भांगरभूंय | प्रतिनिधी
हा लींच उद्देगमंत्री भोवमानेस्त मावीन गुदिन्य हांणी नवे उद्देग गोंयांत येवचे अशें म्हणलां. कित्याक तर ताका लागून रोजगार मेळटलो. हे खातीर तांणी नेम सदळ करून उद्देजकांक थाकाय मेळटली, अशे नेम हाडल्यात. रोजगार वाडपाक जाय जाल्यार गोंयांत उद्देग, वेवसाय सुरू जावपाक जाय, हें खरें. पूण उद्देग जर प्रदुशण करपी आसा जाल्यार लोकांची विरोध हो जातलोच. ताका परवानगीय मेळची ना. आयज पर्यावरणाक आदार करपी जायते उद्देग सुरु करुं येतात. खेरीज तांकां जाय तसले उमेदवार लेगीत गोंयांत मेळपाक शकतात. गरज आसा, ती उमेदवारांनी ह्या उद्देगांक जाय तें शिकपाची. तांकां ताचें मार्गदर्शन दिवपाची. चडशे अभियांत्रिकी विद्यार्थी ह्या कामाक वतात. ते महाविद्यालयांक मुलाखतींत कितें विचारतले ना जाल्यार तांची कितें अपेक्षा आसा तें सांगपाक शकतात. तांचे लागीं प्लेसमेंटा खातीर व्हडल्यो कंपनी येतात.
फाटल्या एका लेखांत काॅलेजांनी हो उपक्रम चालीक लावचो, अशें सुचित केल्लें. हातूंतल्यान त्या विद्यार्थ्यांक आत्मविस्वास येतलो. खेरीज बेकारी उणी जावपाक मजत जातली. सध्या चिप करपाक, स्टार्ट अप उपक्रमांक सरकार तेंको दिता. हाचो लाव तरणाट्यांनी घेवपाक जाय. उठसुठ सरकारी नोकरेच्या फाटल्यान लागप आनीक कितलो तेंप चलतलें? खंयचोय उद्देग, वेवसाय सुरू करचे पयलीं ताची जाणकारा कडल्यान म्हायती घेयात. इंटरनेट वेवसायटीचेर अवलंबून रावनासतना जो मनीस हो वेवसाय करता ताका मेळून म्हायती विचारात. म्हणल्यार ताचो अभ्यास करात. ज्या वेवसायांची म्हायती ना, जाल्यार कोणाकूय विचारप बरें.
बरेच फावट वेवसाय मनांत आसता, पूण तो सुरू करपाक फावो ती सुवात मेळना. घडये तुमची सुवात आसा आनी एखादो वेवसाय सुरू केलो तरी तो चलत म्हूण खात्री दिवपाक जायना. हे खातीर नवे पद्दती प्रमाण तुमी एखाद्या आस्थापनांत नोकरी करूं शकतात. ती पगारा खातीर न्हय, तर अणभवा खातीर. तो एकदा मेळ्ळो काय वेवसाय करप चड सोंपे जावं शकता. एक लक्षांत दवरात, तुमकां पयसो मेळूं शकता, पूण अणभव सोंपेपणी मेळना. तुमी एखादे सुवातेच्या आसपास सर्वेक्षण करपाक शकतात. हातूंत तुमकां मागणी कसली आसा, तें कळपाक सोंपें जातलें. नाजाल्यार आमी पळयतात, वेवसाय सुरू केला, पूण ते सुवातेक मागणी नासता. सगल्योच गजाली तुमकां कोण शिकयतलो अशें ना. तुमचें तुमकां पावल उबारून मुखार वच्चें पडटलें.
सुवात आनी वेवसाय निश्चीत जालें काय तुमी भांडवल उबें करपाचे तयारेक लागात. तुमी कितलें उबे करपाक शकतात, ताचो अदमास घेयात. मागीर उणें व्याज घेवपी बँकेच्या सोदाक लागप, तुमकां सोंपें पडटलें. तुमचो घरचो जाण्ट्यांचो वेवसाय आसा, जाल्यार तुमचें अर्दें काम जालें म्हणपाचें. पूण थंय पसून शिस्त जाय. अणभवांतल्यान तुमी शिकतले. सरकारी येवजण्यो आसात. पूण ताचोय अभ्यास करप गरजेचें. हेच खातीर कार्यालयांत वचून कोणें हे येवजणेचो लाव घेतला ताची म्हायती घेवची. त्या मनशाक प्रत्यक्ष वचून मेळचें. हें मात्शें अडचणीचें आसूं येता. पूण आमी विसरूंक फावना की उद्देग, वेवसाय सुरू केलो जाल्यार रोजगार दिवपाक तुमी तयार जातात. तो मागीर चड आसूं वा उणो. जेन्ना तुमकां मनीस जाय अशें वाठारांत कळटा तेन्ना जायते उमेदवार गर्दी करपाक शकतात. पूण तांची निवड करतना तुमी सादूर रावपाक जाय. अश्यो जायत्यो गजाली आसात, त्यो तुमकां अणभवांतल्यान कळूं शकता. पूण हें धाडसी पावल उखलपाचो जरूर विचार करचो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
