उदक शुद्धीकरण प्रकल्प साळांत जायच

भांगरभूंय | प्रतिनिधी

साळ ग्रामसभेंत थाराव; चवकशी करून फाटपुरवण करपाचें सरपंचाचें उतर

भांगरभूंय । प्रतिनिधी

दिवचलः आदले मुख्यमंत्री मनोहर पर्रीकार हांणी साळ आनी पंचक्रोशींतल्या गांवांतली पियेवपाच्या उदकाची समस्या सुटावी करचे खातीर साळांत लघू उदक शुद्धीकरण प्रकल्प उबारतले, अशी हमी दिल्ली. साळांत जमीन उपलब्ध आसतनाय हो प्रकल्प मेणकुऱ्या जातलो अशें सरकारान कित्याक जाहीर केलें, असो प्रस्न साळ ग्रामसभेंत लोकांनी पंचायत मंडळाक विचारलो. हाचेर जाप दितना सरपंच सावित्री घाडी हांणी सांगलें, आपूण हे संबंदांत खोलायेन चवकशी करतली आनी हो प्रकल्प साळांत जावचो हे खातीर फाटपुरवण करतली. ह्या वेळार हाजीर आशिल्ल्या बायलांनी आनी थळाव्या लोकांनी हो प्रकल्प साळांतूच जावपाक जाय, असो थाराव घेतलो.

साळांतले व्हाळ शेणाच्या उदकांत भरल्यात. नळाक उदक येनाशिल्ल्यान त्या कपडे धुवपाक त्या व्हाळाचेर वच्चें पडटा. घाणयाऱ्या उदकाक लागून आमकां कपडेय धुवपाक मेळना. ह्या व्हाळा देगेर दूद वेवसायिकांचे गोठे आसात. गोठे धुले उपरांत तें सगळें शेणाचें उदक व्हाळांत सोडटात ताचेर उपाय काडचो, अशी मागणी बायलांनी केली. आपूण प्रत्यक्ष पळोवणी करून कारवाय करतां, अशें सरपंचान तांकां उतर दिलें.

मदलो वाडो तिठ्यार गांवांत आशिल्लो एकसुरो बशींक रावपाचो आलाशिरो मोडपाचो निर्णय ग्रामसभेंत घेतलो. ह्या आलाशिऱ्यांत रातच्या वेळार तळीराम बसतात. थंय झगडी किजिलां, वाटेर वचप्यांक गरजे भायर गाळी संवप हे प्रकार आतां सदांचेंच जालां. ताका लागून ही आलाशिरो शेड मोडपा संबंदांत देविदास मांजरेकार हांणी पंचायत कार्यालयाक अर्ज केल्लो.

प्रधानमंत्री आवास येवजण येवजणे खातीर नेम सभाघरांत सादर करचे, अशें मेघश्याम रावत हांणी मागलें. तशेंच स्वातंत्र्याच्या अमृत महोत्सवा निमतान आयिल्ले 50 लाख गरजे भायर मोडचे न्हय, अशीय सुचोवणी तांणी केली.

नाहरकत दाखले घेवनूच शेतांतले रस्ते आनी हेर बांदकामां करचीं. फाटल्या पंचायत मंडळान जे अर्दवट रस्ते सोडल्यात ते पुराय करचे, माडवेश्वर ते बाबरेश्वर ते कोळम मेरेन जी पांयवाट आसा ती पुराय करची, अशी मागणी सोमा रावत हांणी केली.

व्यायाम शाळा, नियमीत कदंबा बस सेवा, खालच्या वाड्या वयल्या राष्ट्रोळी देवस्थाना लागसारच्या सभाघराचें पांखे पुराय करप अशे साबार मुद्दे ग्रामसभेंत आयले. जात्रे आदीं हीं कामां पुराय करपाचें उतर सरपंचान दिलें.

भलायकी केंद्रांत सद्दां दोतोर उपलब्ध करचो, खालच्या वाड्या वयल्या पुलाची दुरुस्ती करची, अशी मागणी दिलीप देसाय हांणी केली.

बाबी रावत हांणी शेतांतल्या आनी नळाच्या उदका पुरवणे कडेन लक्ष ओडलें. ते उपरांत विवीध समिती वेंचल्यो.

सरपंच सावित्री घाडी हांणी येवकार दिलो. ग्रामसभेंत आदले मंत्री पांडुरंग रावत हांचे विशीं विचार मांडले. तशेंच दोन मिण्टां शांतताय पाळून तांकां आर्गां ओंपलीं.

सरपंच सावित्री घाडी हांचे अध्यक्षते खाला जाल्ले ग्रामसभेक उपसरपंच देऊ (आपा) मधुकर रावत, पंच वैष्णवी परब, विशाल परब, निता रावत, मनू शिंदे, दिव्या नायक हाजीर आशिल्ली. पंचायत सचीव पुंडलीक गवस हांणी नोटीस वाचून दाखयली. गट विकास अधिकारी कार्यालया वतीन भालचंद्र बिर्जे निरिक्षक म्हूण हाजीर राविल्ले. वैष्णवी परब हांणी उपकार मानले.

महिला पंचाच्या घरच्यां खातीर नेम

खंयचेच महिला पंचाचे गैरहाजिरेंत तिचो घरकार वा घरचो कोणूय पंचायत बसकेंत हस्तक्षेप करपाक शकना वा पंचायत बसकेक हाजीर रावपाक शकना. कागदपत्राचें हस्तांतर लेगीत करपाक शकना. कायद्यान ताचेर कारवाय करपाची तजवीज आसा, असो नेम पंच निता रावत हांणी ग्रामसभेंत वाचून दाखयलो.