भांगरभूंय | प्रतिनिधी
मुख्यमंत्री : जमनीचो हक्क आदिवासींक दिवप हीच भगवान मुंडा हांकां आर्गां
भांगरभूंय । प्रतिनिधी
मडगांव : उदक, जमीन आनी रान हांचेर पयलो हक्क आदिवासी भावांचो. वन हक्क कायद्या खाला उरिल्लीं पांच हजार प्रकरणां फुडल्या वर्सां मेरेन निकालात काडटले. जमनीचो हक्क आदिवासी बावांक दिवप हीच खरी भगवान बिरसा मुंडा हांकां आर्गां थारतली. ते भाययर मूळ संस्कृती तिगोवचे खातीर गोंयांत मॉडेल ट्रायबल व्हिलेज तयार करपाचो विचार आसा. विकसीत भारत 2047 आनी विकसीत गोंय 2037 करचे खातीर सगल्यांचो तेंको गरजेचो आसा, अशें मुख्यमंत्री डॉ. प्रमोद सावंत हांणी सांगलें.
भगवान बिरसा मुंडा हांची जयंती जनजातीय गौरव दीस म्हूण मडगांवच्या एसजीपीडीए मैदानाचेर आयोजीत कार्यावळींत मनयली. ह्या वेळार सभापती गणेश गांवकार, बांदकाम मंत्री दिगंबर कामत, आदिवासी मंत्री रमेश तवडकार, समाज कल्याण मंत्री सुभाष फळदेसाय, आदले मंत्री बाबू कवळेंकार, आदले खासदार विनय तेंडुलकार, केंद्रीय राज्य मंत्री श्रीपाद नायक, खासदार सिद्धी शांताराम, आमदार उल्हास तुयेंकार, वासुदेव मेंग गांवकार हाजीर आशिल्ले. हे कार्यावळी आदीं गोंयांतल्या विवीध वाठारांतल्यान दुचाकी रॅली काडली.
मुख्यमंत्र्यान सांगलें, भगवान बिरसा मुंडा हांची जयंती देशभरांत मनयतात. उदक, जमीन आनी रानांचेर पयलो हक्क ह्या आदिवासी भावांचो आसा. ते खातीर ह्या हक्का खातीर तांचो लडो आशिल्लो. ब्रिटिशांच्या आड तांणी लडो दिलो. तांचें जिवनचरित्र लोकां मुखार हाडपाचो सरकाराचो हो यत्न आसा. ‘बिरसांची ज्वाला’ हें पुस्तक मंत्री तवडकार हांणी बरयलां. कला आनी संस्कृती खात्या कडल्यान ‘उलगुलान’ हो जिवनवट पड्ड्याचेर हाडला. स्वातंत्र्याच्या लड्यांत जे फुडारी झुजले तांकां लोकां मुखार हाडपाचें काम सरकार करता, अशेंय तांणी सांगलें.
सरकार अंत्योदय तत्वाचेर काम करता. आदिवासी समासजाची उदरगत जावची हे खातीर केंद्र आनी राज्य सरकाराच्यो येवजण्यो मेळोवचे खातीर काम करता. सरकारा कडल्यान अर्थसंकल्पांत 10 टक्के तजवीज ही आदिवासी समाजा खातीर करून निधी खर्च करतात. सुमार 19 येवजण्यो योग्य व्यक्ती मेरेन पावोवपाचो यत्न आसा. आदिवासी भावांक जमनीचो मालकी हक्क ह्या सरकारान दिला. 10 हजारांतलीं 5 हजार प्रकरणां निकालांत काडल्यात. वन हक्क कायद्या खाला आदिवासी समाजाक जमनीचो हक्क दिला. ते रावतात आनी कसतात ती जमनीचो मालकी हक्क दिला. उरिल्लीं 5 हजार वन हक्क कायद्याची प्रकरणां फुडल्या वर्सभरांत निकालांत काडून जमनीचो हक्क दितले. उदक आनी जमनीचो अधिकार दिवपाचो यत्न आसा. दोंगराळ वाठारांतल्या घर उदका विणें उरचें ना, हाची जतनाय घेतात, अशें मुख्यमंत्र्यान सांगलें.
आदिवासी समाजाक न्याय मेळोवन दिवपाचें काम भाजपानूच केलां. आदिवासींची संस्कृती आनी इतिहास सोदून काडपा खातीर सांग्यार ट्रायबल रिसर्च सेंटर उबारतात. फर्मागुडी वाठारांत ट्रायबल म्युझियनाची निर्मिती करतात. ते भायर गोंयांत मॉडल ट्रायबल व्हिलेज निर्मितीची संकल्पना मांडल्या. ताचे निर्मिती खातीर मंत्री तवडकार हांणी यत्न करचे. तातूंत आदिवासी समाजाची मूळ संस्कृती तिगून उरतली नी थंय येवप्यांक ती अणभवपाक मेळटली. मूळ संस्कृती सांबाळप आनी ती फुडें व्हरपाची गरज आसा, अशें मुख्यमंत्र्यान सांगलें.
मंत्री तवडकार हांणी सांगलें, प्रधानमंत्री नरेंद्र मोदी विकसीत भारत संकल्पनेचें सपन साकार करचे खातीर यत्न करतात. भगवान बिरसा मुंडा हांणी आपली जीण समाजा खातीर ओंपली. गोंयांतल्या दुख्खी समाजाचें दुख्ख पयस करचे खातीर सरकार यत्न करता. मुंडा हांणी जो विचार दिला, तो फुडें व्हरपाचो हो यत्न आसा. आदिवासी समाजाची पिडा ही मुंडा हांणी समाजा मुखार दवरून मुळाव्या अधिकारां खातीर लडो दिलो. आदर्श युवा संघाच्या माध्यमांतल्यान गांवांतले तरणाटे नशामुक्त, देशभक्तीन भरिल्ले आसचे हे नदरेन खूब वर्सा काम चल्लां. ग्रामीण वाठारांतल्या शिक्षणाक उभारी मेळची हे खातीर बलराम शिक्षण संस्था निर्माण केल्ली. तळागाळांतली व्यक्ती सक्षम जावची, समृद्ध समाजाची निर्मिती ह्या उद्देशान सरकारा कडल्यान काम चल्लां, अशें तांणी सांगलें. आदिवासी समाजाक धर्म नाशिल्ल्याची टिका कांय जाण करतात. मात आदिवासी हे हिंदू आशिल्ले, हिंदी आसात आनी हिंदूच आसतले. रानांत रुशीमुनी कडल्यान आचरण जातालें त्या वेळार तांची राखण करपाचें काम आदिवासी समाजानूच केल्लें. ते खातीर आदिवासी हे धर्मपालक, धर्मआचरक, धर्मरक्षक लेगीत आसात, अशें कर्नाटकांतले खासदार सिद्धी शांताराम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
