भांगरभूंय | प्रतिनिधी
गोय आनी केंद्रांत एकाच पक्षाचें सरकार आशिल्ल्यान गुंतवणूकदारांक उर्बा दिवपाक नव्यो येवजण्यो हाडल्यात. तेन्ना गोंयांत गुंतवणूक करपाक होच योग्य वेळ आशिल्ल्याचें मत मुख्यमंत्री डाॅ. प्रमोद सावंत हांणी उक्तायला. सध्या गोंयांत ‘इन्व्हेस्ट गोवा’ महोत्सव चलता. तातूंत उद्देग, गुंतवणुकी संबंदीच्या साबार विशयांचेर भासाभास जाता. उद्देग मळा वयले जायते मानेस्त हांगां आयल्यात, तांचे मदीं संवाद जातलो. तांकां उर्बा दिवन गोंयांत चडांत चड अर्थीक गुंतवणूक जावची हो ह्या महोत्सवा फाटलो हेतू. खंयच्याय राज्याचो विकास जातलो जाल्यार थंयची शिक्षणीक, उद्देगीक उदरगत जावप खूब गरजेची. ते खातीर जाय त्यो साधनसुविधा संबंदीत राज्यांत आसपाक जाय. शिक्षणाचे बाबतींत सांगपाचें जाल्यार उण्या खर्चांत दर्जेदार शिक्षण मेळपाक जाय. नाजाल्यार मागीर शिक्षणा खातीर विद्यार्थ्यांक हेर राज्यांनी वा भायल्या देशांनी वच्चें पडटा. उद्देगांक लागता, तें शिक्षण, प्रशिक्षण गोंयांत मेळचें. उद्देगां खातीर वीज, उदक आनी येरादारी सारकी जाय. वीज आपालिपा खेळटा, म्हाल हाड -व्हर करपाक बरे रस्ते नात, कुशळ कामगार नात जाल्यार उद्देग बावतात आनी ताचें लुकसाण राज्याक जाता. तेन्ना सरकारी यंत्रणांक व्हडल्या उद्देगांक आमंत्रण दितना ह्यो मुळाव्याे गजाली जाग्यार घालच्यो पडटल्यो. त्यो जाग्यार आसात जाल्यार तातूंत आनीक सुदारणा करची पडटली.
हालींच्या काळांत गोंयकार तरणाटे आयटी मळार फिशाल जाल्ले दिसतात. पुणें आनी बंगळुरांत शेंकड्यांनी गोंयकार तरणाटे आसात. तातूंतल्या अर्द्यांक तरी गोंयांत हाडपाक मेळटलें? थंय कांय जाण भारतीय, तर थोडे अमेरिकन कंपनींनी काम करतात. ह्यो वा हेर कंपनीं गोंयांत येवप शक्य ना? कारण म्हायती तंत्रज्ञान मळाक फुडाराक खूब वाव आसा. तातूंत पयसोय भरपूर आसा. प्रदुशण जायना. सध्या केंद्र आनी राज्य सरकारांनी रोबोटिक्स, कोडींग अभ्यासक्रम सुरु केल्यात. कांय कडेन सुरू जावपाचे आसात. म्हायती तंत्रज्ञानाचें शिक्षण गोंयांत सरकारी पांवड्यार सुरू जायत आनी तसले उद्देग, वेवसाय गोंयांत येत जाल्यार आनीक कांय वर्सांनी गोंयकार तरणाट्यांक पुण्यां, बंगळुराक वचपाची गरजूच पडची ना. प्रजासत्ताक दिसा पद्मश्री पुरस्कार जाहीर जाले. तातूंत सावयवेरेंच्या संजय पाटील ह्या शेतकाराक पद्मश्री किताब मेळ्ळो. फळ उत्पादन म्हामंडळाच्या अभ्यासा प्रमाण, गोंयांत शेतकार वाडत आसात. तांचें उत्पन्नूय वाडटा. म्हणटकच कृशी मळा वयले उद्देग हांगा हाडूं येतात. गोंयांत उण्या प्रमाणांत आसलें तरी आंबो, काजू, पणस आनी हेर उत्पादनांक हाचो फायदो जातलो हातूंत दुबाव ना. पर्यटन राज्य जाल्ल्यान गोंयांत खाणांच्या उद्देगांकूय फुडार आसा. गोंयांत खाणांचे लघुउद्देग घराघरांनी आसात. मोठ्या प्रमाणांतूय एक- दोन आसात. राष्ट्रीय पांवड्यार नांव घे सारके उद्देग हांगा सुरू जावचे.
गोंयांतले कांय उद्देग गोंयचे, खास करून गोंयकार तरणाट्यांच्या कालेतीक मानवतलेच अशें नात. ते खातीर विचार करून उद्देगांक आमंत्रण दिल्यार बरें. सध्या ज्या उद्देगांक वाडटी मागणी आसा, ताचें शिक्षण, प्रशिक्षण गोंयांत मेळपाक जाय. गोंय हें ल्हान राज्य आशिल्ल्यान हांगां प्रदुशण जालें जाल्यार ताची बाधा रोखडीच लोकांक, मोनजात आनी सैमाक जाता. कालूच राज्य प्रदुशण नियंत्रण मंडळान 687 उद्देगीक आस्थापनांक प्लास्टीक कोयर वेवस्थापनाचे नेम पाळूंक नाशिल्ल्यान तांचो उद्देग, वेवसाय, धंदो कित्याक बंद करचो न्हय अशी कारणां दाखयात नोटीस धाडल्या. पर्यावरणा कडेन तडजोड नाका. नोटिशी धाडी मेरेन हात- पांय कवळून ओगी रावपाचें धाडस वेवसायिकांक जाताच कशें, हाचोय विचार केल्यार बरो. कांय उद्देगांक लागून गोंयांत परप्रांतीयांचो आंकडो वाडला, असो दावो कांय संघटणां, पक्ष करतात. गोंयांत कामगार मेळनात म्हणटकच ते भायल्यान हाडचेच पडटात. तरीय सरकारी यंत्रणांनी हें मनीसबळ गोंयकारां मदल्यानूच तयार जातलें, हे खातीर पावलां उबारप ही आयच्या काळाची गरज जाल्या.
गोंयांत चडांत चड गुंतवणूक जावपाकूच जाय. त्या उद्देगांक सोंपेपणी सरकारी सुविधा मेळपाक जाय. ते खातीर सरकारी सेवांनी पारदर्शकताय आसची पडटली. ते नदरेन सरकारान तयारी केल्या, अशें उद्देग मंत्री सांगतात. गोंयांतल्या उद्देगीक वसणुकांनी कितले उद्देग बंद आसात, ताचोय नियाळ घेवप गरजेचें. उद्देग आयले, अनुदान, सवलती घेतल्यो आनी कांय काळान ते बंद जाले… हें गोंयच्या उद्देग मळाक बदनाम करपाक शकता. पोट भरपा खातीर सगलेच अमेरिकेक धांवतात, तशे भारतांतूय येवंक जाय. आमचो देश म्हासत्ता जालो आनी उद्देगीक मळाचेर तरतरलो जाल्यार गोंयकारांक नोकरे खातीर हेडचें पडचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
