भांगरभूंय | प्रतिनिधी
पणजी: उद्देग, वेपार आनी वाणिज्य खात्यान पणजे ईडीसी च्या नालंदा बहुउद्देशीय सभाघरांत आयोजीत कार्यावळींत दिव्यांग व्यक्तींक खाजगी मळार रोजगार हे संकल्पने वांगडा संवसारीक सुक्ष्म, ल्हान आनी मध्यम उद्देग दीस मनयलो.
उद्देग, वेपार आनी वाणिज्य खात्याच्यो संचालक स्वेतिका साचन हांणी परंपरीक दिवली पेटोवन कार्यावळीचें उक्तावण केलें.
गोंय उद्देगीक विकास म्हामंडळाचे वेवस्थापकीय संचालक प्रविमल अभिषेक, राज्य दिव्यांग आयोगाचे सचीव ताहा हाजीक, गोंय राज्य उद्देग संघटणेचे अध्यक्ष दामोदर कोचर, गोवा चेंबर ऑफ कॉमर्स एण्ड इंडस्ट्रिजचे अध्यक्ष राल्फ डिसौजा, लघू उद्देग भारतीचे अध्यक्ष राजकुमार कामत आनी हेर अधिकारी कार्यावळीक हाजीर आशिल्ले.
ह्या वेळार स्वेतिका साचन हांणी लघू उद्देजकांक एके माचये खाला हाडून लघू उद्देग मळाचे उदरगती खातीर येवपी काळांत कितें करप शक्य आसा, हाचेर विचार करून निर्णय घेवपाच्या हेतान अश्या कार्यावळींचें आयोजन करता, अशें तिणें सांगलें. सुक्ष्म, ल्हान आनी मध्यम उद्देगीक मळार चडांत चड साधनसुविधायो निर्माण करपाची आनी देशांतल्या लघू उद्देजकांक समान संदी उपलब्ध करपाची गरज तांणी उक्तायली.
गोंय उद्देगीक विकास म्हामंडळाचे वेवस्थापकीय संचालक प्रविमल अभिषेक हांणी आपल्या उलोवपांत गोंयच्या उत्पादनांचें प्रदर्शन आनी वेपारा खातीर उद्देगीक विकास म्हामंडळा वतीन एमएसएमई एक्सपोचें आयोजन करपाचो विचार आशिल्ल्याचें सांगलें. राज्यांत लॉजिस्टीक वेवसायाक प्रोत्साहन दिवपा खातीर सरकारान गोंय लॉजिस्टीक आनी व्हेअरहावजींग धोरण अधिसुचीत केल्ल्याचेंय तांणी सांगलें.
सुरवातीक उपसंचालक हिमांशू पाटणेकर हांणी मानेस्तांक येवकार दिलो. श्याम गांवकार हांणी कार्यावळीचें सुत्रसंचालन केलें आनी निमाणें जॉयसी डिसौजा हांणी उपकार मानले.
उपरांत राज्य दिव्यांग आयोगाचे सचीव ताहा हाजीक हांचे अध्यक्षतेखाला दिव्यांग व्यक्तिंक खाजगी मळार रोजगार ह्या विशयाचेर चर्चासत्र आनी सुक्ष्म, ल्हान आनी मध्यम उद्देग येवजण्यांचेर सादरीकरण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
