भांगरभूंय | प्रतिनिधी
उदरगतीचें धोरण हें मुखेलपणान तीन पांवड्यांचेर विचारांत घेतात. एक म्हणल्यार अर्थवेवस्थेक गती दिवप, दुसरो – उद्देग विस्तारा खातीर बुन्यादी सुविधांची निर्मणी करप आनी तिसरो पांवडो – सामान्य मनशाक रोजगारा वांगडाच हेर वेवसायीक संद मेळोवन दिवप. दुर्दैवान ह्या तिनूय हेतूं वा पांवड्यां विशीं समन्वयाचें धोरण नाशिल्ल्यान बरेच खेपे उदरगतीचो प्रवास हो एकतर्फी जायत रावता वा जाका वन वे ट्रॅफिक म्हणपाक मेळटलें ते प्रमाण जाता.
सामान्य मनशाच्या हिताक थंय लागीं- लागीं ‘नो एन्ट्री’ आशिल्ले सारकी दिसता. दूरदिश्टी आशिल्लें 50 ते 100 वर्सांचें उद्दिश्ट मुखार दवरून उदरगतीचें व्यापक नियोजन हें आमच्या देशांत अस्तित्वातूंच ना. आमच्या विकासाचें नियोजनूय चडांत चड पांच वर्सुकी येवजण्यां मेरेनूच मर्यादीत आसता. बाकी खंयच्याच विकास कामां विशीं आयज कोणूच शंबर वर्सांची हमी दिवपाक शकनात वा अशा विकासांतल्यान सामान्य मनशाक वर्साचीं वर्सां थेट फायदो जायत रावतलो, हेंय सांगपाक शकनात. उद्देग, वेवसाय, रोजगार आनी बुन्यादी सुविधा हांचो कसलोच समन्वय नाशिल्ल्यान उदरगतीचो हो एकतर्फी प्रवास जायत रावता आनी असो वेन वे ट्रॅफिक आसलो काय उशीर हो थारिल्लो आसता.
‘राजकी फुडारी उलयतात, तशे करीनात अशी लोकांची भावना आसा. ताका लागून फुडाऱ्यांचे विस्वासार्हतेंत उणाव जाला. लोकांक मुर्ख करप सामकें सोंपें, पूण विस्वास मेळोवप आयज कठीण जालां.’ हीं म्हजीं उतरां न्हय, तर भाजपाचे फुडारी, केंद्रीय मंत्री नितीन गडकरी हांचीं.
पावसाक लागून न्हय…
बोगस आनी टक्केवारीच्या कामांक लागून हालींच पडिल्ल्या पावसान स्मार्ट सिटींतले रस्ते बुडयले. तातूंत फोंडकुलांचें राज्य आशिल्ल्यान लोकांक, स्कूटर चलोवपी लोकांक त्रास जाले. अशे पद्दतीन हें काम जालां, तें मुखेलपणान टक्केवारी, कमिशन, गटारांतल्या हातसफायेक आनी भ्रश्ट प्रशासनाक लागून. ताचो पावसा कडेन तसो मात्तूय संबंद ना. शारांत हुंवार येता तें पाप मनशांचें, पावसाचें न्हय. पणजे शाराक आतां ‘फोंडकुलांचें शार’ अशें नांव पडलां. सगलेच जाण तशे उलयतना आयकूंक येता. शाण्या मनशाक चड सांगपाक नाका.
गजानन भाटकार
आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
