भांगरभूंय | प्रतिनिधी
मॅल्कम एक्स म्हणटाले “शिक्षण हो आमचो फुडाराचो पासपोर्ट, कारण फाल्यां खातीर आयज ताची तयारी करपी लोकांचो.”
खरेंच हें म्हणणें लागता आमच्या गोंयचे पयले मुख्यमंत्री दयानंद बांदोडकार हांकां. तांकां सन्मानान लोक ‘भाऊसायब’ म्हणटाले. तांणी सदांच फुडार येवजून आयचीं धोरणां घट केलीं. गांवचे उदरगतीची बुन्याद घालपाची जापसालदारकी लोकांनी तांच्या भुजांचेर सोंपयली आनी भाऊन आपली योग्यताय पटोवन दिली. उदरगतीचो खरो बुन्यादी खांबो म्हळ्यार भाऊ. भोवजन समाजाचो फुडारी आनी कैवारी अशी तांची वळख आशिल्ली.
भाऊसायब खऱ्या अर्थान गोंयचे शिल्पकार आशिल्ले. आयज गोयांत जो कितें आधुनिक विकास दिसता तो भाऊन घालून दिल्या मुळाव्या साधन सुविधांच्या आदाराचेर उबो आसा. त्या वेळार राज्यांतल्या साबार म्हालांतल्या कष्टकरी समाजाक मजतीचो हात दिलो, तेच खातीर हांगचो भोवजन समाज मानान जगता. कला, शिक्षण तशेंच खेळा क्षेत्रांत तांणी खूप वावर केल्लो आसा. भाऊसायब बांदोडकार हांणी दडपशायेच्या चेपणा खाला आशिल्ल्या लोकांक बरें शिक्षण मेळचें म्हूण शिक्षणाचो थर उबारपा खातीर वावर केलो. सगळ्या समाजांक शिक्षणाची समान संद तांणी सुनिश्चीत केली. भोवजन समाजाक शिक्षणाची हमी दिवपा खातीर बांदोडकार हांणी वावर केलो.
दयानंद बांदोडकार हें नांव तेन्ना नवें आशिल्लें. पयले मुख्यमंत्री म्हणून सोंपेपणी तांकां येवकार मेळ्ळो ना. हिंदू धर्माच्या सभावा प्रमाण जाती वयल्यान आनी शिक्षणा वयल्यान कुचित्रीपणाची नदर तांकां चुकली ना. तांची पयसुल्ली नदर, येवजणी चालीक लावपाची तांची कल्पकताय खंयच्याय शिकिल्ल्या मनश्याक लजेक घालपा सारकी आशिल्ली.
आयज गोंय हें भारतांतलें एक उत्कृश्ट, सोबीत आनी आवडीचें पर्यटन थळ जाला. सोबीत दर्यादेग, सुखद हवामान, रातचें जिवीत, मनभुलोवपी दर्यांतले खाण, उदकांतल्यो रोमांचक कार्यावळी आनी हेर गजालींचें स्रय दयानंद बालकृष्ण बांदोडकार हांकां वता. तांणी नेटान भूंयसुदारणा घडोवन हाडली. शिक्षणाच्या सार्वत्रिकीकरणाक सगळ्यांत चड प्राधान्य दिलें आनी ताका लागून नव्या गोंयची बुन्याद घाली. तांणी शाळा बांदपाक सुरवात केली आनी शिक्षणीक मळार क्रांती करपाची जिद्द मनार बाळगिली. ताच्या काळांत गोंयांत उद्देग, पर्यटन, शेती, शिंपणावळ, रस्ते, पुल आनी हेर जायत्या मळार सगळ्या वटांनी उदरगत जाल्ली.
