उदरगतीक गती मेळची

भांगरभूंय | प्रतिनिधी

विकासाचीं चडशीं फळां नीज गोंयकारांकूच मेळचीं. उदरगतीची गती वाडल्यार हें शक्य आसा.

मुळाव्यो गरजो पुराय जायत, जाल्यार लोकांची वैयक्तीक उदरगत करपाची गरज नासता. कारण ते स्वताच स्वताची उदरगत करतात. येरादारी, उदक, वीज, भलायकी, रोजगार आनी उणें कर आसल्यार ते सर्वांगी उदरगतीक ‘गती’ मेळटा. मुख्यमंत्री डाॅ. प्रमोद सावंत हांणी विधानसभेंत सादर केल्लो अर्थसंकल्प ते दिकेन पावलां मारता. घोशणा जाली, आतां कृती. फुडलें वर्सभर सगले उमळशिकेन वाट पळयतले. हो इंतजार बेगीन सोंपचो आनी अर्थसंकल्पांतल्यो सगल्यो तरतुदी मार्गाक लागच्यो, गोंय आनीक विकसीत जावचें. विकसीत गोंयची मोख 2037 मेरेन पुराय करपाचें थारायलां, ही बरी गजाल. ह्या काळांत हांगाचो सैम परतून फुलचो, फळचो. सैम पळोवपाक आदल्या तेंपा प्रमाण पर्यटकांनी घिट्टी घालच्यो. अर्थांत सैम म्हणल्यार सैमीक रितीन निर्माण जाल्ली सोबीतकाय. कृत्रिम न्हय.
डिजिटला वरवीं सादर जाल्लो हो पयलो अर्थसंकल्प. कागदाचो उण्यांत उणो वापर जाल्यार ताचो पर्यावरणाक फायदोच जातलो. सगल्यांच्या हातांत मोबायल फोन, इंटरनॅट येवप म्हणल्यार डिजिटल क्रांती न्हय. तर ताचो योग्य वापर जावंक जाय, नॅटवर्क सारकें जाय, डेटाचें मोल परवडपा सारकें जाय. सगलीं सरकारी बिलां, कामां आॅनलायन करपाचो यत्न चल्ला. ताकाय गती मेळची. शाळां पसून ही सुरवात जावची. सरकारी शाळा, माध्यमीक विद्यालयांक लॅपटाॅप दिवपाचें थारलां. विद्यार्थ्यांक पयलीं लॅपटाॅप दिल्ले. लॅपटाॅपांचो वापर अभ्यासा खातीर, असायन्मेंट पूर्ण करपा खातीर जावचो. सिनेमा, पदां, सोशल मिडिया वयले व्हिडियो पळोवपाक न्हय. सगल्या भुरग्यांक ते वापरपाक दिवंक जाय. ‘आमकां कोण हात लावपाक दिनात’ अशी निमतां हाचे मुखार नाकात!! समाजकल्याण खात्याच्यो 21 येवजण्यो डिजिटल करतले. लोकांचो चड संबंद येता, अश्या कार्यालयांचीं म्हत्वाचीं कामांय आॅनलायन जावचीं. ताका लागून भ्रश्टाचाराचेर नियंत्रण येतलें. मनीसबळ, वेळ वाटावतलो. कारण फुडलें यूग हें डिजिटलाचें, हें घट मतींत दवरून कामाक लागचें पडटलें.
सरकारी कामांत कोंकणीचो वापर वाडोवपाक समिती स्थापन करतले. ती अर्ज, पत्रवेव्हार कोंकणींतल्यान जनते मेरेन पावोवपाचें काम करतली. जांकां शुद्ध कोंकणी येता, अश्या उमेदवारांकूच कोंकणीच्या वापराचें काम दिल्यार, बुन्यादी पसून कोंकणीचें काम ल्हवू ल्हवू कळसा मेरेन वचत रावतलें. आतां एखादेंच संचालनालय, विभाग तें काम करता. दरेका खात्यांत कोंकणी बरोवपी जाय. कोंकणी भौसानूय आवयभास फुलपाक फुल ना फुलाची पाकळी दिवची. म्हणल्यार तांणी कोंकणींतल्यान वेव्हार करचे. गांवांगांवांनी कोंकणी माध्यमांतल्यो पयली ते चवथी यत्तांच्यो शाळा सुरू जाल्यार ह्या राजभास वापराच्या कामाक बळगें मेळटलें.
