भांगरभूंय | प्रतिनिधी
पणजीः गोंयांत बेकायदो रितीन उबराच्यो टॅक्सी चलतात असो आरोप करून अधिवेशनाचे सुरवेकच बाणावलेचे आमदार वेंझी व्हिएगश हांणी सभाघरांत बोवाळ घालो. हे विशीं कागाळ नोंद करची अशे मुख्यमंत्री डॉ. प्रमोद सावंत हांणी सांगून चवकशी करपाचें आस्वासन दिलें.
विधानसभेचे सुरवेकच वेंझी व्हिएगश हांणी हो मुद्दो मांडून सांगलें की बिरेस्तारा रातीं बाणावलेच्या एका थळाव्या टॅक्सी ड्रायव्हरान उबर बूक केली आनी उबर टॅक्सी मोपा तशेंच दाबोळी विमानतळार उपलब्ध आसा अशें अॅपाचेर आयलें.
उपरांत थळाव्यांनी उबर ड्रायव्हराक कोलवें पुलीस स्टेशनार हाडलो आनी उबर ड्रायव्हरान पुलीस स्टेशनार ही घडणुक कबूल केली. हांव जेन्ना उबर ड्रायव्हरा कडेन उलयलों तेन्ना ताणें सांगलें, ताणें प्ले स्टोराचेर वचून उबर अॅप डावनलोड करून आपली टॅक्सी ह्या अॅपाचेर नोंद केल्या. ह्या अॅपाचो बेकायदो रितीन वापर जाता, असो आरोप व्हिएगश हांणी केलो.
गोंयांत उबराक थारो दिवचे नात अशें विधानसभेंत मुख्यमंत्र्यांनी म्हणिल्लें. पूण तांची कापाझदाद पळयत जाल्यार ते कोणाकूच भियेनात. मुख्यमंत्र्यांनी उबराक एक ईमेल धाडून हे धंदे बंद करपाक सांगूंक जाय अशी मागणी व्हिएगश हांणी केली.
आमी उबराक गोंयांत परवानगी दिवंक ना. जर अश्यो गजाली जाल्या आसत जाल्यार तांणी कागाळ नोंद करची. ताची हाव चवकशी करपाक सांगता अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
