भांगरभूंय | प्रतिनिधी
पावसान राज्यभर घाल्लीं धुमशेणां उणीं जाल्यांत. पूण, बुडटी येवपाच्यो घडणुको अजून थांबूंक नात. आयज पसून साबार रस्त्यांचेर उदक सांठून उरिल्लें. तातूंतल्यान वाट काडटना गाडयेकारांक नाका पुरो जालें. न्हंयबाग- पोरस्कड्यां म्हामार्गाचेर पालसणां कोसळ्ळीं. पणजेय कांय कडेन उदक तुंबलें. मात आयताराची खरसाण ताका नाशिल्ली. पावस पडलो काय सैमीक संकश्टां कित्याक धांवून येतात, ताचेर पालिका, पंचायती, विवीध सरकारी खात्यांनी जाणकारांचे मजतीन उपाय येवजण्यो करपाक जाय. सैमाक नाकांत दावें घालून आमी ताचेर नियंत्रण मेळोवपा इतले अजून तरी बुदवंत जावंक नात. फुडाराकूय सैमाक माणसाळावप शक्य जायतशें दिसना. तरीय ताच्या सांवारा पसून आमी स्वताक, मालमत्तेक कशे वाटावंक शकतले, ताचो विचार करूंक जाय.
गिरी- म्हापशें पुलाचेर उदक तुंबलां आनी गाडयो तातूंतल्यान नेटान वतात तो व्हिडियो व्हायरल जाला. हें उदक कित्याक सांठून उरलां? जाप सोंपी. पुला वयल्या रस्त्याचें बांदप नीट जावंक ना. मदी खोलाय आसा, देखून उदक व्हांवून वचना. उदक वचपाच्यो वाटोय मातयेंत पुरवल्या आसतल्यो. हाका जापसालदार कोण? काॅण्ट्रेक्टर, तो बांदपी आनी पूल पास करपी अभियंते. सरकारान आतां तांचे कडल्यान पुला वयलो रस्तो सारको करून घेवंक नाका? ताची देखभाल करपीय तितलेच जबाबदार. आयतारा आयला तसलो पावस पयलेच खेप येवंक ना. हाचेय पयलीं तीन- तीन दीस उटंगाराचो पावस पडला. कांय वर्सां पयलीं पुराय गोंयांत हाहाकार जाल्लो. सत्तरींत घरां कोसळिल्लीं. ताचे पयलीं आॅक्टोबर 2009 त काणकोणां ढगफुटी जाल्ली. खूब लुकसाण जाल्लें. ह्यो घडणुको वेगळ्यो. पूण पावसाच्या दिसांनी हुंवार येवन घरांनी उदक घुसप, ही वर्सुकी गजाल. हालींच्या वर्सांनी केन्ना उदक येवंक नाशिल्लें थंय तें येता. पयर पसून कांय कडेन पयलेच खेपे उदक आयिल्ल्याचें लोकांनी सांगलां. म्हणटकच थळावे पंचायतीक, पालिकेक हें कित्याक जालें, तें कळपाक जाय. ताचे फाटलीं कारणां सोदून तांणी उपाय घेवपाक जाय. गाडयो वाडल्यात म्हणून ट्रॅफीक जाम जाता, अशें पुलीस सांगतात, तशे पावस चड पडटा म्हणटकच बुडटी येता, असलीं कारणां कोणें सांगचीं न्हय.
पयलीं राजधानी पणजी शारांत थारावीक जाग्यांचेर उदक भरतालें, दुकानांनी वतालें. मात आतां थारावीक जागेच उदकाविणे आसतात. पळयत थंय उदक. व्हेनीस शारांत पसून आसचें ना, इतलें उदक पणजे भरता. स्मार्ट सिटी जातकच ही समस्या सासणाची ना जातली, अश्यो बढायो मारपी आतां खंयच्या भाटल्यांत, मळ्यांत लिपल्यात? उदकाक वचपाक, जिरपाक जागोच ना, म्हणटकच तें वराचीं वरां सांठून उरता. कला अकादमी ही गोंयचें भूषण आशिल्ली. तिचे विशीं केन्ना कागाळी आयकूंक येनाशिल्ल्यो. मात, ती दुरुस्तेक घेतली आनी टिकेची धनी थारली. तिची भलायकी आदले वरीं उरूंक ना. सल्लागार वांयगणे तज्ञ बी नात मूं? माचये संबंदी सुविधा सारक्यो नात, प्रेक्षकांचेर एसीच्या उदकाचो अभिषेक जाता, कलाकारांक स्वताचें सामान हाडून कार्यावळ करची पडटा…. मेळटा तो कागाळी करपाक लागला. पयर पडिल्ल्या पावसांत पसून भितर उदक गेल्लें. तें काडटनाचे व्हिडियो प्रसिद्ध जाल्यात. करपाक गेलो xxx, पूण जालो xxx, असली सध्या तिची गत जाल्या. फुडाराक कला अकादमी भलत्याच जाग्यार वचूं येता वा सध्या आसा ती पुराय मातये भरवण करून नवीच बांदुया, असो सल्लोय कोण वायंगणो जाणकार दिवंक शकता. कोणाचें कांय सांगपाक येना.
गोंयांत जायते कडेन दोंगराच्या मुळसांत, धडेर घरां आसात. पावसाचे दीस तांचे खातीर भिरांकूळ. ह्या लोकांचें सुरक्षीत जाग्यार पुनर्वसन करप शक्य आसा जाल्यार सरकारान पळोवपाक जाय. दर पावसांत हुंवाराचो त्रास जावपी कांय सखल वाठार आसात. तांचेरूय उपाय जाय. न्हंयो खोलावपाक जाय. राखणे वण्टी बांदपाक जाय. सांखळे दीसभर पावस पडलो काय हुंवार येतालो. वर्साक 2- 3 फावटी तरी बाजारांत दुकानां आशिल्ल्यांचे हाल जाताले. मात थंय व्हडली राखणे वणत (कशी बांदल्या ती पेडण्यां दोंगर कापून रस्तो करपी काॅण्ट्रेक्टरान वचून पळोवची.) बांदीत सावन बाजारपेठेंत उदक घुसना. घुसलेंच जाल्यार तें परतून न्हंयेंत रकोवपाक पंप बसयल्यात. लायटीचे ट्रान्स्फाॅर्मर बांदल्यात थंय पावसांत बुडटी येता. दुर्घटना जायत म्हूण उदक तेंकलें काय लायट बंद दवरची पडटा. हें ट्रान्स्फाॅर्मर दुसरे कडेन व्हरूंक फावो. बुडटे वेळार उदक जिरपाक जागो जाय. थंय घरां, प्रकल्प उबे जाले काय उदक वतलें खंय? उदरगत जाय आनी सैमूय. ताका किंकोत करून उदरगत केली जाल्यार कितें जाता, ताचो अणभव आमी दर पावसांत घेतात. आतां तरी शाणे जावया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
