भांगरभूंय | प्रतिनिधी
दरगतीचीं कामां गरजेचींच. ताका विरोध करप चुकीचें. मात, त्या कामां खातीर कितलो तेंप त्रास, मनस्ताप सोंसपाचें, ताकाय मर्यादा आसात. खास करून रस्त्याचीं कामां वर्साची वर्सां चलतात. ताका लागून मोलादीक वेळ, इंधन फुकट वता. सध्या राजधानी पणजेचे बाबतींत हें दिसून येता. वर्स जायत आयलें, सांतिनेज सिवरेज प्रकल्पा कडलो सांकव बांदतात. सांकव तो केदो आनी ताका वेळ कितलो? चवथी उपरांत एकेक रस्तो खणपाक सुरवात जाल्या. कोणाचीच कागाळ नाशिल्ली. मात, आतां अचकीत रस्त्याच्यो दोनूय वटो खणून दवरिल्ल्यान येरादारीची समस्या निर्माण जाल्या. वयर लोकांच्या वेवसाय आनी धंद्यांचेरुय परिणाम जाला. कोरोनाच्या काळांत फाटलीं दोन वर्सां तांकां अर्थिक धपको बसलो, आतां हीं विकास कामां. तीं केन्ना सोंपतलीं तें कळपाक मार्ग ना. महापौर म्हणटात, मार्च अखेर मेरेन पणजी चकाचक जातली. खरेंच जातली, काय काम बेमुजत मुखार वतलें? उपरांत पावस सुरू जालो काय पणजेची व्हेनिस जातली. कांय करपाक मेळचें ना, हेंय तितलेंच खरें. देखून केन्ना करूंक ना, ते गतीन काॅण्ट्रेक्टराक कामां पूर्ण करचीं पडटलीं.
केंद्र सरकारान कांय वर्सां पयलीं स्मार्ट सीटी संकल्पने खाला देशांतलीं शारां विकसीत करपाक कोट्यांनी दुडू संबंदीत राज्यांक दिल्ले. पणजी शाराचोय तातूंत आसपाव आशिल्लो. पूण, शाराचे उदरगतीचीं, सोबितीकरणाची कामां नेटान चालू जावंक नाशिल्ली. फाटल्या 2-3 म्हयन्यांत ताका केन्ना न्हय तो वेग आयला. सध्या पणजी शारांत 130 कोटींचीं कामां चलतात खंय. हीं कामां एकदां पुराय जालीं काय फुडलीं 20 वर्सां तांकां हात पसून लावपाची गरज ना, अशेंय आयकूंक येता. हाचो अर्थ तांचो दर्जो सामको ए- 1 आसतलो? पूण गोंय मुक्त जायत सावन रस्त्यांचे बाबतींत खंयच असो दर्जो दिसूंक ना. कांय जाणांच्या मतान, स्मार्ट सीटी खातीर आयिल्लो दुडू मार्चा उपरांत परतो वतलो. ताका लागून हीं कामां धडाधड पुराय करपाचें थारलां. तें कितेंय आसलें तर उदरगतीचें वेवस्थित नियोजन नाशिल्ल्यान पणजेची आवतिकाय जाल्या, हें मानून घेवचेंच पडटलें.
सांतिनेज खारीज हें पुर्तुगेजा वेळार जितें आशिल्लें. भितर व्हडीं पसून भोंवतालीं खंय. मात, फाटल्या 30- 40 वर्सां सावन ताका गटाराचें रुप आयलां. सिवरेज, घाणयारें उदक, उश्टें, कोयर सगलें थंय पडटा. सिवरेज प्रकल्पा कडल्या सांकवाचे दुरुस्तेक फेब्रुवारींत वर्स जातलें. एका उद्देजकाच्या मतान, सांकवाच्या डिझायनांत खंय चूक आसा. तो आतां नव्यान तयार करतले. म्हणजे रांदचे पयलींच ताट घेवन जेवपाक बसले!! रस्त्यांचेंय तशेंच. घर, फर्नीचर, दुरीग वा हेर कसलेंय काम हातांत घेतकच, तें अर्दवट सोडून कारागीर नाच्च जाता. ताणें 3- 4 कडलीं कामां आडावन दवरिल्लीं आसतात. स्मार्ट सीटींतल्यान रस्त्यांची हीच गत जावंक ना मूं? एक- एक काम हाता वेगळें करचे बदला, सगले कडेन खणून दवरलां. थंय जितो मूस पसून नासता. कामगार उणे आसात जाल्यार खणून दवरून लोकांची अडचण तरी कित्याक केल्या? रातच्या वेळार गोंयांत डांबरीकरणाचें काम जालां. म्हणटकच कंत्राटदाराक रातच्या वेळारुय तें करूं येता.
काम अर्दकुटें सोडिल्ल्यान सगल्यांत चड मनस्ताप जाता, तो गाडयेकारांक. मुळांत स्मार्ट सीटींत पार्किंगाचें जागे कमी. तातूंत दोनूय वटेन रस्ते खणिल्ल्यान लोक खंयूय गाडयो दवरपाक लागल्यात. मागीर येरादारीची कोंयडी आनी अपघात. तातूंत पार्किंगे खातीर पयशे पडटात. सारको जागो मेळना जाल्यार ते कित्याक दिवपाचे? येरादारी पुलीस गाडयेक कुलूप लावपाचीय शक्यताय. बऱ्याच वेपाऱ्यांचो आनी हेर वेवसायिकांचोय धंदो बसला. कारण तांचे मेरेन वचपाक वाटूच ना. कांय जाण बसताले थंय खणून दवरिल्ल्यान तांकां साटलीपोटली कवळून घरा बसचें पडलां. हातूंत फळां विकपी, पायलट, गाडेकार, हाॅटेलकार, फर्नीचर विकपी सगल्यांचोच आसपाव आसा. उदरगतीच्या नांवा खाला आनीक कितले म्हयने पणजेकारांक सोंसचें पडटलें, तें कळना. रस्ते, प्रकल्प उबारपाक सुरवात जाली काय ते केन्ना बांदून पूर्ण जातले, ताची तारीख खरें म्हणल्यार संबंदीतांनी जाहीर करपाक जाय. म्हणटकच कामांक उशीर जावचो ना. वयर म्हणलां ते प्रमाण, रस्तो खणलो आनी म्हयनोभर तो तसोच दवरलो, हाका अर्थ ना. सध्या स्मार्ट सीटींत हें पळोवंक मेळटा.
ह्या बांदकामांच्या दर्ज्या विशींय कांय लोकांक दुबाव आसा. रस्त्याचीं कामां सारकीं जावंक नात जाल्यार जून, जुलयांत प्रत्यक्ष पुरावे मेळटलेच. कारण हाचे मुखार स्मार्ट सीटींत उदक तुंबचे ना, अशें तज्ञ म्हणपाक लागल्यात. सध्या स्मार्ट सीटी नेटान स्मार्ट जावपाक लागल्या, हें मात खरें. तो मेरेन लोकांक त्रास सोंसचो पडटलो. तो आनीक कितले म्हयने तें कळप कुस्तार. लोकांक, वेवसायिकांक मनस्ताप जावचो ना, अशे तरेन उदरगतीचीं कामां करप शक्य ना काय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
