भांगरभूंय | प्रतिनिधी
भांगरभूंय । प्रतिनिधी
पर्वरीः नेरूल वाठारांतलो पियेवपाच्या उदकाचो प्रस्न सुटावो करपा खातीर नेरूल हांगा 3 एमएलटी तांकीची अंडरग्रावंट टाकी बांदपाचें बांदकाम खात्यान थारायलां. तातूंत उदकाची साठवणूक करून लोकांक ताची पुरवण करतले अशें साळगांवचो आमदार केदार नायक हाणे सांगलें. वेरें तें नेरूल मजगतीं उदकाची नवी पायपलायन घालपाच्या कामाक सुरवात करून दिल्या उपरांत ते उलयताले.
ह्या वेळार रेईश मागुशची सरपंच सुश्मिता पेडणेकार, नेरूलचो सरपंच राजेश कळंगुटकार, जिल्हो पंचायत वांगडी संदीप बांदोडकार आनी पंच वांगडी हाजीर आशिल्ले. नवी पायपलायन घालपा खातीर 90 लाख रुपये खर्च येतलो. ती घालपा खातीर रस्ते फोडचे पडटले. दोन किलोमीटर पायपलायन घालून जाल्या उपरांत फोडल्ल्या रस्त्यांचे हॉटमिक्स डांबरीकरण करतले. पायपलायन घालून जाय मेरेन लोकांच मात्से त्रास सोसचे पडटले अशें नायकान सांगलें.
नेरूल गांव उदका पायपलायनीच्या निमण्या टोका कडेन आशिल्ल्यान उदकाचो उणाव जाता. सध्या एक दीस आड अशी उदका पुरवण जाला. ही समस्या सुटावी करपा खातीर नेरून हांका टाकी बांदतले. वेरें ते पीडीए कॉलनी मजगतीं बांदकाम खात्यान हालींच वेगळी पायपलायन घातल्या. दोनूय पायपलायनींतल्यान उदक सोडटगीर रेईश मागुश आनी नेरूलच्या लोकांचो उदकाचो प्रश्न सुटावो जातलो अशें नायकान सांगलें. संदीप बांदोडकार आनी राजेश कळंगुटकाराचे ह्या वेळार भाशण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
