भांगरभूंय | प्रतिनिधी
विश्रांती सुर्लकारः सुर्लाचे ग्रामसभेंत विरोधकांक शिटकावणी
भांगरभूंय । प्रतिनिधी
दिवचलः लोकांचो विस्वास जिखून आमी वेंचून आयल्यात ते लोकांची सेवा करचे खातीर. हे खातीर लोकहिताच्या कसल्याय कामा खातीर आपूण आपले पंचायत मंडळ सदांच लोकां वांगडा आसतलें. गांवचे उदरगतींत कसलेंच राजकारण करिनासतना सगळ्यांक वांगडा घेवन काम करतले. गरजे भायर विरोध करपाक जाय म्हूण विरोध करूं नाकात. गांवच्या उदरगतीच्या कामांक आडखळ हाडिल्ली आपूण सोंसून घेवचीं ना. मुख्यमंत्री डॉ. प्रमोद सावंत हांच्या फुडारपणा खाला आमी गांवची उदरगत करतले, अशें सुर्लाची सरपंच विश्रांती सुर्लकार हांणी सांगलें.
दिवचल म्हालांतली सुर्ल पंचायतीची अंदूंची पयली ग्रामसभा खेळीमेळींत जाली. सरपंच सुर्लकार हांचे अध्यक्षते खाला जाल्ले हे सभेंत गांवांतलीं विवीध उदरगतीचीं कामां, मैदान, प्रदुशण, शेतकारांच्यो समस्या, आदले थाराव, बेरोजगारी, पावसाचें उदक, शेतांत वचपाक रस्तो, कोयर अशा साबार विशयांचेर चर्चा जाली.
सुर्लाच्या मेस्तवाड्या वयल्या घरां खातीर रस्तो बांदपाक पंचायत मंडळाक येस येवंक नाशिल्ल्यान थळाव्या लोकांनी ग्रामसभेंत नाराजी उक्तायली. संबंदीत जमीन धनयांक विस्वासांत घेवन सरकारान आमकां रस्तो करून दिवचो, अशी तांणी मागणी केली. ह्या संबंदांत आपूण पळोवणी करून निर्णय घेता, अशें सरपंचान सांगलें.
गांवांतलीं मैदानां कांय कारणां खातीर बंद आसात. ताका लागून भुरग्यांक खेळपा खातीर सुवातूच नाशिल्ल्यान खेळां मोगींनी नाराजी उक्तायली.
हे ग्रामसभेक उपसरपंच भोला खोडगीणकार, पंच साहिमा गावडे, दिनेश मडकयकार, सुभाष फोंडेंकार, शाणू सुर्लकार, सुचिता गांवकार हाजीर आशिल्ले. सरपंच सुर्लकार हांणी येवकार दिलो. सचीव महादेव नायक हांणी फाटलो अहवाल सादर केलो. सुचिता गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
