भांगरभूंय | प्रतिनिधी
मुख्यमंत्रीः सुर्ला नव्या सांकवाचें उक्तावण; 70 लाख रुपया खर्च, अडेज म्हयन्यांत काम पुराय
भांगरभूंय । प्रतिनिधी
दिवचलः सरकार सगळ्याच मळांचेर उदरगतीक चालना दिता. गांवचे उदरगतीक आडखळ हाडून खो दिवपाची प्रवृत्ती घातक आसा. उदरगतीक विरोध करूं नाकात. सरकार दरेका घटकाच्यो, गांवचे उदरगतीच्यो येवजण्यो चालीक लायता. मुळाव्यो सुविधा आनी मानवी उदरगत हो आमचो संकल्प आसा, अशें मुख्यमंत्री डॉ. प्रमोद सावंत हांणी सांगलें.
सांखळी मतदारसंघांतल्या सुर्ला वाठारांतल्या मुख्य रस्त्या वयलो पोरणो सांकव मोडून ते सुवातेचेर 70 लाख रुपया खर्च करून लांब आनी रूंग नवो सांकव बांदला. दोन म्हयन्यांत पुराय केल्ल्या सांकवाचें मुख्यमंत्री डॉ. प्रमोद सावंत हांचे हस्तुकीं जालें. ह्या वेळार ते उलयताले.
ह्या वेळार तांचे वांगडा सरपंच विश्रांती सुर्लकार, जिल्हो पंचायत वांगडी गोपाळ सुर्लकार, भोला खोडगिणकार, दिनेश मडकयकार, साईश गावडे, सुचिता गांवकार, शानू सुर्लकार, कंत्राटदार अॅलेक्स फर्नांडीस, अभियंते गौरेश फुलारी आनी हेर मानेस्त हाजीर आशिल्ले.
सुर्ला सारकिल्ल्या गांवगिऱ्या पंचायत विभागांत फाटल्या 10 वर्सांत 100 कोटींचे उदरगत येवजण्यांक चालना दिल्या. अजुनूय कांय प्रकल्प पुराय करतले. 50 वर्सांत जावंक तितली उदगरत 10 वर्सांत केल्या. आत्मनिर्भर स्वयंपूर्ण प्रकल्प हातांत घेतना शेती, बागायती, रस्ते, वीज, उदक, रोजगार अश्या सगळ्या मळांचेर व्हड येस मेळयलां. इतली उदरगत करून लेगीत कांय घटक विरोध करतात, खो घालतात. ही प्रवृत्ती खुबूच घातक आसा. सगळ्यांनी उदरगतीचे प्रक्रियेंत आदार करचो, असो उलो मुख्यमंत्री डॉ. सावंत हांणी मारलो. तशेंच फक्त अडेज म्हयन्यांत हो सांकव उबारिल्ले खातीर कंत्राटदार, अभियंते हांकां तांणी परबीं दिली.
मुख्यमंत्री दीसरात लोकांची सेवा करतात. मतदारसंघांत आनी पुराय गोंयांत तांणी क्रांतिकारी येवजण्यो चालीक लायल्यात. गांवचे उदरगतींत मुख्यमंत्र्यांचें व्हड योगदान आसा. तांणी गांवांतली खुबशीं कामां पुराय केल्यांत. उदरगतीक आडखळ हाडिनासतना सगळ्यांनी मुख्यमंत्री डॉ. सावंत हांकां आदार दिवचो, अशें गोपाळ सुर्लकार हांणी सांगलें.
मुख्यमंत्री डॉ. सावंत हांचे हस्तुकीं नांवतकट्याचें अनावरण करून तशेंच फीत कापून सांकवाचें उक्तावण केलें.
ह्या वेळार व्हड संख्येन गांवचे लोक हाजीर राविल्ले.
सांकवाचेरूच भरलो जनता दरबार
मुख्यमंत्री डॉ. प्रमोद सावंत तीन दीस गोंया भायर आशिल्ले. 18 डिसेंबराक राती ते मोपा विमातळाचेर पावले. तशेंच थेट सुर्ला वचून तांणी सांकवाचें उक्तावण केलें. ह्या वेळार हाजीर आशिल्ल्या सुमार 300 लोकांक सांकवाचेरूच कदेलां घालून बसयले आनी तांचीं गाराणीं, समस्या आयकून घेतल्यो. राती उसरां मेरेन तांणी लोकांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
