भांगरभूंय | प्रतिनिधी
खंयचोय फाटो तुमी घेयात, तातूंत जर तुमकां आवड नासत तर कितेंच करपाक कठीण वता. पूण जायत्या फावट आवडूय आसून उपेग ना ते जागेंत परिश्रम, सातत्य जाय, तरूच तुमी त्या फाट्यान कितें तरी करूं शकतले. फाटल्या लेखांत हाचीं उदाहरणां लेगीत आमी पळयल्यांत. अभिनय क्षेत्रांत जायते जाण आपलें नशीब आजमावपाक मुंबय वतात. तांचे भितर अभिनयाक गरज आशिल्ले सगले गुण आसतात, पूण खूब सर्त आशिल्ल्यान तुमच्या भितरल्या गुणांक कोण विचारीना. अशेंय घडटा. अशा वेळार आपले कडेन बी प्लॅन म्हळ्यार पर्यायुय आसपाक जाय. अमिताभ बच्चन कोलकाता हांगां ग्लॅक्सो कंपनीन बऱ्या पदाचेर आसलो पूण ताणे अभिनय करपाचें थारायलें आनी तो मुंबय पावलो. ताच्या लागीं आवाज आशिल्लो, पूण चेहरो खंय आशिल्लो? पण, ताच्या अभिनयान इतिहास घडयलो, हें आमकां सगळ्यांक खबर आसा. ताणें दुसऱ्यांक कितेंतरी दिवपाचें थारायलें. हें सगलें सांगपाक कारण जालें की आतांच्या तरणाट्यांक खय कितें करचें हाचो अदमास येना आनी तो गोंदळता. करियरा भितर दुसऱ्याक आपुण कितें तरी दितलों हो विचार आसपाक जाय.
साखळे गांवचो यतीन संजीव काणेकार ह्या तरणाट्यान शिक्षण घेतले उपरांत पुण्याक दोन- एक वर्सां नोकरी केली. फुडें कितें करपाचें, हो प्रस्न हेरां सारको ताका पडिल्लो. म्हळ्यार ताचे कडेन दोन पर्याय आसले, ते म्हळ्यार दुसरे कंपनींत चड पगारार काम करप नाजाल्यार आपल्याला मेळिल्ल्या अणभवाचो उपेग करप. यतीनान विचार केलो की जायत्या तरणाट्यां कडे शिक्षण आसता, पूण नोकरी नासता, खास करून गांवगिऱ्या तरणाट्यांक. मागीर हांच्या खातीर कितें करूंक जातलें? ह्या विचारान ताणें पुण्यांतली नोकरी सोडली आनी तो गोंयांत सांखळे पावलो. हांगा कितें परिस्थिती आसा? हें आजमावपाक ताणें उण्या पगाराची नोकरी लेगीत केली आनी ताणें साखळेच आपल्या गांवांत सेवा दिवपी एक कंपनी सुरु केली आनी गांवगिऱ्या तरणाट्यांक संद दिली. आयज पणजी, वेर्णें, मडगांव ह्या वाठारांत नोकरेची संद मेळूं शकता अशें चित्र आसा, ताका यतीनान आपले परीन जाप दिवपाचो यत्न केलो. खास गजाल म्हळ्यार ताचे लागीं राजकी शक्त लेगीत नासली. आयज ताचे कंपनी वरवीं तुमी पणजे, मडगांव, वेर्णां वचनासतना तुमचें काम करूं शकतात. आपल्या माया एच आर सोल्यूशन हे कंपनीच्या माध्यमांतल्यान ताणें उमेदवार घेवपाक, तांकां प्रशिक्षण दिवपाक, समुपदेशन करपाक, हेर कंपनीं लागपी सल्लो दिवपाक करियर जात्रा भरोवप, विविध संस्थांच्या मजतीन उमेदवारां खातीर नोकरी दिवप अशी जायतीं कामां हातांत घेवन तीं सुरु केल्यांत.
ह्या ताच्या वावराक राजकी फाटबळ उणें आशिल्ल्या कारणान फाव त्या लोकां मेरेन ताचो वावर वचूंक ना. आयज जर तुमकां नोकरी जाय तर अणभव जाय पडटा, खेरीज सरकारी जावं खाजगी नोकरी मेळयतलो जाल्यार तुमचे कडेन फाव तीं कौशल्यां जाय. ती नासत तर निर्शेणी येवं शकता.ती येवची न्हय म्हूण यतीन आपले परीन यत्न करता. आयज ज्या कर्मचाऱ्यांक ताणें संद दिल्या, तांकां तो आपल्या कुटुंबातले सदस्य हे नजरेन पळयता. योग्य त्या कर्मचाऱ्याक बडटी दिवप, वेतन वाडोवप तो करता. हें सगलें हुस्क्याक लागून करता. जेन्ना ताणें उद्योग सुरु करचो थारायलो तेन्ना लेगीत हो हुस्को ताच्या मुखार आसली, पूण तो म्हणटा आपलो उद्देग सुरु करतलो जाल्यार धाडस जाय, आत्मविस्वास जाय, अणभव जाय. तरुच तुमी ह्या मळार कितें तरी करू शकतलें.
आयज तरणाटे नोकरेचें सपन पळयतात. सदाच अशें सपन पुराय जातलें अशें ना. तुमकां नोकरेची संद मेळूं शकता, पूण तुमकां ती समाधान दितली अशें ना. काय वेळार तर तुमची पिराय लेगीत वाडिल्ली आसता. यतीन हांचें म्हणणें अशें आसा की, तुमी मेळटा त्या वेतनाचेर नोकरी करात, शिकपाक मेळटा तें सगलें शिकून घेयात, अणभव घेयात, पूण स्वताचो उद्देग सुरु करपाचो जरूर यत्न करात. कश्ट, आत्मविस्वास, परिश्रम, सातत्य हे गुण विकसित करपाक विसरूं नाकात, हाची तो नमळायेन याद करून दिता. (इ मेल- www. mayahrsolutions. com, फोन 8483079401)
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
