भांगरभूंय | प्रतिनिधी
एक अणभव – 17
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.
– लेखक
आमी ई- मेली घालून घालून तांकां तिडायले, पूण ह्या विशयाचेर गंडभैरांवा भशेन रजिस्ट्राराक वचून कागाळी करपाची, बॅकस्टेबींग करपाची मालकिरयादपणा केलीनात. (आतां मुखार….)
गंडभैरांवान पिडिल्ल्याचे आनी सोसायटी घडोवपाच्या नादात हांवें घेतिल्ले विविध अणभव हांव बरोवपाक व्यस्त आसतना म्हाका कार्तिक आनी गायत्रीलो अबू धाबी सावन फोन आयलो की तीं दोगांय दोन दिसांनी सुटयेर येतात आनी तातूंतले पयले दोन- तीन दीस तीं आमगेर रावतलीं. म्हगेले अबू धाबीचे इश्ट येतात हें आयकूनच म्हाका खूब खोशी जाली. बेगीन बेगीन फाटल्या आठवड्याची गंडभैरांव काणी हांवें बरोवन सोंपयली आनी तांच्या येवकार आनी वांगडा भोंवडी करपाचे तयारेक लागलो. पयलींच्यो सगळ्यो यादी, काडीत आमी नॉस्टॅल्जिक जाल्ले. संकुलांत आमी पासयो मारताले. परत येवच्या वाटेर कार्तिक आनी गायत्रीली नदर गंडभैरांवाचेर पडली. तो हातान सुण्याची सांखळी ओडीत पासयो मारतालो. कार्तिकान आमच्या संकुलांत आशिल्ली जगसुणी पळयतगेर सहज म्हाका सुण्याबद्दल प्रश्न विचारिल्लो. इतल्या बऱ्या संकुलात हीं सुणीं पळोवन तांकां आमी हांगां कशीं दवरल्यात हाचें ताका अजाप दिशिल्लें. दुसरे दीस कार्तिक सक्काळ फुडें उठलो आनी उमेदीन आमी उठचेपयलीं चलूंक गेल्लो तेन्ना हीं जगसुणी तागेल्या आंगार आयलीं. भिवन तो राखणदाराक विनोवन आमगेल्या घरा मेरेन घेवन आयिल्लो. येतनाच म्हजेर ताणें गाळयांचो शिंवर घालो म्हूण हांवे ताका वेंगेत घेवन कितें जाले रे म्हणून विचारले. सुणी भूकून कार्तिकाल्या आंगार आयिल्लीं आनी तो सगळोच काचाबुल जाल्लो. ताका थंडायत, गंजन तोडीत चावेचो तोप हांवे शेगडेचेर दवरलो. पांच मिन्टां भितर च्या तयार जाली. तो मेरेन कार्तिकान स्वताक सावरिल्लें. गायणो घेत हांवें च्या दोन चिकरांनी भरली आनी ताचे वांगडा पडवेर येवन बसलो.
ताका गंडभैरांवा विशीं सांगलें, गंडभैरांवरुपी सुप्रीम कोर्ट हांगां आसतना आमी ह्या सुण्याक कांय करूंक शकनात, पूण आमी नवी जगसुणी संकुलांत घेनात. गंडभैरांव ही सुणी पयलीं पसून हांगा आसात, तांका हात लायल्यार तुमका सुप्रीम कोर्ट दाखयतलों अशे म्हणत आपले बोट बाणीर घेऊन बसला. आपल्यालें सादतना आपल्या घराक आडामो घालून ह्या सुण्यांक खावड घालता, पयनी तो लोकाल्योय पडव्यो ह्या कामाक वापरतालो, शेजाऱ्याल्या आनी म्हगेल्याय घरा येवन तीं कशीं हागतात हेवूय हांवें ताका सांगलें.
