भांगरभूंय | प्रतिनिधी
पावसाचे दीस सुरू जाल्यात. म्हणटकच गिमाच्या दिसांनी उदक पियेताले, तशें पियोवपाची गरज ना. पूण सामकेंच
तें सोडपाक जायना. अदीमदीं उदक पियेत रावपाक जाय. कारण उदक उणें पियेल्यार मेंदू बेगीन थकता, ही स्थिती यादीक (मेमरी) धोक्याची आसता, अशें हार्वर्ड मेडिकल स्कूलाच्या संशोधनांतल्यान दिसून आयलां. भलायकी विज्ञानांत उदकाक खूब म्हत्व आसा.
गिमाच्या दिसांनी कुडींत उदकाचो उणाव, हो एक सामान्य प्रस्न, पूण सादी दिसपी ही समस्या, दुर्लक्ष केल्यार रोखडीच गंभीर रूप घेता. खरें म्हणल्यार गिमाच्या दिसांनी कुडीक स्वताक सामान्य दवरपा खातीर चड घाम येता. ताका लागून कुडीक चड उदकाची गरज आसता. उदकाचो उणाव शारिरीक क्रियाकलापांक लागून वा कांय रोगांक लागून वा हेर शारिरीक कारणांक लागूनय आसूं येता. तान उणी आसल्यार आनी फावो तें उदक पियेवन ती पुरो जायना जाल्यार कांय लक्षणांचेर आदारून कुडी आपले संकेत दिता.
कुडींत उदकाचो उणाव आशिल्ल्यान शारिरीक श्रम केले उपरांत थाकाय येवपाक लागता. मनीस दुबळो जाता. काम चालू दवरप कठीण जाता. कारण उदकाचो उणाव जाल्ल्यान सांध्यांच्या वंगण आनी कुशनिंगाचेर ताण पडटा आनी ताका लागून सुरवेक थकवो येता. तो बेगीन येवंक लागता.
एकाग्रतायेचो उणाव
उदकाच्या उणावाक लागून ल्हान- ल्हान गजाली विसरप, एकाग्रताय उणी जावप अशो समस्या निर्माण जातात. तंत्रिका संदेशवाहक आनी हार्मोन तयार करपा खातीरय तो गरजेचो आसता. स्मृतीचेर प्रक्रिया करपाचीय उर्जा मेंदवाक उदका पासत मेळटा. उदक उणें पियेवपी लोकांक पचन तंत्राच्यो कागाळीं निर्माण जावपाची शक्यताय चड आसता. हाका लागून उपासमारी संबंदीत समस्या वाडटात. फुडें त्यो कुडीक खूब धोक्याच्यो थारतात. हाचे फाटलें कारण म्हणल्यार, व्हड आंतकड्यांनी उदकाचे सेल आसतात, ते उदक शोशून घेतात. उदक उणें पियेल्यार व्हड आंतकड्यांच्या कार्याचेर परिणाम जाता.
तकली दुखप
हाका निर्जलीकरण तकली दुखप अशेंय म्हण्टात. तातूंत थकवो येवप, तोंड सुकप, तान वाडप आनी तकली दुखपा वांगडाच घुंवळ येवप हांचो आस्पाव जाता. गिमाच्या दिसांनी ही एक सामान्य समस्या. हाचे फाटलीं कारणां म्हणल्यार, उदक उणें पियेल्यार मेंदवाचें ऊतक आकुंचन जाता. मेंदू ही उणीव कपालाच्या द्रवावरवीं भरपाय करता आनी ताका लागून तंत्रिकांचेर दाब पडटा.
कोणाक कितलें उदक गरजेचें? दरेकल्याच्यो गरजो वेगवेगळ्यो आसतात. सादारणपणान तरणाट्यान उण्यांत उणें आठ पेले उदक पियेवचें, अशें म्हण्टात, पूण हें बरोबर न्हय.
हार्वर्ड मेडिकल स्कूलाच्या मतान, दरेका मनशाची उदकाची गरज तांच्या शारिरीक स्थिती प्रमाण आनी क्रियाशीलते प्रमाण वेगवेगळी आसता. देखीक एसी ऑफिसांत बसून काम करपी मनशाक भायर सुर्याक रावपी वा हेर शारिरीक क्रियाकलाप करपी मनशा परस वेगळी गरज आसतली. सामान्य मनशाक 4 ते 6 ग्लास उदक पुरो. गिमाच्या दिसांनी उदक पियेना जाल्यार कितें जाता, तें रोखडेंच कळटा. पावसाच्या दिसांनी तें कळना. तशें आसलें तरी उदक पियेवपा कडेन आडनदर करची न्हय. पावस आसूं वा गीम थारावीक लीटर नेमान पियेवचेंच.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