भाऊ बांदोडकार मुख्यमंत्री आसतना तांणी मुळाव्या शिक्षणाक प्राधान्य दिल्लें. शाळांचें जाळें तयार केलें, ताका लागून तळागाळांतले लोक लेगीत शिकले. आतां राज्यभर फाटल्या पन्नास वर्सांच्या काळांत शिक्षणीक संस्थांचें बरें जाळें आसा. चडश्या गोंयकारांचे आवय- बापूय पारंपरीक वेवसायांत आशिल्ल्यान कोणाकूच नोकरी मेळोवपाची आकांक्षा नाशिल्ली. आतां शिक्षणाक लागून राज्यांत नोकऱ्यांची व्हड मागणी आसा. हो सगळो भाऊच्या वावराचो आशीर्वाद म्हणपाचो.
भाऊ चड शिकुंक नाशिल्ले, पूण मुख्यमंत्री म्हणून आपली जापसालदारकी खंयच उणी पडूंक दिली ना. तांची पयसुल्ली नदर, येवजणी चालीक लावपाची तांची कल्पकताय खंयच्याय शिकिल्ले मनश्याक लजेक घालपा सारकी आशिल्ली. गोंयच्या समाजीक एकचाराक खंयच बादा येवची न्हय हाची जतनाय घेवन तांणी आपले काम बरे तरेन सांबाळ्ळें.
शिक्षणाचो हक्क हो समाजाचे उदरगतीचो पयलो पांवडो जावन आसा आनी भारतीय समाजान सकयल्या जातीच्या लोकांक शिक्षणा सावन कशे पयस दवरिल्ले हें भाऊन स्वता भोगिल्लें. तांणी गोंयच्या प्रत्येक गांवगिऱ्या वाठारांनी मुळाव्यो शाळा सुरू केल्यो. ज्या गावांनी माध्यमिक शाळांची सोय नाशिल्ली त्या गावांनी सरकारी स्कूलां उगती केलीं. तरणाट्याच्या रगताची गरज ओळखून मुखेल शारांनी कॉलेजां सुरु केली. उद्देगपतींक तीं सुरू करपाक उर्बा दिली. पुर्तुगेज राजवटींतल्या मेडिकल कॉलेजीचो पांवडो वयर काडपाक खाशेले लक्ष दिलें. तें आज भारतांतले एक नामनेचे मेडिकल कॉलेज म्हूण वळखतात. सरकारी पांवड्यार इंजिनिअरींग कॉलेज सुरू केली. संबंद भारत देशान देख घेवपा सारकें गोंयात शिक्षणाच्या सुविधांचे जाळे निर्माण जालें . ताची बुन्याद भाऊन घाली. घरा लागीं उच्च शिक्षणाच्यो सुविधा आशिल्यान आमचे सारके उणें उत्पन्न आशिल्ले आनी बहुजन समाजाचे लोक शिकपाक पावले. दोतोर जाले, इंजिनेर जाले,आदोगाद आनी प्रोफेसर जाले. आमदार, मामलेदार, अधिकारी जाले. गोंयच्या एस. सी. एस. टी. आनी बहुजन समाजाची संमेलनां जातात. व्हड आवाजान आनी सडेतोड भाशेंत ते आपले विचार आनी संवेदना मांडू शकले. शिक्षणान तांकां तांच्या अधिकारांची जाणविकाय करून दिल्ल्या. बहुजन समाजान नवे पिळगेक भाऊच्या प्रामाणिकपणा विशीं जाणविकाय करून दिवपाक जाय.
फकत शिक्षणाची तजवीज करून भागनाशिल्लें. शिक्षणाचो उपभोग घेवपाक आनी नोकऱ्यो निर्माण करपाक जाय ही जाणविकाय दवरून भाऊन तीन व्हड कारखाने गोंयांत हाडले. आयजय ते गोंयच्या उदरगतीक आनी देशाच्या अर्थकारणाक हातभार लायतात. त्या उपरांत खंयच्याच राजवटीक तसो उद्योग हाडपाक शक्य जालें ना. खऱ्या अर्थान भाऊन गोंयांक एक वेगळी वळख दिली आनी उदरगतीच्या पावलार पावल दवरून चलपाक शिकयलें. भाऊसायबांक मना काळजा सावन आर्गां.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
