भांगरभूंय | प्रतिनिधी
ही धर्तरी, हवा, जमीन आनी उदक जाण्टेल्यांनी आमकां दायज म्हूण दिवंक ना. तें तांणी आमच्या भुरग्यां खातीर दिल्लें रीण. ह्या गिरेस्त दायजाचो आमी सांबाळ करून तें भुरग्यांच्या हातांत दिवंक जाय… हीं उतरां महात्मा गांधीजींचीं. पूण आमी ह्या धनाचो प्रामाणीकपणान सांबाळ करतात व्हय? आयज उदका खातीर आमकां वळवळे काडचे पडटात. मेळटा ताका मेळटा, उरिल्ले तानेल्लेच. उदक प्रदुशीत जायत आसा. काल मेणकुऱ्यां 10 एमएलडी उदक शुद्ध करपाच्या प्रकल्पाचो फातर बसयलो. 12 हजारां वयर लोकांक हाचो फायदो जातलो. शुद्धीकरण प्रकल्प जायच, कारण उदकास्रोत इबाडल्यात. पूण, ताचेकूय म्हत्वाचें म्हणल्यार उदक जिरोवपाचे, सांठोवपाचेय प्रकल्प, उपाय घेवपाक जाय. पूण, हुंवार येवचो ना, हाची जतनाय घेवन.
गोंय हें पर्यटन राज्य. म्हणटकच आमकां मेळटा तितलें उदक उणेंच. ताचो सांबाळून वापर करपाक नाका? सध्या उदका प्रकल्पां वरवीं राज्याक 560 एमएलडी (मिलीयन लिटर पर डे) उदक मेळटा. गरज आसा 645 एमएलडीची. 25 वर्सां उपरांत आमकां 765 एमसीयुएम (मिलीयन क्युबीक मिटर) उदक लागपाक शकता. कारण लोकसंख्या वाडटली. गांवांक शारांचें रुप येतलें. उदकाच्या मळाचेर फुडें खूब कितें जावपाचें आसा. म्हादयचें उदक कळसा, भांडुरा प्रकल्पा वरवीं वळयल्यार दुदसागर घसघसो, गोंय- कर्नाटकांतल्या अभयारण्यांचेर वायट परिणाम जातलो. मात, म्हादय न्हंयेक खंय हें व्हडलेशें माल वच्चें ना, अशें कांय बुदवंतांक दिसता. तशें जर आसा, जाल्यार म्हादय संबंदीच्या केशींचेर कोट्यांनी रुपया कित्याक मोडले? म्हादय आटल्यार कितें जातलें, तें पर्यावरणवादींक चड बरें खबर आसा. ह्या मुद्द्या कडेन फक्त वेंचणुकां पुरतें पळय नासतना जिणेंमरणाचो प्रस्न म्हूण सगल्यांनी तो आपापले परीन हाताळपाक जाय.
गोंयांतलें उदक कितलें शुद्ध आसा ताची तपासणी जावची. हांगाच्यो न्हंयो, तळीं, बांयों, बोअरवेली, दर्यादेगां वयलें, शारांतलें उदक इबाडलां. ताळगांव, मडगांवां पायपलायनींतल्यान दुशीत उदक येवपाचे प्रकार घडल्यात. न्हंयांतलीं रसायनां, सिवरेजीचे घाणीक लागून नुस्त्यांक आॅक्सिजन मेळना जाला. कांय कारखाने सांगून पसून घाणयारें उदक व्हाळ, न्हंयांनी सोडटात. हाका कोण जापसालदार? संडासांतली घाण सिवरेज पायपांतल्यान भायर सरपाक जायना. मात कांय फावटी ती सरता. हाका लागून भलायकेचो गंभीर प्रस्न निर्माण जावपाक शकता.
गोंयांतल्या गांवांनी शंबर ते देडशें इंचा वयर पावस पडटा. मागीर आमकां उदकाची बचत करपाची गरजूच कितें, अशें उच्च शिक्षण घेतिल्ले पसून सांगतात. तशें जर आसा, जाल्यार मार्च लागलो काय उदकाची टंचाय कित्याक निर्माण जाता? उदक सांबाळून वापरूंक जाय. ताचें म्हत्व पांचवे यत्ते पसून शिकोवपाक जाय. अवैध बोरवेलींचेर वेंचीक वाठारांनी कारवाय जाता. ती पुराय गोंयांत जावप गरजेचें. बांयांचें, तळयांचें पुनरुज्जीवन करचें. उदकाचे टँकर वाडल्यात. तांचेर नियंत्रण दवरुंक फावो. पावसाचें उदक गोंयच्या दोंगरांचेर जिरोवप सगल्यांत म्हत्वाचें. चडांत चड उदक जमनींत जिरतलें, हे खातीर उपाय जाय. रानांनी, आडवाटेक व्हडलीं फोंडकुलां आसात, जाल्यार तांकां तळ्याचें रुप दिवन तें उदक सांठोव येता. नवी इमारत बांदतना पार्किंगाक जागो दवरप सक्तीचें आसा. (आसा न्हय खरेंच?) तेच भशेन प्रत्येक इमारतींत पावसाचें उदक सांठोवपाची वेवस्था करपाकूच जाय. हें उदक गाडी धुंवपाक, झाडां शिंपपाक वापरूं येता. खारें उदक शुद्ध करपाचे प्रकल्प सुरू जाल्यार बरे.
दरेकल्यान सान भुरग्यांक उदकाची बचत कशी करची, हाचो आदर्श कृती वरवीं घालून दिवंचो. उदकाचें दुसरें नांव जिवन. हाचे वयल्यान ताचें म्हत्व कळटा. उदका बगर मनीसजात, सुकणीं, सावदां जगपाक शकना, हें आमी सांगपाक नाका!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
