भांगरभूंय | प्रतिनिधी
देशभरांत जर विनोदांची सर्त घेत जाल्यार म्हाका दिसता गोंय हातूंत पयलें येवंकूच जाय. गोंयचे राजकारणी लोक इतले म्हणून विनोद करतात ते पळोवन आमच्या तरी पोटांत हांसून हांसून मुड्डो पडखा. आतां हेंच पळेयात, ‘हर घर जल’ उपक्रम गोंयांत जैतिवंत जालो म्हणपाचें प्रमाणपत्र गोंय राज्याक केंद्र सरकारान दिलें अशी खबर मुख्यमंत्र्यान दिली. हाचे इतलो व्हडलो विनोद दुसरो आसूं येता? दर घरांत उदक येता, कोणाकूच उदका खातीर वणवण भोंवचें पडना, अशें सपन लेगीत पडलें जाल्यार आमी स्वताक भाग्यवान समजतले. सद्याक तरी उदकाचे हाल जाल्ल्यान खूब लोकांच्या दोळ्यांत उदक येता. आनी सरकार सामकें खुशालकायेन प्रमाणपत्र घेता. म्हाका दिसता हें प्रमाणपत्र नळाचें न्ही तर लोकांच्या दोळ्यांतलें उदक पळोवन दिलां आसूंक जाय. खरें म्हणल्यार गोंय राज्य कित्यांत तरी पयलें आयलें हाचो दर एका गोंयकाराक अभिमान दिसुंकूच जाय आसलो, पूण आमकां हें आयकून हांसो येता. बरे विनोद चल्ल्यात तुमचे म्हणून.
तशे हाचे पयलींय सरकारान विनोद केल्यात. गोंय आनीकूय कांय गजालींनी मुखार आसा म्हणपाच्यो घोशणा हाचे पयलींय जाल्यात. गोंय हागणदारी मुक्त जालां म्हणपाचें केन्ना तरी सरकारान जाहीर केल्लें. गोंयांत कोणूच उगताडार संडासाक बसनात खंय. पूण, प्रत्यक्षांत चित्र वेगळेंच पळोवंक मेळटा तें सोडात. पूण केन्ना तरी गोंय हागणदारी मुक्त जालां म्हणपाची सरकारान घोशणा केल्ली हें सरकारूच विसरून वता आसूंक जाय. कारण कालूच दोन हजार लोकांचे संडासा खातीर आयिल्ले अर्ज तशेच पडल्यात म्हणपाचें खात्यान जाहीर केलां. कारण कितेंय आसूं, पूण उणीं तीं दोन हजार कुटुंबां संडासा बगर जियेतात म्हणपाचें सरकारी खातें सांगता आनी सरकार म्हणटा, गोंय हागणदारी मुक्त. कोण खरो आनी कोण फट कळप कठीण.
गोंयांत शिक्षणाचें प्रमाणूय खूब आसा, अशें म्हणटात. शिक्षणाचें म्हत्व कितले लोकांक खबर आसा तोय एक संशोधनाचो विशय जावं येता. तातूंत आतां हें हर घर जल. मुख्यमंत्री एकेवटेन सरकाराची फाट थापटिता आसतनाच आमचो बांधकाम मंत्री मात वेगळोच सूर लायता. ‘मिले सूर मेरा तुम्हारा’ जावचें सोडून हांगा सूऽर सूऽर जाल्लेवरी दिसता. मुख्यमंत्री म्हणटा, हर घर जल जाल्यार बांधकाम मंत्री म्हणटा जलाक घरघर. ही घरघर जाग्यार घालतले जाल्यार केंद्रान दुडू दिवचे, लोकांनी जागे दिवचे नासल्यार जल बीन नळ पळोवन समाधान मानचें. आतां प्रमाणपत्र हर घर जलाक मेळ्ळां काय जलाक घरघर लागल्या म्हणून दिलां, ताचेर अभ्यास करचो पडटलो काय दिसता.
सद्याक गोंयांत पावस बरो पडटा. घराघरांनी उदकाचो शिंवर पडटा. तें उदक पळोवन बी केंद्रान प्रमाणपत्र दिवंक ना मूं? कारण बांदकाम मंत्रीच जेन्ना वे्रयो सूर लावन सगळ्यांक उदक मेळना म्हणपाचें अप्रत्यक्षपणान मानून घेता तेन्ना प्रमाणपत्र कित्याक हो प्रश्न पडले बगर रावना. आतां केंद्रान सगळ्याच गजालींचेर जिएसटी लावन म्हारगाय वाडयल्या. सामान्यांक जगप कठीण करून उडयलां. हाचेर जाप विचारूंक वा विरोध करूंक विरोधी पक्षूच ना. लोकांच्या दोळ्यांतल्यान दुकांच्यो झरी व्हांवप साहजीक. अजून तरी दुकांचेर जिएसटी लागूंक ना. म्हणटकूच लोकांच्यान दुकांच व्हांवोवंक जातात. ह्याच व्हांवपी उदकाक बी प्रमाणपत्र दिवंक ना मूं? तशें प्रमाणपत्र फावता आमकां.
तशें सरकार आपणाली तोखणाय करून घेवंक फाटीं कशेंच रावना. तें अदींमदीं फाट थापटून घेताच. कांय तेंपा पयलीं सरकारान शें प्रतिशें गोंयच्या लोकांक कोविडाचीं वाशिनां दिलीं म्हणून फाट थापटून घेतिल्ली. आतां आरोग्य खातें सांगता जे कोण कोविडान मेले तांतल्या पंचावन प्रतिशें लोकांनी एकूय वासीन घेवंक नाशिल्लें. हीं सरकारी खातीं सरकाराक लजेक घालतात काय सरकार आमकां गोंयकारांक लजेक घालता देवाक खबर. खरें म्हणल्यार सरकारान मेळिल्लीं प्रमाणपत्रां परतीं करून केंद्रा कडेन चूक मागूंक जाय काय दिसता. फाट थापटून घेवच्या नादांत आमी फटींगपणां केलीं म्हणपाचें मानून घेवंक जायशें दिसना? नासल्यार ह्या खात्यांचेर आनी भौशीक बांधकाम मंत्र्याचेर तरी ते फट सांगतात म्हणून कारवाय जावंक नाका?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