कार्तिकाक ह्यो काणयो सांगतना आमच्यो पयलींच्यो अबुधाबीच्यो यादी जाग्यो जाल्यो. गायत्री आनी हांव एकाच ऑफिसात काम करतालीं. खुपश्या वीकेंडांनी पार्टेच्या निमतान मेळप जातालें आनी तातूंतल्यान कार्तिका वांगडाकुय म्हजी इश्टागत जाल्ली. ती कॉर्निशाक तोंड करून आशिल्ल्या बिल्डींगेत अठराव्या मजल्यार रावतालीं. चकाटां मारतां मारतां लिजेलाली खबर आयली. सात वरसा पयलींची खबर लिजेला, फिलिपिनो राष्ट्रीयत्वाची बायल मनीस, जेन्ना तांगेर करीनाचो बारा वर्सां फाटी जल्म जाल्लो तेन्नाच्यान तांगेर किऱयाद म्हूण रावपाक आशिल्ली. सांगता त्या रुचीचे ती जेवण करताली. नवीं रांदपां तीं फटाफट शिकतालीं. करीनाच्या फाटल्यान तांगेर करणाचो जन्म जाल्लो. लिजेला दोगांय भुरग्याची आवय सुवातेर काळजी घेतालीं , तांकां मोग दितालीं. तिची वृत्ती, वागणूक आणि शांत स्वभावा खातीर कार्तिक आनी गायत्रील्या घरांत आनंदी आनंद आशिल्लो. आंग्लोटान सुटसुटीत आशिल्लें लिजेला सदांच सदळ कपडे घालून वावुरतालें. करण वर्साचो जायत आयिल्लो ताका हांडीर मारून ते कॉर्निशार पासयो मारताले. दीस वताले, राती वताल्यो, सगळें कशें वेवस्थित चलिल्लें.
सात वर्सा पयलींची ह्याच म्हयन्यातली खबर. त्या दिसा शेनवार आशिल्लो. सकाळ फुडें कार्तिक आनी गायत्री सगळ्यांक घेवन सुपरमार्केटांत गेलीं आनी ट्रॉली भरून खरेदी केली. परत येवन गाडी पार्क करून सगळी वयर आयलीं. लिजेला सामानाच्यो सगळ्यो पोतयो उखलून वयर आयलें आनी सामान वेवस्थित जाग्यार घालें. मागीर तिणें गायत्रीक जिवाक बरें दिसना म्हणून सांगून आपले कुडींत वचून न्हिदलें. लिजेलाली वागणूक आईज गायत्रीक विचित्र दिसताली. लिजेला ना म्हणटगीर ते दीस गायत्री करण आनी करीनाक घेऊन कॉर्निश वचून आयलीं, घरा कडे येवन तांकां जेवयलीं आनी न्हिदयलीं. कार्तिक तीळसान्न जाली म्हणटगेर आपल्यालो इश्टकुटूराचो ग्लास घेऊन घोंट मारीत आनंद घेवपाक गुंतिल्लो. गायत्रीक मनांत खंय तरी पाल चुकचुकताली. ती लिजेलाले कुडी भायर गेली जाल्यार तिका मुज्गाचो आवाज आयकूंक येवंक लागलो. गायत्रीन दारार टकटक केलें, पूण भितरल्यान जाप आयलीना. गायत्रीलें प्रेसांव आनीक वाडले. जिवाक बरें ना जाल्यार मुज्ग इतले व्हडल्यान कित्याक अशें म्हणत फोर्सान परत धोडायतगेर लिजेलान एकदाचें दार उगडले आनी गायत्री घुंवळ येवन जवळ जवळ सकयल पडली. लिजेलान एका भुरग्याक जल्म दिल्लो. तुवाल्यांत गुटलायिल्ले भुरगें तिणें बाथ टबांत दवरिल्ले. ताका सारखे निवळूय करुंनाशिल्ले. गायत्रीन किंळच मारली. आवाजानं कार्तिक उठून थंय आयलो. कार्तिकान तीन पेग ग्लेन फिडिच मारून जाल्ले. एका झटक्यांत तागेली नशा देंविल्ली.
इतलें सगळें रामायण जालें, पूण हांकाच न्ही कोणाकूच भुरगें जायसर कांयच कळूंक नाशिल्ले. गायत्रीली आवय बी फाटले पंधरा दीस तांगेर रावुंक आयिल्ली, तीकाय बी कसलोच दुबाव आयलो नाशिल्लो. लिजेला सडसडीत तर आशिल्लें. ते परिस्थितिक कितें करप, पुलिसांक तर आपोवपाक जाय, कार्तिकान आपल्या अरबी मित्राक फोन लायलो. ताका घरा आपोवन घेतलो आनी मागीर पुलिसांक आपयले. चडशे पोलीस फक्त अरबीनूच उलयतात म्हणून ही जतनाय कार्तिकान घेतिल्ली.
