भांगरभूंय | प्रतिनिधी
संवसारीक होमिओपॅथी दीस मनयलो
पणजीः सांखळेच्या साई नर्सिंग इन्स्टिट्यूटांत आयज संवसारीक होमिओपॅथी दीस मनयलो. सर्वांगीण आनी प्रतिबंधात्मक भलायकी सेवा मजबूत करपाक होमिओपॅथीच्या भूमिकेचेर उजवाड घालपा खातीर हे कार्यावळींत भलायकी सेवा मळावयले वेवसायिक, शिक्षण तज्ज्ञ आनी दोतोर हाजीर आशिल्लें. गोंय होमिओपॅथी मंडळान श्री कामाक्षी देवी होमिओपॅथिक मेडिकल कॉलेजच्या सहकार्यान आयोजीत केल्ले हे कार्यावळींत डॉ. सॅम्युअल हॅनेमन हांची 271 वी जयंती लेगीत मनयली.
‘शाश्वत भलायके खातीर होमिओपॅथी’ हे संकल्पने खाला आयोजीत हे कार्यावळींत, एकात्मिक वैजकी प्रणालींचे वाडटे म्हत्व आनी सुलभ आनी शाश्वत भलायकी सेवेक प्रोत्साहन दिवपात होमिओपॅथीच्या भूमिकेचेर उजवाड घालो. कार्यावळईंत भलायकी सेवेंतल्या योगदाना खातीर नामनेचे होमिओपॅथी दोतोर आनी वेवसायिकांचो सत्कारुय जालो. प्रतिबंधात्मक भलायकी तपासणी, डिजिटल सुविधा आनी गांवगिऱ्या वाठारांनी सुलभता सुदारपाचेर विशेश लक्ष केंद्रित करून गोंय सगळ्यां पांवड्यार भलायकी सेवेचो विस्तार करता. सरकारान सुरू केल्ल्या प्रतिबंधात्मक भलायकी मोहिमेचो राज्यभरांतल्या चाळीस हजारा परस चड बायलांनी लाव घेतला.
ह्या वेळार उलयतना मुख्यमंत्री डॉ. प्रमोद सावंत हांणी “उपचारा परस प्रतिबंधक उपाय सदाच बरे आसता आनी बेगीन निदान जालें जाल्यार जीव वाचपाक शकता” अशें सांगलें. सरकारान प्रतिबंधात्मक भलायकी सेवा मजबूत करपाचेर आनी सगळ्यां पांवड्याचेर सेवांचो विस्तार करपाचेर भर दिल्लो आसा, जाका लागून दरेक नागरिकाक भलायकी सेवा सोंपेपणी उपलब्ध जातल्यो. आयुष मंत्रालयाची स्थापना जाल्ल्यान भारताची भलायकी सेवा वेवस्था घटमूट जाल्या आनी संवसारीक पांवड्यार पारंपरिक वैजकी पद्दतीक प्रोत्साहन मेळ्ळा, अशेंय तांणी सांगलें.
मुख्यमंत्री डॉ. सावंत हांणी सांगलें, भलायकी सेवा मळार कुशळ वेवसायिक आनी मनीसबळ निर्माण करपा खातीर होमिओपॅथी महाविद्यालयां सारख्या संस्थांक मजत करपा वांगडाच वैजकी शिक्षण, संशोधन आनी पायाभूत सुविधा मजबूत करपा खातीर सरकार कटिबद्ध आसा. तशेंच वेलनेस पर्यटनाक प्रोत्साहन दिवपात येता, अशेंय तांणी सांगलें.
हे कार्यावळीक गोंय होमिओपॅथी मंडळाचे रजिस्ट्रार डॉ. राजेंद्र काणेकार, गोंय होमिओपॅथी मंडळाचे अध्यक्ष डॉ. बिपिन साळकार, श्री कामाक्षी देवी होमिओपॅथिक वैजकी महाविद्यालयाचे प्राचार्य डॉ. रोशनी शिरवयकार, साई नर्सिंग इन्स्टिट्यूटच्यो प्राचार्य डॉ. अदिती सावंत देसाय आनी गोंय वैजकी महाविद्यालयाचे डॉ. आरिफ रझा आनी भलायकी सेवा मळावयले वेवसायिक हाजीर आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
