भांगरभूंय | प्रतिनिधी
हरवळ्यां कोयर सांठोवपाच्या केंद्राचें उक्तावण
दिवचल: गोंय नितळ, सुंदर आनी आत्मनिर्भर करपाक सरकार सगळे यत्न करता. अशें आसतना उद्देगीक आनी हॉटेलांतलो कोयर गांवांनी वा रस्त्या कुशीक हाडून उडोवपाचे प्रकार वाडिल्ल्यान तांणी हे प्रकार बेगीनूच आडावचे. ना जाल्यार सरकार खर कारवाय करून त्या आस्थापनांक सील मारपाक फाटीं फुडें पळोवचें ना, अशी शिटकावणी मुख्यमंत्री डॉ. प्रमोद सावंत हांणी दिली.
हरवळें पंचायत वाठारांत कोयर सांठोवपाच्या सुविधा केंद्राच्या उक्तावणा वेळार ते उलयताले. ह्या वेळार माचयेर महेश पाटील, अंकित यादव, के गणेश, डॉ. सचिन तेंडुलकार, सरपंच गौरवी नायक, अजय मळीक, आग्नेलो जॉर्ज, पंचायत वांगडी आनी ग्रामस्थ हजर आशिल्ले.
गोंय सरकार राज्यांतल्या कोयर वेवस्थापना खातीर वेगवेगळ्या माध्यमांतल्यान कोट्यांनी रुपया खर्च करता. ‘नितळ गोंय सुंदर गोंय’ करप हें दरेकाचें काम आशिल्ल्यान ते नदरेन राज्यांतल्या पंचायत, नगरपालिकांनी कार्यरत रावचें. सुको कोयर, ओलो कोयर हाचेर प्रक्रिया करपा खातीर सरकारान जायतीं साधनां दिल्यांत. आत्मनिर्भर गोंय हें गोंयचे सपन. मात ते खातीर सुंदर आनी नितळ गोंय आसप गरजेचें. उद्देगीक कोयर तशेंच हॉटेलाचो कोयर ही व्हड समस्या जातना ताचेर प्रक्रिया करपा खातीर आस्थापनांच्या लोकांनी विशेश भर दिवचो. दुर्दैवान कांय सुवातांचेर हॉटेल आनी उद्देगांतलो कोयर रातच्या वेळार गांवांत उडोवपाचे प्रकार घडिल्ल्यान हे विशीं सरकार गंभीरपणान दखल घेतले. ही सरकाराची शिटकावणी समजूची अशेंय डॉ. सावंत हांणी स्पश्ट केलें.
बिसलरी नॅशनल, अर्थ इंटरनॅशनल गोंय पॉल्युशन कंट्रोल बोर्ड, मिनरल फावंडेशन ऑफ गोवा, गोवा वेस्ट मेनेजमेन्ट आदींच्या सहकार्यान ड्राय वेस्ट वेवस्थापन करतले. हाचे खाला कोयर एकठांय करतले. हाचे वरवीं ह्या वाठारांत सुमार २० ते २२ लोकांक रोजगाराची संद उपलब्ध जातले अशें मुख्यमंत्र्यांनी ह्या वेळार स्पश्ट केलें.
ह्या प्रकल्पांतल्यान सुको कोयर एकठांय करून प्रक्रिया करप आनी ह्या कोयरांतल्यान अर्थीक उत्पन्न मेळोवप, अशे दोन फायदे आसात. हाका विशेश म्हत्व आशिल्ल्याचें तांणी स्पश्ट केलें. हरवळें पंचायत कोयर वेवस्थापन एक आदर्श जावन आसा. हो आदर्श राज्यांतल्या हेर पंचायतींनीय घेवचो असोय मुख्यमंत्र्यांनी उलो मारलो.
अशे तरेचे प्रकल्प उबारिल्ल्यान कोयर वेवस्थापनाचेर निश्चीतूच मार्ग काडप सोपें जातलें. दरेकल्यान आपली मानसिकता बदलतना सुंदर, नितळ गोंय कायम दवरप गरजेचें. हॉटेल आनी उद्देगांच्या कोयराचेर योग्य प्रक्रिया करप १००% शक्य जाल्ल्यार गोंय १००% सुंदर, नितळ जातलें आनी पर्यटना खातीर आदर्श थारतलें, अशेंय मुख्यमंत्र्यांनी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
