भांगरभूंय | प्रतिनिधी
कोयर नियंत्रण दुरूस्ती विधेयकाक मान्यताय
पणजी : भौशीक वा खाजगी वाठारांचेर कोयर ओडयल्यार ३ लाखां मेरेन दंड घालपाची तजवीज आशिल्लें गोंय कोयर नियंत्रण विधेयक २०२५ सोमारा रातीं सभाघरांत संमत जालें. मुख्यमंत्री डॉ. प्रमोद सावंत हांणी हें विधेयक चर्चेक घेवन तें संमत करून घेतलें.
व्हाळ, तळीं, बायों, चिरेखणी हांगा कोयर उडोवन ते दुशीत जाल्यार ५० हजार ते ३ लाखां मेरेन दंडाची तजवीज आसा. पयले खेपो कोयर उडयल्यार ५० हजार, दुसरे खेपो उडयल्यार १ लाख आनी त्यान फुडें उडयल्यार दर खेपो ३ लाख रूपयांचो दंड जातलो.
प्लास्टीक वा प्लास्टीकाच्या बाटल्यांचे विक्रेते, उत्पादक हांणी प्लास्टीक एकठांय करून ताचो सांठो करून दवरपाक जाय. हो नेम पाळ्ळो ना जाल्यार २०० ते ५ हजार रूपया मेरेन दंड घालपाची तजवीज आसा.
व्हडा प्रमाणांत प्लास्टीक वा कोयर तयार करपी कंपनी, आस्थापनांनी प्रदुशण नियंत्रण मंडळा कडेन ऑनलायन नोंदणी करप सक्तीचें आसा. नोंदणी केली ना जाल्यार २५ हजार ते १ लाख रूपया मेरेन दंडाची तजवीज आसा. कोयर उक्ताडार हुलपयल्यार ५ हजार ते ५० हजार रूपया मेरेन दंडाची तजवीज आसा. गाडयांनी भरून कोयर उडोवपाचे प्रकार व्हडा प्रमाणांत सुरू आसा. गाडयांनी कोयर उडयल्यार २५ हजार ते १ लाख रूपयां मेरेन दंडाची तजवीज आसा. तशेंच गाडयेचो परवानो निलंबीत करपाची तजवीज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
