भांगरभूंय | प्रतिनिधी
मुख्यमंत्रीः संबंदीत अधिकाऱ्यांचेर खर कारवाय करपाची शिटकावणी
भांगरभूंय । प्रतिनिधी
म्हापशें: तिळारी कानालाक खावटें पडिल्ल्यान न्हय जाल्यार उदकास्रोत खात्याच्या घाळपणाक लागून बार्देस म्हालांत उदकाची समस्या उप्रासल्या. खात्याच्या संबंदीत अधिकाऱ्यांचेर खर कारवाय करतले, अशें मुख्यमंत्री डॉ. प्रमोद सावंत हांणी सांगलें.
बुधवारा 29 जानेवारीक म्हापशेंच्या गणेशपुरींतल्या श्री गणेश विद्यामंदिराच्या शिशुवाटिका सभाघर आनी बाग तशेंच शाळेचें भोवउद्देसी सभाघर आनी शाळेच्या संकेतथळाचें लोकार्पण मुख्यमंत्री डॉ. सावंत हांचे हस्तुकीं जालें. ह्या वेळार ते उलयताले. तांचे वांगडा नगराध्यक्ष डॉ. नुतन बिचोलकार, येरादारी खात्याचे सहाय्यक संचालक मिनेश तार, शाळेचे अध्यक्ष राजेश भटकुर्से, शशंद्री डांगी, संदीप पाळणी, काशी शिरोडकार हाजीर आशिल्ले.
बार्देसांतले उदकाचे समस्ये संबंदांत पत्रकारां कडेन उलयतना मुख्यमंत्री डॉ. सावंत हांणी सांगलें, आमठाणे धरणाची गेट बुधवारा 29 जानेवारीक उक्ती केल्या. ताका लागून बार्देसाक फावोश्या प्रमाणांत उदका पुरवण जातली. उदकाचे हे समस्ये खातीर आपूण लोकां कडेन दिलगिरी उक्तायता. आमठाणे धरणाची गेट उक्ती करपाक सात दीस कळाव जाता. ह्या प्रकाराक कारणीभूत उदकास्रोत खात्याच्या जापसालदार अधिकाऱ्यांचेर खर कारवाय कररतले. कोणाकूच सोडचे ना, अशें तांणी स्पश्ट केलें.
तिळारी कानालाचे दुरुस्ती खातीर सरकारान गरजेची खबरदारी घेवन काम हातांत घेतलां. आमठाणें धरणांतल्यान अस्नोडें उदक शुद्धीकरण प्रकल्पाक उदक दिवपाची पर्यायी वेवस्था केल्ली, मात अभियंत्यांक आमठाणे धरणाची गेट उक्ती करपाक जाली ना, अशें मुख्यमंत्र्यान सांगलें.
मजगतीं, आमठाणे धरणाच्या उदकाची जोडणी पुराय तांकीन मेळिल्ल्यान अस्नोडें उदक शुद्धीकरण प्रकल्प पुराय तांकीन चालू जाला. तशेंच ह्या प्रकल्पांतल्यान म्हालाक बुधवारा सांजे सावनूच फावोशी उदका पुरवण सुरू जाल्या. ताका लागून पांच दिसां उपरांत ही उदकाची समस्या सुटावी जाल्या. एनईपीचे अंमलबजावणे खातीर सरकाराक शिक्षण संस्था आनी वेवस्थापनांची मजत अपेक्षीत आसा. हे शिक्षण प्रणालींतल्यान विद्यार्थ्यांची सर्वांगी उदरगत करप, हो मुख्य उद्देश आसा. विद्यार्थ्यांची उदरगत जाली जाल्यार देशाची उदरगत जातली. सध्या शिक्षणाचो वेव्हारीक उपेग जातना दिसना. ते खातीर राष्ट्रीय शिक्षण धोरण (एनईपी) गरजेचें आसा. हालीं पाठांतराचेर चड भर दितात ताचे परस विद्यार्थ्यांची पंचज्ञानेंद्रियां जागृत करप चड म्हत्वाचें आसता. हो आदर्श श्री गणेश विद्यामंदिरान शिशुवाटिकेच्या स्वरुपांत दवरला, अशें सांगून मुख्यमंत्र्यान शाळा वेवस्थापनाक परबीं दिली.
6 वी सावन एनईपीची अंमलबजावणी
अंदूंच्या नव्या शिक्षणीक वर्सा सावन राष्ट्रीय शिक्षण धोरणाची अंमलबजावणी करतले. यत्ता सवी सावन हें धोरण चालीक लायतले. राष्ट्रीय शिक्षण धोरणा खाला ज्या खाजगी संस्थांक आपल्यो संस्था सुरू करपाच्यो आसात, तांकां नोंदणी करपाची सुचोवणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
