भांगरभूंय | प्रतिनिधी
मनशाचें मन हें संवसारांतली एक बळिश्ट आनी अद्भुत गजाल. निर्णय घेवपी मन संवसार बदलूंक शकता. पूण जेन्ना हेंच मन उद्देशहीन, निरुपयोगी आनी रितें उरता तेन्ना हेंच मन मनशाक अवनतीच्या मार्गाचेर व्हरता. देखूनच इंग्लिशित “Idle Mind is devils workshop’’ ही पोरणी म्हण आसा. हाचो अर्थ मनाक कसलेंच सकारात्मक, रचनात्मक काम दिलें ना जाल्यार तें नकारात्मक विचार, वायट संवंय, आत्मनाश करपी वृत्ती हांचो कारखानो जाता. जेन्ना आमचें मन विचारा विणें रिकामें आळशी निश्क्रीय आसता तेन्ना वायट विचार आमच्या मनांत बेगीन भितर सरतात आनि मनांत सैतान आपली कार्यशाळा चालू करता जेन्ना मनशाले मनाचेर निश्क्रीयतायेचो शेक वाडटा तेन्ना ताच्या मनांत सगल्या तरांच्यो वायट कल्पना हुंवार आयिल्या भशेन येतात आनी तिच सैतानाली वायट कर्तुबां करपाक आदर्श सुवात थारता.
आयच्या व्यस्त जिणेंत जायत्या जाणांक कामाक लागून ताण येता, पूण उरफाटें कांय जाण आसतात, जांकां वेळ आसता पूण ध्येय नासता. दीस रावतात अशा रिकाम्या मनांत काल्पनीक हुस्को राग, दुस्वास आळस आनी निरशेलेंपणाचो घंयरांव आसता. आयचे तरणाटे देशाचे फुडार. पूण सध्याच्या काळांत बेकारी, चुकीचें शिक्षण, मोबायलाचो चड वापर हाका लागून तांचें मन उद्दिश्टपणान भोंवता. सोशल मिडियाचेर वेळ घालप, आभासी संवसारांत स्वताक गमावप, व्यसनांत पडप हीं सगळीं त्या रिकाम्या मनाचीं लक्षणां. वेळ आनी मानसीक उर्जेचो सारको वापर जालो ना जाल्यार हेच तरणाटे समाजाक वजें जातात.
निश्क्रीय मन फकत वेळ फुकट घालयना, ताचो मानसीक भलायकेचेरूय गंभीर परिणाम जाता. सतत नकारात्मक विचार, फुडाराचो भंय, आत्मसंशय, उदासीनतायेच्यो भावना हीं सगळीं निश्क्रीय मनाचीं लक्षणां. चड करून मानसीक दुयेंसां हे निश्क्रीयतायेंतल्यान निर्माण जातात.
देखून मन सदांच सक्रिय आनी सकारात्मक दवरप मानसीक भलायके खातीर गरजेचें.
ध्येय थारावचें
जिणेंत व्हड वा ल्हान ध्येय थारावप मनाक दिका दिता. ध्येय आसता तेन्ना मन ते दिकेन वावुरता. व्यस्त रावचें पूण योग्य कारणांक लागून.
तुमचो वेळ पिड्ड्यार करपाक न्हय तर स्वताक बांदपाक वापरचो. छंद पाळप, नवी कुशळटाय शिकप, समाजीक कार्यावळींनी वांटो घेवप.
वाचन हें मनाचें सगळ्यांत बरें अन्न. बऱ्या विचारांचो सेवन केल्यार मन घट जाता. योग आनी ध्यान: ध्यानावरवीं मनाचेर नियंत्रण दवरूं येता. योगाक लागून शारिरीक आनी मानसीक समतोल मेळटा. समाजीक उपेगी काम केल्यार तुमचें स्वताचें अस्तित्व समजून घेवपाक आदार जाता आनी तुमकां समाधान मेळटा.
मनीस हो विचार करपी प्राणी आनी ताचो फुडार ताच्या विचारांतल्यान थारता. देखूनच आमचें मन कामांत व्यस्त आनी सकारात्मकतायेन भरिल्लें दवरप- ही काळाची गरज आनि निश्क्रीय रावप -ही आयच्या काळांतली जापसालदारकी- टाळपा भशेन व्हडली चूक.तर, आमी सगळ्यांनी आमचें मन सकारात्मकताये खातीर वापरूया. कारण मनाचो उपेग केल्यार तें देवाचें देवूळ जाता आनी तें रितें उरल्यार तें सैतानाची कार्यशाळा जाता.
सुदिन वि. कुर्डीकार
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
