उदरगती खातीर लोकांचो आदार म्हत्वाचो

भांगरभूंय | प्रतिनिधी

निलेश काब्रालः शेल्ड्यां मिनी स्पोर्ट्स एरिनाचें उक्तावण

भांगरभूंय । प्रतिनिधी

सांगें: मुख्यमंत्री डॉ. प्रमोद सावंत हांच्या सपनांतलें स्वयंपूर्ण गोंय साकार करपाक आमी एकवटान आदार केलो जाल्यारूच तें सहज शक्य आसा. उदरगती खातीर लोकांचो आदार म्हत्वाचो आसता, अशें आमदार निलेश काब्राल हांणी सांगलें.

कुडचडें मतदारसंघांतल्या घणेमरड शेल्ड्यां हॉलिबॉल, फुटबॉल, बॅडमिंटन आनी क्रिकेट अशे चार खेळ एकाच वांगडा खेळपाची बरी संद गांवच्या लोकांक मेळ्ळ्या. गांवच्या तरणाट्यां खातीर आगळी वेगळी संकल्पना जिल्हो पंचायत फंडांतल्यान जिल्हो पंचायत वांगडी सिद्धार्थ गांवस देसाय हांचे संकल्पनेंतल्यान तयार केल्ल्या मिनी स्पोर्ट्स एरिनाचें उक्तावण आमदार काब्राल हांचे हस्तुकीं जालें. ह्या वेळार ते उलयताले. तांचे वांगडा दक्षीण गोंय जिल्हो पंचायत अध्यक्ष सुवर्णा तेंडुलकार, जिल्हो पंचायत वांगडी सिद्धार्थ गांवस देसाय, शेल्डेंची सरपंच कविता गांवस देसाय, उपसरपंच, पंच, अवेडे सरपंच, पंच आनी हेर मानेस्त हाजीर आशिल्ले.

ह्या मिनी स्पोर्ट्स एरिनाचो गांवच्या लोकांनी बरे तरेन उपेग करचो आनी आपले वांगडाच गोंयचें नांव वयर काडचें. ह्या मिनी स्पोर्ट्स एरनाचो पयलो पांवडो पुराय जाला. दुसरो पांवडो 30- 35 लाख रुपया खर्च करून बेगिनूच पुराय करतले, अशी हमी आमदार काब्राल हांणी दिली. तशेंच सिद्धार्थ गांवस देसाय हांकां परबीं दिलीं.

सुवर्णा तेंडुलकार हांणी सांगलें, जिल्हो पंचायतीचो फंड जरी उणो आसलो तरीय बरे प्रकल्प उबारपाचो आमी यत्न करतात. आमदाराच्या माध्यमांतल्यान कुडचडें मतदारसंघांत उदरगत पळोवपाक मेळटा. आमदार, जिल्हो पंचायत वांगडी, सरपंच, पंच हे जेन्ना सगळें एकवटान काम करतात, तेन्नाच मतदारसंघाची उदरगत जाताच जाता.

सिद्धार्थ गांवस देसाय हांणी सांगलें, गांवांत भुरग्यांक खेळपा खातीर सुवात नाशिल्ली. ते खातीर चार खेळ वांगडाच खेळपाक मेळटले, अश्या मिनी स्पोर्ट्स एरिनाची संकल्पना सुचली. जिल्हो पंचायत फंडांतल्यान हो मिनी स्पोर्ट्स एरिना तयार जाला. हाचो तरणाट्यांनी योग्य वापर करचो. उरिल्लें काम आमदार आनी जिल्हो पंचायत फंडांतल्यान पुराय करतले, अशें देसाय हांणी सांगलें. सरपंच कविता गांवस देसाय हांणी येवकार दिलो. सर्वानंद सावंत देसाय हांणी सुत्रसंचालन केलें आनी उपकार मानले.