भांगरभूंय | प्रतिनिधी
नवी दिल्ली, खबरां संस्था ः देशांतल्या उत्पादन मळाची कामगिरी आनी उत्पादन वाड दाखोवपी उद्देगीक उत्पादन निर्देशांक फेब्रुवारींत 5.7 टक्क्यांनी वाडल्या अशें सरकारी यंत्रणांनी जाहीर केल्ल्या आंकडेवारींतल्यान स्पश्ट जाला. देशांतल्या उद्देगीक क्षेत्रांतल्या गतीशीलतेचो तो एक सूचक मानतात. खण क्षेत्रांतल्या बळिश्ट कामगिरीक लागून उद्देगीक उत्पादन निर्देशांक चार म्हयन्यांच्या उंचेल्या पांवड्यार पावलो.
राष्ट्रीय सांख्यिकी कार्यालयान (एनएसओ) जाहीर केल्ल्या आंकड्यां प्रमाण फाटल्या वर्सा फेब्रुवारींत खण उत्पादनांत 8 टक्क्यांनी वाड जाल्या. ह्या क्षेत्रांत फाटल्या वर्साच्या त्याच म्हयन्यांत 4.8 टक्क्यांनी वाड जाल्या. निर्मिती क्षेत्रातल्यान उत्पादन वाड 5 टक्क्यांनी आशिल्ली, जी आदल्या वर्साच्या त्याच म्हयन्यांत 5.9 टक्क्यांनी उणी आशिल्ली. फाटल्या वर्साच्या त्याच म्हयन्यांत 8.2 टक्क्यांच्या वाडी वयल्यान फेब्रुवारींत वीज निर्मिती क्षेत्रांतली वाडीचो दर 7.5 टक्क्यांनी देंवलो. तशेंच भांडवल माल विभागांतली वाड फेब्रुवारी 2024 वर्सा 1.2 टक्क्यां मेरेन देंवली, जी वर्सा आदल्या त्याच काळांत 11 टक्क्यांचेर आशिल्ली. अंदूं फेब्रुवारींत प्राथमीक वस्तूंचें उत्पादन 5.9 टक्क्यांनी वाडलें, पूण फाटल्या वर्साच्या 7 टक्क्यांच्या तुळेंत उणी जाल्या.
2023-24 वर्साच्या एप्रिल -फेब्रुवारी काळांत उद्देगीक उत्पादनाच्या निर्देशांकांत वाड 5.9 टक्क्यां मेरेन पावली. फाटल्या वर्साच्या ह्याच काळांत नोंद जाल्ल्या 5.6 टक्क्यां परस चड आसा. हाचे आदीं ऑक्टोबर 2023 वर्सा ह्या निर्देशांकांत 11.9 टक्क्यांनी उंचायेची नोंद जाल्ली, उपरांत नोव्हेंबर 2023 वर्सा 2.5 टक्क्यांनी, डिसेंबरांत 4.2 टक्के आनी जानेवारी 2024 वर्सा 4.1 टक्क्यांनी तांतूत देंवती कळाव दिसून आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
