उदक आटपाक लागलां, पूण….

भांगरभूंय | प्रतिनिधी

उदकाची बचत आनी आडनदर जाल्ल्या राज्यांतल्या उदकास्रोतांक नवी जीण दिल्यार संभाव्य उदका टंचायेचेर जैत जोडूं येता. म्हादय, विर्डे न्हंयांचें उदक आटचें ना, हाचेरुय लक्ष दवरचें पडटलें.

माय तापलो, अशें म्हणटात. म्हणजे मे म्हयन्यांत चडूच गर्मी जावंक लागली. मात आतां ते दीस गेले. हालींसराक मार्च लागलो काय तापमानाक फुलां येवपाक लागतात. मागीर उदकाचीं थळां आटूंक लागतात. मनीस उदका बगर जगपाक शकना. न्हांवपाक, कपडे- आयदनां धुंवपाक, झाडां शिंपपाक उदक जाय….. उदकाक जीवन म्हणटात, तें ओगीच न्हय! फाटल्या कांय दिसांनी साबार गांवांनी उदकाचो उणाव जाणवपाक लागला. खंय उदका पुरवण अधिकाऱ्यांक घेराव तर खंय कळशी मोर्चा…. उदका खातीरचो हो आक्रोश पोरूं भशेनूच अंदूंय आयकूंक येता. सरकारी यंत्रणांच्या मतान, गोंयचे लोकसंख्येक जून मेरेन पावतलें इतलें उदक सगल्या धरणांनी आसा. तापमान वाड आनी भाटां, बागायती, शेतां खातीर उदक सोडिल्ल्यान अंदूं उदकाचो उणाव जाला….!!
सरकारी आंकड्या प्रमाण, तिळारी धरणांत 96 टक्के उदक आसा. आमठाणें 55, चापोली आनी गावणें 54, साळावळी 42, हणजुणें 26 तर पंचवाडी धरणांत 22 टक्के उदकाचो सांठो आसा. मिर्ग मार्गाक लागता म्हणसर जूनाची पयली पंद्रस सोंपता. म्हणजे अजून दोन म्हयने आसात. उदकाचें योग्य नियोजन जाय. लोकांनीय उदकाची शक्य तितली बचत करूंक जाय. दीसभर उदक आसलें काय थोडे लोक हाताक मेळटा तितलें उदक वापरतात, तर हेर लोकांक उदका खातीर तळमळे, वळवळे काडचे पडटात. सगल्या भौसाचो विचार करून अंदुंच न्हय, तर दरवर्साच्या मार्च, एप्रील, मे म्हयन्यांत आमकां उदक सांबाळचें पडटलें. हणजुणें धरणांतल्या उदकाची पातळी पोरुं परस 3.19 टक्के देंवल्या. हो 26 टक्के सांठो चडांत चड 55 दीस पावतलो, अशें उदका अधिकाऱ्यांचें म्हणणें. अर्थांत हें लोकसंख्येची दाटाय आनी लोक कशे उदक वापरतात, ताचेर अवलंबून आसतलें. अंदूं पावस समाधानकारक पडटलो. ताका लागून भिवपाची गरज ना, अशेंय ते सांगतात, पूण लहरी पावसाच्या भरंवशाचेर रावून उपकारचें ना. मनीस उदक तयार करपाक शकना. पूण आसा तें उदक सांबाळून वापरूं शकता. शेतां, भाटांक उदक सोडलां, ताचो फायदो पिकाच्या रुपांत दिसपाक जाय. एक म्हयनो आदींच उदक सोडलां, म्हणटकच उत्पादनांत वाड जातली, अशें धरून चलुया. 2019 वर्सा अशीच परिस्थिती उप्राशिल्ली, तेन्ना व्हडलेशें कांय जावंक ना, अशें उदका अधिकारी म्हणटात. तरीय आमकां शिटूक रावचे पडटले.
उदकाचे बरेच सांठे दुशीत जाल्यात. ताचेर सरकारी यंत्रणांनी, पंचायत- पालिकांनी काम करूंक फावो. न्हंयो, व्हाळ खोलावप, तातूंतल्यो वेली, शेळो, झिली काडप, झऱ्यांचे जागे नितळ करप, न्हंयांनी कोण रसायनां सोडचो ना, कोयर उडोवचो ना, हाचीय खबरदारी घेवची पडटली. एकूण सांगपाचें म्हणल्यार उदक दुशीत जावप, वापरपाक तें अयोग्य थारप हाका जापसालदार आमी मनीसूच. केन्ना सुदारतले आमी? सैम कसलोच भेदभाव करीनासतना आमकां दिता, पूण आमीच आमच्या हातान तें इबाडटात. सांतिनेज खारीज, साळ न्हंय हीं दोन उदाहरणां पुरो. देशांतलें उदाहरण घेवपाचें जाल्यार गंगा न्हंय!! ती शुद्ध करपाक आतां मेरेन जितलो पयसो खर्च जाला, तितल्या पयशांनी एक नवी न्हंय बांदून जावपाची! गांवांगांवांनी बांयो आसात, तळीं आसात, तांचें पुनरुज्जीवन गरजेचें. उदकाचो फेरवापर म्हत्वाचो. कांय व्हडल्या हाॅटेलांनी, कारखान्यांनी ही सुविधा आसतली. आमच्या देशांत सादारण 30 टक्के उदकाचो फेरवापर जाता. मात, सिंगापूर सारक्या शारांत 40 टक्के घाणयारें उदक शुद्ध करतात. दर दिसा 90 कोटी लिटर उदकाचो फेरवापर जाता. संडासांत वापरतात तेंय उदक पिवपाच्या उदका इतलेंच शुद्ध करतात. पूण ताचो थंय बागकामा खातीर वापर जाता. उदक शुद्धीकरणाचेर सरकारान भर दिवप गरजेचें. दर्याच्या खाऱ्या उदकाचेरुय प्रक्रिया करून तें शुद्ध करूं येता.
गोंयांतल्या उदकाची पातळी पोरूं ह्याच काळांत 50 ते 55 टक्के आशिल्ली. ती अंदूं 42 चेर पावल्या. फुडल्या दोन म्हयन्यांत ती आनीक देंवची ना, हाची जतनाय सगल्यांकूय घेवची पडटली. उदकाची बचत आनी आडनदर जाल्ल्या राज्यांतल्या उदकास्रोतांक नवी जीण दिल्यार संभाव्य उदका टंचायेचेर जैत जोडूं येता… आनी म्हादय, विर्डे न्हंयांचें उदक आटचें ना, हाचेरुय लक्ष जाय!!