्मान स्वता विशीं उलयतना म्हणलें, आपले खातीर तयारी कशी जाली हें म्हत्वाचें आसा. सगल्याच मॅचीं खातीर आपूण बरी तयारी करता. दरेक दीस नवीन आसता आनी नवीन आव्हानां घेवन येता. ताका लागून तुमी फाटल्या दिसांनी कितें केलां हें म्हत्वाचें नासता. आव्हानांक तोंड दिवपाक तुमी तयार आसपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
