भांगरभूंय | प्रतिनिधी
सादनसुविदा शुल्क दुरूस्तीक सभाघराची मान्यताय
पणजी : उद्येजक तशेंच वेपार्यांक आतां सादनसुविदा शुल्क दोन पावंड्यान फारीक करपाची मेकळीक आसतली. प्रकल्प वा वेवसायाक तांत्रीक परवानो दिले उपरांत शुल्काची ५० टक्के रक्कम फारीक करची पडटली. उरिल्ली ५० टक्के रक्कम प्रकल्प पुराय जाल्ल्याचो (कप्लीशन सर्टीफीकेट) दाखलो दिल्या उपरांत भरपाची पडटली.
सभाघरांत सोमारा रातीं गोंय सादनसुविदा शुल्क दुरूस्ती विधेयक २०२५ मंजूर जालें. शार उदरगत खात्याचे मंत्री विश्वजीत राणे हांणी विधेयक चर्चेक घेवन तें संमत केलें. उद्देग वा वेवसायाक वीज, उदक, रस्ते तशेंच हेर सुवीदा दिवपा खातीर तांकां शुल्क आकारपाची तजवीज कायद्यांत आसा. ह्या कायद्याच्या कलम ३ मदीं दुरूस्ती जाल्या. उद्देजकांक शुल्क म्हूण मोठी रक्कम पयलींच फारीक करची पडटली. आतां दोन टप्प्यान शुल्काची रक्कम फारीक करपाची सवलत दिल्ल्यान उद्देजकांक थाकाय मेळटली, अशें आमदार दिगंबर कामत हांणी सांगलें.
मुळाव्यो सुविदा दिवपाच्या बदला हें शुल्क आकारपा खातीर कायदो तयार जाल्लो. आतां विजेचो ट्रान्सफॉर्मर तशेंच हेर सुविदा उद्देजकांकूच तयार करच्यो पडटात, अशें विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
