उपेक्षीत बस स्टॉप

भांगरभूंय | प्रतिनिधी

हांगा बसपी सुरांट्यांक मात्शे हालयले आनी बस स्टॉप घट केलो जाल्यार स्कूल बशींक रावपी भुरग्यांक आनी तांच्या पालकांक हाचो बरो उपेग जातलो हातूंत दुबाव ना.

दर दिसा दनपारची त्या इंदोनच्या बस स्टॉपा लागीं म्हजीं पावलां वळटात. कांय वेळ वाट पळेत रावपाचें आनी स्कूल बस आयली म्हणजे नातवाच्यो स्कुलाच्यो खबरी आयकत घरा परतुपाचें. फाटलें वर्स देड वर्स हेंच चल्लां. थोडोच वेळ थंय उबो आसतां पूण त्या बस स्टॉपाक पळेतकूच कल्ल जाता. सामको उपेक्षीत रितीन हो बस स्टॉप हांगा उबो आसा. तशें पळोवंक गेल्यार ह्या वाठारांत बशींची येरादारी ना. आतां रस्त्यान जेन्ना बशीच वचनात तेन्ना पेसेंजर तरी कित्याक रावतले? कोणाची म्हणून वाट पळेतले ते? मागीर कित्याक म्हणून बांदिल्लो काय हो बस स्टॉप? तशे एका काळार खूब कडेन असले सिमेंट काँक्रीटचे बस स्टॉप नदरेक येताले. लोकांक ताचो उपयोगूय जातालो. पूण त्या सगल्या रस्त्यां वेल्यान बशी धांवताल्यो. बसीची वाट पळोवपी पेसेंजरांक पावस वा वोत हाचे पासून सुटका मेळटाली. सद्याक हांतले खूबशे बस स्टॉप मोडून त्या जाग्यार स्टील पायपांचे बस स्टॉप उबारिल्ले दिसतात. कांय बस स्टॉप रस्तो रूंद करतना काडले.
पूण हो बस स्टॉप अजुनूय उबो आसा. सामको उपेक्षीत अवस्थेंत आसा म्हणल्यार जाता. हो बस स्टॉप बांदिल्ल्याक कोणेच ताचेर नदर मारिल्ली दिसना. ताची कोणे काळजीय घेतिल्ली दिसना वा केन्ना ताचेर पॅण्टाचो ब्रशूय ओडिल्लो दिसना. आसा तो तसोच. अजून मोडून पडूंक ना म्हणून उबो आसा. दोन खांबे, ताचेर आडवें बीम आनी वयर काँक्रीट पाखें. खांब्याक सद्या वेरो गेल्ल्यो दिसतात आनी काँक्रीटाचे कुडके पडत आसात. आनी बिमाचे वारांव उगते जाल्यात. तांकां कळम आयल्या म्हणपाचें पळेल्यार कळटा. आतां स्कुलांच्यो बशी जाल्यात. आनी त्या बशींतल्यान भुरग्यांक तांच्या घरा लागीं आशिल्ल्या थांब्यार हाडून सोडटात. ह्याय थांब्यार जायत्यो स्कूल बशी थांबतात आनी आपापल्या भुरग्यांक हाडूंक जायते पालक बस येवपाच्या वेळार हांगा उबे रावतात. पूण ह्या बस स्टॉपार रावपाचें धाडस कोण करिनात.
धाडस करिनात हाका कारणां दोन. पयलें, वयल्यान काँक्रीटाचो कुडको केन्ना पडत सांगूक जायना. उबो राविल्ले कडेन तकलेर पडलो जाल्यार? आनी दुसरें कारण ह्या बस स्टॉपाचो उपयोग सद्याक कांय सुरांटे करतना दिसतात. दिसरात कांय जाण हांगा बसून पेय घेतना दिसतात. सामके तोर्राद जाल्ले आसता ते. म्हर्यांत क्वार्टर, उदकाची बाटली आनी हातांत प्लास्टीक ग्लास. केन्नाय हांगच्या शिमिटाच्या बांकड्यार शेकानशेक पातळिल्ले आसतात. केन्ना लोळून सकयल पडटात आनी तकलीय फोडून घेतात. पूण हांचे प्रताप काय उणे जायनात. तांचे म्हऱ्यांत उबो रावपाचें धाडस कोण करतलो? जरी ते कोणाचे वाटेक वचनात तरी कोण आपूण जावन तांचे म्हऱ्यांत बसतलो?
