भांगरभूंय | प्रतिनिधी
मडगाव : ओला- उबर टॅक्सी ऍग्रीगेटर्सांक गोंयांत सेवा दिवपाक बंदी आसा. मात, ऑनलायन अॅप डावनलोड करीत वेवसाय सुरू आशिल्ल्याचें निदर्शनाक आयलां. उबरच्या अॅपावेल्यान भाडें घेवपाक आयिल्ल्या टॅक्सीकाराक धरून बाणावलेच्या थळाव्या टॅक्सीचालकांनी कारवाये खातीर कोलवा पुलिसां कडेन दिलो, असले प्रकार सोंसून घेवचे नात अशें थळाव्या टॅक्सीकारांनी सांगलें.
बिरेस्तारा रातीं उसरां उबरच्या टॅक्सीकाराक धरून कोलवें पुलिसांच्या ताब्यांत दिलो. तो वास्कोचो. ताणें मोबायलांतल्या प्ले स्टोअरा वेल्यान उबरचें अॅप डावनलोड केल्लें. ह्या अॅपा वरवीं तो मोपा आनी दाबोळी विमानतळा वेल्यान बाणावले भाडें घेतालो. मोपाचें भाडें घेवन तो बाणावले आयलो तेन्ना थळाव्या टॅक्सीकारांनी ताका विचारलें तेन्ना हो प्रकार उक्तडार आयलो. उपरांत थळाव्यांनी ताका कोलवें पुलिसांच्या ताब्यांत दिलो. ह्या वेळार आमदार व्हेंझी व्हिएगस आनी समाजीक कार्यकर्ते वॉरन आलेमांव हांचे सयत टॅक्सीकारांनी पुलीस स्टेशनाचेर गर्दी केल्ली.
मुख्यमंत्र्यां वतीन राज्यांत ओला आनी उबरची सेवा आजूनय सुरु जावंक ना. ताका बंदी आशिल्ल्याचें विधानसभेंत सांगिल्लें आसतनाय बेकायदेशीर वेवसाय चलता. थळाव्यांचो वेवसाय वाटावपा खातीर यत्न करतले, अशें आमदार व्हेंझी हांणी सांगलें.
वॉरन आलेमांव हांणी सांगलें, हो टॅक्सीकार बेकायदेशीरपणान अॅपा वरवीं उबरची सेवा दितना सांपडलो. ताची गाडी जप्त करची आनी खर कारवाय करची. अशे तरेचे बेकायदेशीर अॅपा सरकारन बंद करचे, अशीय मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
