भांगरभूंय | प्रतिनिधी
स्टुडियो फोडलो : कामरा म्हणटा, माफी मागचो ना
एकनाथ शिंदे म्हणटात, हें अभिव्यक्ती स्वातंत्र्य न्हय
मुंबय, खबरां संस्था : स्टॅण्डअप काॅमेडियन कुणाल कामरा हांणी एके कार्यावळींत उपमुख्यमंत्री एकनाथ शिंदेची धजा मारपी एक गीत सादर केलें. ताका लागून श्री. शिंदे हांचो अपमान जाल्ल्याचो दावो करीत शिंदे शिवसेना वावुरप्यांनी खार वाठारांतल्या युनिकॉन्टिनेंटल हॉटेलांतलो हॅबिटॅट स्टुडिओ फोडून उडयलो. तर मुंबय म्हापालिकेनूय हाॅटेल आनी स्टुडियोच्या अनधिकृत बांदकामाचेर कारवाय केली. मजगतीं, शिंदे हांणी ‘ह्या आरोपांक हांव कामान जाप दितलों. आरोप करपी लोकांक मतदारांनी घरा बसयल्यात आनी बरें काम करप्याक सत्ता दिल्या’ अशें म्हणलां. तर ‘हांव माफी मागचो ना. कारण उपमुख्यमंत्री अजित पवार हांणी म्हणिल्लें, तश्शें हांव पदांत म्हणलां’ अशें कुणाल कामरान सांगलें.
उद्धव बाळासाहेब ठाकरे शिवसेनेच्या फुडाऱ्यांनी पयशे दिवन कामराक हें पद बरोवपाक सांगलां, असो आरोप शिंदे शिवसेनेच्या वावुरप्यांनी केला.
हें अभिव्यक्ती स्वातंत्र्य न्हय
शिंदे हांणी म्हणलें : अभिव्यक्त स्वातंत्र्याचो हो गैरफायदो आनी चुकीचो अर्थ. हांव विडंबन समजूपाक शकतां. पूण कामरान केलां तो व्यभिचार, स्वैराचार, सुपारी घेवन उलोवप. हांवें त्या आरोपां कडेन आडनदर केली. पूण राजकी वावुरप्यांक भावना आसतात. ह्या मनशान सरन्यायाधीश, आदरणीय मोदी, लाडकी भयण अर्थमंत्री निर्मला सीतारमण हांचे विशीं कितें म्हणलां तें आयकात. पत्रकार अर्णब गोस्वामी वांगडाय तो झगडला. हें अभिव्यक्ती स्वातंत्र्य न्हय. सुपारी घेवन ताणें आरोप केल्यात. म्हूण हांव ओगी रावलों.
हांव काम करपी मनीस, हांव रिअॅक्ट जायना. शांत रावन काम करीत रावतां. हांव लोकांक न्याय दिवप योग्य मानतां. म्हूण आयज हें व्हड यश आमी पळयतात, अशेंय तांणी सांगलें.
संजय राऊताचे आरोप
सरकारी पक्षाच्या फुडाऱ्यांनी खासदार संजय राऊत आनी कामराचे फोटो प्रसार माध्यमांक दिल्यात. ताचेर प्रतिक्रिया दितना राऊत हांणी सांगलें : ‘हय हांव ताका वळखतां. कुणाल कामरा कितलींशीच वर्सां असले कार्यक्रम करता. ताणें मनमोहन सिंग हांचें सरकार आसतनाय हाचे परस खर टिका केल्या. पूण काँग्रेस वावुरप्यांनी स्टुडियो फोडूंक नात. आनी सत्ताधाऱ्यांक आयजूच कळ्ळें की स्टुडियोचें काम अनधिकृत तें? इतल्या वर्सांनी तुमचेर टिका जातकच तुमकां हाचो साक्षात्कार जालो. तुमी तरणाट्या कलाकाराची माची फोडली, स्टुडियो न्हय!’
हेंच तें पद
कुणाल कामरान गायिल्लें आनी ते आयकून शिवसेनेचे वावुरपी बेजार जाल्ले ते हेंच १०- १२ ओळींचें वादग्रस्त पद. एकनाथ शिंदे पयलीं रिक्षा चलयताले. शिवसेना फुटिल्ली तेन्ना ते आमदारां सयत गुवाहाटीक वचून राविल्ले.
ठाणे की रिक्षा, चेहरे पे दाढी, आँखो पे चष्मा… हाये…
एक झलक दिखलाए कभी, गुवाहाटी में छिप जाये…
मेरी नज़र से तुम देखो, गद्दार नज़र वो आए…
ठाणे की रिक्षा, चेहरे पे दाढी, आँखो पे चष्मा… हाये………..
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
