भांगरभूंय | प्रतिनिधी
सध्याचें युग धांवपळीचें. ह्या काळांत च्या, काॅफी हीं पेयां सगल्यांच्याच आवडीचीं जाल्यांत. थोड्यांक एकवेळ दनपारचें जेवण पसून ना मेळ्ळ्यार उपकारता, पूण सकाळ, सांजवेळार च्या, काॅफी सामकी गरजेची जावन पडल्या. आमकां पयलीं दिसतालें, आमचें विचारवंत लोकूच ती पियेता. पूण आतांचे युवा पिळगेक च्या- काॅफीचें पिशेंच लागलां. मोगांत पडिल्ल्यांक चड करून काफयेचें!! मात च्या- काॅफी प्रमाणा भायर घेतल्यार एसिडीटी, पोटदुखी असल्यो समस्या सतावंक शकतात.
कांय लोकांक उपाशी पोटार म्हणल्यार आंथरुणार जाग येतकच तोंड धुंवचे पयलींच च्या वा काॅफी पियेवपाची लहर येता. सिनेमाचो प्रभाव तो. तातूंत गिरेस्त नायिका वा नायक जागो जातकच च्या पियेता. दोतोर म्हणटात, उपाशी पोटाचेर सगल्यांत पयलीं सोंसपाक जाता तितलें कडकडीत उदक पियेवचें. मागीर थोड्या वेळान च्या, काॅफी. पूण तांचें आयकता कोण? हून उदक दिसभर पसून घेतल्यार जिवाक बरें. तें पियेतकच कसलोच त्रास जायना. च्या, काॅफी सकाळीं नाश्तो करतना वा दनपारचें जेवण जाले उपरांत दोन वरांनी घेवप, खरेंच बरें. उपाशी पोटार हीं पेयां घेतल्यार भलायकी इबाडटा. एसिडीटी वाडटा, पूण कांय जाणांक ह्या पेयांचें व्यसनूच लागलां. तें पियेवंक ना जाल्यार ते अस्वस्थ जातात. हें उणें करप आमच्याच हातांत आसा. ल्हवू ल्हवू ती इल्ली, इल्ली करून उणी करपाची. साकर नासतना च्या पियेत जाल्यार पयलीं सामके नाकापुरो जाता, पूण 15- 20 दिसांनी संवय जाता. मागीर च्यावेंत साकर ना, हें पसून कळना.
च्या- काॅफींत एसिड आसता. ताका लागून कांय जाणांच्या पोटांत दुखता. देखून ते दुदाचो च्या घेवपाक सामके भितात. ह्या पेयांक लागून खाल्लें जेवण पचना. मागीर ताचे सायड इफेक्ट जातात. च्या काॅफी पियेवची न्हय, अशें हांव म्हणिना, पूण सकाळीं उपाशी पोटार न्हय. पयलीं चपाती, रोटी, उपमा, भाकरी खावची आनी ताचे वांगडा च्या, काॅफी घेवची. कांय बादा जायना. उरफाटी भलायकी ठणठणींत उरता. दनपरां जेवतकच दोन वरांनी च्या घेवची. रातची न्हय. रातची च्या- काॅफी घेतल्यार झेम येवची ना. खुटी, फुटी (दूद नाशिल्ली) च्या पियेवपाची फॅशन आसा. गरीब लोक दुदाचेर खर्च करूंक जमना म्हूण एका तेंपार ती पियेताले. ही च्या जिवाक बरी. पूण थोडीच पिवपाची. च्यांत गंजनाचो पिठो वा पानां, आल्याचे बारीक कुडके, तुळशीचीं केंसरां, गोड घालूनय पियेतात. साकर घालचे परस हें सामकें बरें. पोटाच्यो कागाळी पयस वतात. पूण ताचे परस सकाळीं आनी रातचें न्हिदचें पयलीं एक ग्लास शुद्ध दूद पियेवप एकदम बरें.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