हे न्हिदतात खरे, पूण वयल्यान काँक्रीट पडल्यार कितें जावपाचें? तांकां शुद्ध नासली तरी आमी शुद्धीर आसतात न्ही! तांतलो कोणूय पडून रगत व्हांवता तेंच आमच्यांनी पळोवंक जायना. कल्ल जावपाचें कारण हेंच. पूण दर दिसा वचचेंच पडटा आनी हें सगलें पळोवचेंच पडटा. नातवाचो प्रश्न, ते थंय बसून कितें पितात आनी ते थंयच कित्याक बसतात? हाका जाप दिता म्हणल्यार म्हजी तकली उसळटा. तो थंय कित्याक न्हिदला, ताका घर ना? हाचीय जाप म्हजे कडेन आसना. बाबडो बस स्टॉप कसो सोंसता काय हें सगलें? ताकाय प्रस्न पडटलेच न्ही? जे बशींतल्या भुरग्यांची वाट पळेत उबे रावतात ते बस स्टॉपा भायर कित्याक रावतात आनी हे सुंराटे हांगा कित्याक बसतात?
तशे हे लोक बेकार आसनात. कोणूच करिनात तीं कामां ते करतात. भरपूर जोडटात आनी सगलें सोऱ्याक घालतात. हांव तांचे कडेन केन्नाय मात्शे बरे आसतना संवाद सादूंक पळेतां. एकल्याक सहज विचारलें, ‘घराच बसून कित्याक पियेना रे, अशें वाटेर बरें दिसता? आनी जेवता मरे काय फक्त पियेता?’ ताची जाप, ‘सर आतांच एकल्याचो मेल्लो सुणो पुरून आयलां. सामकी घाण पडिल्ली. घाण घेवंक जाता? म्हणून हें घेवचें पडटा. हाच्या नेटार कसलेंय काम जाता.’ सुणो पुरूंक हजार रुपया मेळ्ळे म्हणपाचें ताचे कडसून कळ्ळें आनी ते घेवन घरा गेल्यार घरचीं पयशे काडून घेतलीं म्हणून तो हांगाच ते सोंपयता. आपणें घरा नुस्तें व्हरून दिलां आनी रेशनाचे फुकट मेळपी तांदूळ घरा आसात म्हणपाचें सांगूक तो विसरलो ना.
पयश्यां खातीर ते कसलींय कामां करतात. सकाळीं बाजारांत वचून ट्रकांतल्यान नुस्तें देंवयतात. बाजारांत नुस्तें उजरायतकूच थंयची घाण काडून कोणाच्या तरी भाटांत व्हरून पुरतात. कापिल्ल्या कोंबड्यांची घाण व्हरून पुरतात आनी तांतल्यान मेळपी जोड अशी व्हगडायतात. कारण हें घेतले बगर नाकांतली घाण कशीच वचना आनी जेवण लेगीत चलना अशें तांचें म्हणणें. पूण हाका लागून बाबडो बस स्टॉप मात उपेक्षीत उरता. त्या बस स्टॉपार उबो रावपाचें कोणूच धाडस करिनात. ह्या बस स्टॉपाक हाची खंत आसतलीच काय दिसता.
म्हाका केन्नाय दिसता सरकारान ह्या बस स्टॉपाचें जतन करूंक जाय. तो सारको करून घेवंक जाय. एका काळार बांदिल्ल्या आनी आतां दिसनाशिल्ल्या बस स्टॉपांचे स्मारक म्हणून हो बस स्टॉप दवरूंक जाय. खऱ्यांनीच एक सुंदर असो हो मॉडेल. कसलीच काळजी घेनासतना चाळिसां वयर वर्सां घट उबो आसा. अशीं बरीं कामांय एका वेळार जातालीं म्हणपाची गवाय हो बस स्टॉप दिता काय दिसता. ह्या उपेक्षीत बस स्टॉपाक पडूंक दिवचो न्हय आनी वांगडाच तो उपेक्षीत उरचो न्हय हाची काळजी घेवपाची गरज आसा. हांगा बसपी सुरांट्यांक मात्शे हालयले आनी बस स्टॉप घट केलो जाल्यार स्कूल बशींक रावपी भुरग्यांक आनी तांच्या पालकांक हाचो बरो उपेग जातलो हातूंत दुबाव ना.

अभयकुमार वेलींगकार
9423884687