भांगरभूंय | प्रतिनिधी
गोंय आयडीसीचो उपक्रमः अर्थीक संकश्टांत सांपडिल्ल्या उद्देजकांक मेळटली थाकाय
भांगरभूंय । खबरां मेज
पणजीः कोवीड-19 म्हामारी आनी ताका लागून उप्रासिल्ल्यो हेर समस्या तशेंच अर्थीक संकश्टांत सांपडिल्ल्या उद्देगांक थाकाय दिवपाच्या उद्देशान गोंय उद्देगीक विकास म्हामंडळान (गोवा आयडीसी) आपल्याले 385 वे संचालक मंडळाचे बसकेंत ‘कोवीड – 19 सवलत येवजण’ जाहीर केल्या.
हे येवजणे खाला रिणांचे हप्ते, कळंतर शुल्क वा भाडें शुल्क फारीक करूंक नाशिल्ल्या उद्देगांक आकारपी दंडात्मक कळंतर (सादें) आतां 5 टक्क्यांचेर हाडलां. ही सवलत येवजण 24 जून 2023 ह्या दिसा सावन फुडल्या 30 दिसां खातीर लागू आसतली. गोंय आयडीसीचे अध्यक्ष आनी कुडतरीचे आमदार आलेक्स लोरेन्सो हांणी ही म्हायती दिली.
राज्याचे अर्थीक उदरगतीक उर्बा दिवपाच्या उद्देशान उद्देगां खातीर जाहीर केल्ली ही ‘कोवीड- 19 सवलत येवजण’ एक लाबकारक उपक्रम थारतलो. हे येवजणे वरवीं रीण हप्तो, रिणांचें कळंतर वा भाडें शुल्काच्या माध्यमांतल्यान 36 कोटी रुपया वसूल करपाक मजत जातली. वेवसाय सुलभता वाडोवप आनी अर्थीक उदरगतीक चालना दिवपाक सरकार आनी उद्देग ह्या दोनूय घटकां खातीर ही येवजण उपेगी थारतली. हे येवजणेक लागून सरकाराक महसूल मेळपा वांगडाच रोजगार निर्माण करपाची संद उपलब्ध जातली, असो विस्वास गोंय आयडीसीचे अध्यक्ष आनी कुडतरीचे आमदार आलेक्स लोरेन्सो हांणी उक्तायला.
हे येवजणेचो लाव घेवपाक गोंय आयडीसीचे मुख्यालय वा संबंदीत क्षेत्रीय वेवस्थापक कार्यालयांत येवजणेच्या वैध काळा मजगतीं, उद्देगांक लेखी विनवणी पत्र सादर करचें पडटलें. एका हप्त्यांत थकबाकी भरप वा गोंय उद्देगीक विकास म्हामंडळाच्या नांवान म्हयन्याक हप्त्याचे चॅक सादर करप अशें पर्याय उपलब्ध केल्यात. चालू अर्थीक वर्स सोंपपा पयलीं पुराय थकबाकी वसूल करपा खातीर गोंय आयडीसीक उण्यांत 8 म्हयन्यांच्या हप्त्यांचो पर्याय उपलब्ध आसा. जे उद्देग 30 दिसांच्या वैध काळांत हे येवजणेचो लाव घेवचे नात, तांकां नियमीत दंडात्मक कळंतर भरचें पडटलें. तशेंच हे येवजणेचो काळ सोंपलें उपरांत थकीत रकमेच्या वसुली खातीर थकबाकीदारांचेर कायदेशीर कार्यवाही सुरू करतले. हाचे उपरांत गोंय आयडीसी वरवीं कसलीच सवलत येवजण जाहीर करचे नात, ते खातीर उद्देगांनी आपली थकीत रीण रक्कम भरपाचो उलो मारला.
प्रभावी अंमलबजावणे खातीर समन्वय बसका
ही येवजण येसस्वी करपाच्या उद्देशान येवजण तयार करपा पयलीं राज्यांतल्या विवीध उद्देगीक संस्थां वांगडा सल्ला-मार्गदर्शन चर्चा गोंय आयडीसीन केल्या. तशेंच गोंय आयडीसीचे सगले क्षेत्रीय वेवस्थापक आनी प्रक्षेत्र वेवस्थापक हांचे वांगडा 23 जून 2023 ह्या दिसा हे येवजणेची प्रभावी अंमलबजावणी करपाक समन्वय बसका घेतली. हे येवजणेचो लाव उद्देगांनी घेवपाक सगल्या उद्देगीक संस्था – संघटणांची मजत लेगीत हे येवजणेचे अंमलबजावणे खातीर घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
