भांगरभूंय | प्रतिनिधी
आलेक्स रेजिनाल्ड : साधन सुविधांचेर अंदूं 200 कोटी जातले खर्च
भांगरभूंय । प्रतिनिधी
पणजी : उद्देगीक वसणुकांनी बायलां खातीर 5 सुवातांचेर वसतीघरां जातलीं. तशेंच रस्ते आनी हेर सुविधां खातीर अंदूं 200 कोटी रुपया खर्च जातले, अशें उद्देगीक उदरगत म्हामंडळाचे अध्यक्ष आलेक्स रेजिनाल्ड हांणी सांगलें.
उद्देगीक उदरगत म्हामंडळाची बुधवारा बसका जाली. हे बसकेक उद्देग मंत्री मॉवीन गुदिन्हो हांचे सयत संचालक अनिरूद्ध धेंपो तशेंच हेर संचालक हाजीर आशिल्ले. कुंडय, मडकय आनी कुंकळ्ळी उद्देगीक वसणुकेंत एक जाल्यार वेर्णा उद्देगीक वसणुकेंत बायलां खातीर दोन वसतीघरां उबारपाचो प्रस्ताव आसा. एका वसतीघरांत 120 बायलांक रावपाची वेवस्था आसतली. बेगिनूच वावर सुरू जातलो, अशें आलेक्स रेजिनाल्ड हांणी सांगलें.
वेर्णा सयत हेर उद्देगीक वसणुकांनी खूबशीं बायलां नोकरी करतात. तांकां सवाय दरांत रावपाची वेवस्था वसतीघर जाले उपरांत जातली. रस्ते, पियेवपा खातीर उदक, नितळसाण, घरां तशेंच विजेची वेवस्था करपाचो वावर सुरू आसा. अंदूंच्या वर्सा 200 कोटींच्या 24 प्रकल्पांक मान्यताय दिल्या. हातूंत रस्ते तशेंच कोयर प्रक्रिया प्रकल्पाचो आस्पाव आसा. सगळ्या उद्देगीक वसणुकांनी कोयरा सांठोवपा खातीर शेड (एमआरएफ) तयार जातल्यो. तशेंच कोयर प्रक्रिया प्रकल्प उबारपाचो प्रस्ताव आसा. कुंकळ्ळी वसणुकेंत प्रदुशणाची समस्या आसा. प्रदुशणाचें मोजमाप करपा खातीर दोन तपासणी केंद्रां जातलीं, अशें रेजिनाल्ड हांणी सांगलें.
उद्देजक, कामगार तशेंच सामान्य मनशा खातीर सुविधा उबारपाचो वावर उद्देगीक वसणुकेंत सुरू आसा. हाका लागून उद्देगीक वसणुकेचो साज बदलतलो. हाचो उपेग उद्देगीक गुंतवणूक वाडपाक जातलो, अशें उद्देगमंत्री मॉवीन गुदिन्हो हाणी सांगलें.
आयडीसीचे सगळे वेव्हार ऑनलायन करपाची प्रक्रिया सुरू आसा. परवाने सादर करपाची प्रक्रिया सोंपी जाल्या, अशें तांणी सांगलें. उद्देगीक वसणुकेंत खणपा विशींच्या (एक्सावेशन) कामांचेर एक्सावेशन संघटणेन हरकत घेतल्या. संघटणेन आयडीसीचेर आरोप केल्यात. आयडीसी वतीन एक्सावेशना विशींची निविदा जारी जाय ना. कामाची निविदा जारी जाता. खणपा विशींची (एक्सावेशन) एसओपी आयडीसीन तयार केल्या. हे एसओपी प्रमाण कामां जातली, अशें अध्यक्ष आलेक्स रेजिनाल्ड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