इतले मजगतीं गायत्री सत्यताय जाणून घेवच्या यत्नांत आशिल्ली. लिजेलान तर तांकां शिर्विसेक रावताना सांगिल्ले की ताचो घोव मनिला आसा आनी तांगेलो एक चलोय थंय आसा. तीन म्हयन्यां पयलीं तर तें मनिलाय वचून आयिल्लें. खंयचे कडेन कोणाकूय कसलोच दुबाव येवुंनाशिल्लो. गायत्रीलो अवतार पळोवन लिजेलान तिगेलो एक मोगी अबूधाबी आसा म्हणपाची कबुली दिली. कार्तिक आनी गायत्री दोगांय ऑफिसाक वतगेर, तो खंय पासय मारून वतालो. पुरसांव केन्ना धरले कोणाक कांय समजलें नाशिल्ले. तो मेरेन लिजेलान स्वताचो बांयटेर स्वतःच केलो. कोमोडार बसून लिजेलान हे बांयटींच्यो वेणी मुजगाच्या तालार सहन केल्ल्यो स्वतःचे भुरगें स्वतःच्याच हातान ह्या संवसारांक हाडिल्ले. थोड्या तेंपान कार्तिक आनी गायत्रीक कळ्ळे की लीजेलालो हो दुसरो न्ही तर हाचे पयलीं पांच- स बांयटेर ताणें केल्यात. गायत्रीन जर पळयलेनाशिल्ले तर हें भुरगें खंय ती भायल्या भायर आपल्या मोगी मार्फत भयणीगेर पावोवपाचें आसलें.
इतले म्हणसर पुलीस थंय पॅरामेडिकल फोर्स घेऊन आयले. सगळो ताबो तांणी आपल्या कडेन घेतलो. खंयच्याय प्रकारची अस्वस्थकाय तांच्या तोंडार दिसनाशिल्ली. पॅरामेडिकल त्रांतार करताना हे वटेन पुलिसाली चवकशी, उलट तपासणी चालू आशिल्ली. लिजेलान टिशू पेपरांक बांधून दवरिल्ली भुरग्याली वार पुलिसांनी वेवस्थित ताब्यांत घेतली. तांकां मागीर खंय स म्हयने कादयेंत बंद दवरपाची ख्यास्तूय झाली. हे शिक्षेच्या कालावधींक भुरगें आनी बांयटीची वेवस्थित काळजी पुलिसांनी घेवन तांकां हद्द्पार केली. तांची सहीसलामत रवानगी मनिलात, तांच्या गांवात केली. कार्तिक म्हाका सांगतालो की अशे गंडभैरांव वचत थंय आसतात, विघ्नसंतोशी आनी उपद्रवी लोकांचो खंयच तुटाव ना. लिजेलान जशें तांची मानसीक संतुळा इबाडिल्ली तशीच गंडभैरांवान आमचीय इबाडिल्ली.
कार्तिकाली काणी सोंपिल्ली. सात वर्सा पयलीं गायत्रीन ही गोश्ट म्हाका ऑफिसात वयले वयर सांगतगेर जसो कांटो आंगार आयिल्लो तसोच कांटो, तशीच परिस्थिती आयज कार्तिकान सांगतगेर म्हगेली जाल्ली. मन अस्वस्थ जाल्लें. अशीच घडणूक जर हांगा खंयूय घडिल्ली तर? त्या बाबड्या भुरग्याचें कितें जावपाचे? आमचे कडे अशीच काळजी घेवपाचे काय?
दुसरे दीस सकाळ फुडे म्हजो कर्मभोग म्हळ्यार कार्तिक आनी गायत्रीक ह्या सुण्यांनी म्हगेल्या पडवेर हागुन दवरिल्ले पळोंवपाकय मेळ्ळें. गायत्रीन म्हाका कपलार हात मारीत विचारलें की हें आमी कशें सोंसतात. हांव तांकां विमानतळार सोडपाक वता वता आमगेल्या सुप्रीम कोर्टा कडे फक्त बोट दाखयलें.
हे वटेन गंडभैरांवान बिल्डरां कडेन विनवण्यो करीत मेन्टेनन्स कंत्राट तीन म्हयने वाडोवन घेतिल्ले.
(फुडें चलता…)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
