भांगरभूंय | प्रतिनिधी
मेणकुर्यां १० एमएलडी जलशुद्धीकरण प्रकल्पाची बुन्याद
दिवचल: फाटल्या स वर्सांनी सरकारान गोंय उदकाचे बाबतींत स्वयंपूर्ण जावपा खातीर जायत्यो म्हत्वाच्यो येवजण्यो चालीक लायल्यात. जायतीं कामां सुरू आसात. हाका लागून गोंयच्या पुराय भागांक नेमान उदकाची पुरवण दिवपा खातीर सरकार सक्षम जाल्ल्यान उदका बाबतींत राज्य स्वयंपूर्ण आशिल्ल्याचें मुख्यमंत्री डॉ. प्रमोद सावंत हांणी मेणकुर्यां हांगा सांगलें. सुमार ६० कोटी रुपया खर्चाच्या धा एम एल डी जलशुद्धीकरण प्रकल्पाचे बुन्यादी फांतर बसोवपाच्या वेळार ते उलयताले.
डिजिटल पद्धतीन ह्या प्रकल्पाचो बुन्यादी फातर बसोवपाचो सुवाळो मुख्यमंत्री सावंत, आमदार डॉ. चंद्रकांत शेटये, प्रदीप रेवडकार, सुभाष बेळगांवकार, उमेश शेट्ये, कुमुदिनी नायक आनी हेर मानेस्तांचे हाजेरींत जालो.
हो प्रकल्प आधुनीक तंत्रज्ञानाचेर आधारीत सा. पांच माळयो उंच आशिल्ल्या ह्या प्रकल्पांत उदकाची गुणवत्ता आनी चाचणी करपाची प्रयोगशाळा, तशेंच डिजिटल पद्धतीन उदकाची पुरवण करपाचेर नियंत्रण दवरपाची विशेश येवजण आसा. हाका लागून गांवगिर्या वाठारांत उदकाची पुरवण सुरळीत जावपाक मदत जातली अशें मुख्यमंत्र्यान सांगलें.
लाटंबार्से पंचायत वाठारांतल्या मेणकुरें, साळ, धुमाशें ह्या गांवांतल्या सुमार साडे इकरा हजार लोकांक ह्या प्रकल्पाचो फायदो जातलो. तशेंच कांय प्रमाणांत जनावरांची आशिल्ली चिंताय पयसावतली अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