राजकारण हो उदरगतीक गती दिवपाचो बरो मार्ग. वेवसाय म्हणूनय तातूंत करियर करूं येता. पूण राजकारण करपी प्रामाणीक, पारदर्शक आनी समाजकारणाचें पिशें लागिल्लो जाय. सरपंच पदाचेर रावन पसून गांवाचें रंगरुप बदलपी फुडारी भारतांत आसात. पंच, सरपंचांचें मानधन वाडोवपाचो निर्णय सरकारान घेतला. मात तांणी पूर्णवेळ वा निदान दिसांतल्यान चार वरां तरी पंचायतींत बसपाक जाय. मंत्र्याच्या केबिना भायर पळयत तेन्ना फायली घेवन लोक दिश्टी पडटात, तशी पंचायतींनी लोकांची रिग लागची. अर्थांत पंचायतीं, पालिकांक तसो उदगती खातीर निधी, अधिकारूय मेळचे. सगल्या पंचायतींचो कारभार ह्या वर्स अखेर मेरेन आॅनलायन जावचो. वांगडा कोयर विलो प्रकल्प, रस्ताद सुणीं, गोरवां दवरपाक जागेय निर्माण जावचे.
अंदूंचो हो अर्थसंकल्प 28,162 कोटींचो. भौशीक कामां खातीर निधी जायच पडटा. पयशांचें संवग हाडपाक मेळना. अर्थवेवस्था सध्या कॅसिनो आनी पर्यटनाच्या धिगयांचेर उबी आसा. एका काळार खण वेवसाय आशिल्लो. तो परतून पुराय तांकीन सुरू जातलो, हे खातीर यत्न जावचे. गोंयकारांक मानवतले, अशे उद्देगूय राज्यांत तरतरपाक जाय. अर्थवेवस्थेक बुस्टर डोस दिवपी मार्ग मेकळे जाले जाल्यार सगल्यांचेरूच करांचें वजें आसा, तें इल्लें तरी ल्हव करपाक मेळटलें. रस्ते, उदक, विजे कडेन मुखेलपणान लक्ष जाय. हाॅटमिक्स केल्ले रस्ते खणपाक बंदी आसतली. पूण कोणाक तो खणचो पडलोच जाल्यार? तो आशिल्लो तसो गुळगुळीत करपाची जापसालदारकी कोणाची? सरकारी खातीं मात ‘आयज हांव, फाल्यां तूं, परवां तो’, अशें म्हणीत खणपाचें काम करतात, तें बंद जावचें. स्मार्ट सिटींत आयज ‘खण, खण माती’ चल्लां, तो प्रकार नाका. हाचे मुखार सगल्यां खणप्यांनी एकूच म्हूर्त धरचो.
कदंब बसी वीज, सिएनजीचेर चलोवपाचें थारलां. ताचेच वांगडा खाजगी बसी कित्याक उण्यो जाल्यात तेंय पळोवचें. कोरोना काळांतलो आनी आतांचो येरादारीचो वावर पळयल्यार हें कळटलें. खाजगी गाडयो वाडल्यात, ताका लागून अपघात जातात. हें चक्र बंद जावचें. ‘सब का साथ, सब का विकास, सब का विस्वास, सब का प्रयास’ हाचें उदाहरण निर्माण करपाक सगल्यांनी हात दिवचो, असो उलो सरकारान मारला. उदरगतीची गती वाडल्यार हें शक्य आसा. मात विकासाचीं चडशीं फळां नीज गोंयकारांकूच मेळचीं.