उदरगतीच्या कामांचो अहवाल दर पंद्रशेंत दियात

भांगरभूंय | प्रतिनिधी

प्रवीण आर्लेकारः पेडणें पालिका मंडळाचे बसकेंत साबार विशयांचेर चर्चा, निर्णय

भांगरभूंय । प्रतिनिधी

पेडणें: पेडणें पालिकेच्या उदरगतीच्या कामाचेर पेडणें पालिकेच्या दोन अभियंत्यांनी नदर दवरून त्या कामाचो अबवाल आपल्याक दर 15 दिसांनी सादर करचो. ते वरवीं हातांत घेतिल्लीं उदरगतीचीं कामां योग्य पद्दतीन जातात काय ना, ताची म्हायती मेळटली. ते खातीर पेडणें पालिकेच्या दोनूय अभियंत्यांनी जीं जीं उदरगतीचीं कामां सुरू आसात त्या कामाची थंय वचून पळोवणी करून कामाचो नियाळ घेवचो, अशें नियुक्त वांगडी आमदार प्रवीण आर्लेकार हांणी सांगलें.

नगराध्यक्ष माधव सिनाय देसाय हांचे अध्यक्षते खाला पेडणें पालिकेची बसका जाली. ह्या वेळार पेडणें मतदारसंघाचे नियुक्त वांगडी म्हूण आमदार आर्लेकार उलयताले. ह्या वेळार उपनगराध्यक्ष तृप्ती सावळ देसाय, पालिका मुख्याधिकारी अनील राणे सरदेसाय, पालिका मुख्याधिकारी विष्णू साळगांवकार, नगरसेवक मनोज हरमलकार, नगरसेवक सिद्धेश पेडणेंकार, नगरसेवक शिवराम तुकोजी, नगरसेविका उषा नागवेंकार, नगरसेविका राखी कलशांवकार, नगरसेविका आश्विनी पालयेंकार, नगरसेविका विशाखा गडेकार तशेंच अभियंते थॉमस ब्रागांझा हाजीर आशिल्ले.

हे बसकेंत विवीध विशयांचेर चर्चा जाली. पेडणें पालिकेची नवी बांदपा आशिल्ले इमारतीचें काम कशे पद्दतीन चल्लां ताची पळोवणी करची, तशेंच तें काम योग्य पद्दतीन चल्ला काय ना, तेंवूय पळोवचें, अशी सुचोवणी आमदार आर्लेकार हांणी केली.

विवीध तरांचे कर पालिकेक मेळटात. तातूंत वेवसायीक कर आनी हेर करांचो हिशेब घेवन तशेंच ते कर वाडोवपा संबंदांतूय पालिका बसकेंत चर्चा जाली. घरपटी आनी हेर कर जे अजून मेरेन भरूंक नात, ताचीय वसुली करची, जे वरवीं पालिकेचो महसूल वाडटलो. ते खातीर पालिका मंडळ आनी अधिकाऱ्यांनी योग्य तीं पावलां उखलून काम करचें, अशेंय आमदार आर्लेकार हांणी सांगलें.

पेडणें पालिकचो कोयर प्रकल्प माळरानाचेर पठाराचेर आसा. त्या कोयर प्रकल्पाची फुडली प्रक्रिया खंय पावल्या ताची पालिका मंडळान आमदारा वांगडा त्या कोयर प्रकल्पाक बुधवारा भेट दिवची, अशें हे बसकेंत थारलें.

पेडणें पालिका वाठारांत उदरगतीच्या कामाक सुरवात करतात तेन्ना आयज मेरेन एकाय वेळार भौशीक बांदकाम खात्याचे नियुक्त अभियंते चंद्रकांत पर्येंकार तशेंच पालिकेचे अभियंते थॉमस ब्रागांझा हाजीर कित्याक रावनात, असो प्रस्न आमदार आर्लेकार हांणी उपस्थीत केलो आनी तीं उदरगतीचीं कामा आराखड्या प्रमाण जातात काय नात, असो दुबाव उक्तायलो. फुडले खेपे उदरगतीच्या कामाक सुरवात करतना आपल्याक ते दोनूय अभियंते थंय जाय. ह्या कामां विशीं लोकांच्या मनांत दुबाव आसात. ताचीं बिलां कशीं दितात, काम योग्य तरेन जाला काय ना, ताची ह्या अभियंत्यांनी पळोवणी करप गरजेचें आसा, अशें तांणी सांगलें.

ना हरकत दाखले आनी हेर सुविधा प्रमाणपत्रां दिवपा खातीर पालिका कर्मचारी कामचुकारपणा करतात. ताका लागून लोकांक गरजे भायर फावटी मारच्यो पडटात, अश्यो खबरो कानार पावल्यात. लोकांचीं कामां वेळार करून दियात, अशें आमदार आर्लेकार हांणी बसकेंत सांगलें.

गटार वेवस्था, तशेंच रस्त्या कुशीच्यो झिली मारपाक खूब उणो निधी मेळटा, अशें नगराध्यक्षान सांगलें. ह्या कामां खातीर दोन लाख रुपया मेळटात. हो निधी वाडोवन दिवचो, अशी मागणी करून लेगीत तो मेळना, अशें थॉमस ब्रागांझा हांणी सांगलें. अंदूं हो निधी वाडोवन घेवचे खातीर पत्रवेव्हार करचो. तो निधी धावूय प्रभागांक समान वांटून दितले, अशें विष्णू साळगांवकार हांणी सांगलें.

हे बसकेंत पालिकेची नवी इमारत प्रकल्प, पालिकेच्या गाडेधारकांचो कर, पालिका वाठारांतले पोरणे वीज खांबे, विजेचीं हेर उपकरणां आनी हेर विशयांचेर चर्चा जाली. नगराध्यक्ष माधव सिनाय देसाय हांणी येवकार दिलो. उपनगराध्यक्ष तृप्ती सावळ देसाय आनी उपकार मानले.

थळाव्या लोकांक आडमेळीं नाकातः आमदार

खूब जाणांनी ल्हान व्हड वेवसाय सुरू करचे खातीर खूब अर्ज आयल्यात, तांकां आडमेळीं हाडूं नाकात. जे थळावे बेरोजगार करपाक इत्सूक आसात, तांच्यो समस्या आयकून घेयात आनी त्यो सोडोवचे खातीर तांकां मार्गदर्शन करात. तांचीं कामां ताकतिकेन हाता वेगळीं करात, अशें आमदार प्रवीण आर्लेकार हांणी सांगलें.

बिलां आपूण पळयनाः थ़ॉमस ब्रागांझा

उदरगतीच्या कामांचीं बिलां आनी पळोवणी आपूण करिना. हें काम चंद्रकांत पार्सेकार करता. दर पंदरा दिसांनी दरेका उदरगतीच्या कामाचो अहवाल सादर करपाची आपल्याक आमदार प्रवीण आर्लेकार हांणी बसकेंत सुचोवणी केल्या. कामां योग्य पद्दतीन जावचीं हे खातीर पालिका मंडळान त्या कामांचेर नदर दवरची, अशेंय आमदारान सांगिल्ल्याचें, पालिकेचे अभियंते थॉमस ब्रागांझा हांणी सांगलें.