भांगरभूंय | प्रतिनिधी
पणजीः राज्यांतल्या न्हंयांचें प्रदुशण आडावपा खातीर उदका स्रोत खात्याच्या सगल्या विभागांत एक उप-विभागाची थापणूक करतले. न्हंयेंत, व्हाळांत जावपी प्रदुशणाचें विश्लेशण करपाची जापसालदारकी उप-विभागाची. हे खातीर उत्तर आनी दक्षीण गोंयांत स्वतंत्र लॅब स्थापन करतले, अशें आस्वासन उदका स्रोत मंत्री सुभाष शिरोडकार हांणी दिलें.
मुखेल न्हंयांच्या प्रदुशणाचो विशय विरोधी आमदारांनी बरोच लावन धरलो. ताचेर मंत्री शिरोडकार उलयताले.
सिवेज आनी हेर प्रदुशीत द्रव्यां उदकांत सोडिल्ल्यान गोंयच्यो ११ मुखेल न्हंयो मांडवी, जुवारी, साळ धरून प्रदुशीत म्हूण नोंद जाल्यात. देशांतल्या ३२३ प्रदुशीत न्हंयां मदीं राज्यांतल्यो ११ न्हंयो येतात. तशेंच ७५ टक्के उदकाचो स्रोत प्रदुशीत जाल्ल्याचें अहवाल सांगतात. ह्यो न्हंयो आनी उदका स्रोत पुर्नजीवीत करपाक सरकारान कसले यत्न केल्यात असो प्रस्न हळदोणचे आमदार कार्लुस फेरेरा हांणी विचारलो.
साश्टीची साळ न्हंय ५० टक्के प्रदुशीत जाल्या. सरकारान हे न्हंयेचो चिखल उसपुपाक १२.९४ कोटी आनी नितळ करपा खातीर ६० कोटी मोडल्यात. मात दर्या सयत सगलीं पर्यावरण यंत्रणा प्रदुशीत जाल्या, असो आरोप विरोधी पक्ष फुडारी युरी आलेमाव हांणी केलो.
हे साळ न्हंयेंत सरळ हळशीक सोडटात. ती नुस्तीं खातात आनी तें नुस्तें मागीर आमी खातात. हाचो अर्थ गोंयकारांनी ही हळशीक खावपाची. हें न्हंये खातीर सरकाराचो सर्वसमावेक्षक आराखडो कितें आसतलो, असो प्रस्न आलेमांव हांणी केलो.
हाचेर जाप दितना मंत्री सुभाष शिरोडकार हांणी सांगलें, तांणी कालूच हे न्हंयेच्या प्रदुशणा विशींचो अहवाल मागोवन प्रदुशण आडवपा खातीर खर निर्णय घेतला.
जे व्हाळ मुखेल न्हंयांक वचून मेळटात त्या व्हाळांतल्या उदकाच्या दर्जाचो अहवाल तयार करतले. उत्तर आनी दक्षीण गोंयांत लॅब स्थापन करून उदकाची तपासणी करून हे उप-विभाग उदकाचो अहवाल सादर करतले, अशी म्हायती शिरोडकार हांणी दिली.
व्हाळांत सिवेजीचें उदक सोडपाचें काम आमी करतात. पावसा वेळार तें उदक दर्यांत वता आनी उदक नितळ उरता. मात जानेवारी ते एप्रिल मेरेन तें सांठून उरता. न्हंयो नितळ करपाचें काम ही मोहीम म्हूण हांव वैयक्तीक पांवड्यार हातांत घेतलों, असो निश्चेव शिरोडकार हांणी केलो.
तार न्हंयेंत जोडपी व्हाळांत म्हापशें बाजारांतलें चिकन, मटण पसरेकार सगली घाण उडयतात. तशेंच बाजारांत आशिल्ल्या शौचालयाची घाण सरळ तातूंत सोडटात. हे विशीं कारवाय करपाची मागणी कार्लुस फेरेरा हांणी केली. दर म्हयन्याचे निमाणे कडेन तार न्हंयेक म्हापशेचे आमदार जोसुआ डिसोजा, हळदोणचे आमदार कार्लुस फेरेरा आनी पर्वरेचे आमदार रोहन खंवटे हांची बसका घेवन स्वता हांव हे बसकेक हजर रावपाचें आस्वासन दिवन म्हापशें तार न्हंयेच्या प्रदुशणाचो विशय सुटावो करुन, न्हंयेच्या वाठाराचें सोबीतीकरण करुन, वॉक वे बांदपाचो प्रस्ताव, उदका स्रोत मंत्र्यान मांडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
