भांगरभूंय | प्रतिनिधी
पणजी ः उदका पुरवण करपा खातीर डिपार्टमेंट ऑफ ड्रींकींग वॉटर (डीडीडब्लू) अशें वेगळे खाते तयार करपाक मंत्रीमंडळान मान्यताय दिल्या. मलनिस्सारण (सीवरेज) पायप लायन तशेंच संबंदीत कामांची जापसालदारकी मलनिस्सारण (सीवरेज) म्हामंडळाकडेन दितले. येवपी अर्थसंकल्पांत भौशीक बांदकाम खाते आनी उदका पुरवण खात्या खातीर स्वतंत्र अर्थीक तरतूद आसतली अशें मुख्यमंत्री डॉ. प्रमोद सावंत हांणी सांगलें.
नव्या उदका पुरवण खात्याचो उदका स्रोत खात्या कडेन समन्वय आसतलो. भौशीक बांदकाम खात्या कडेन आतां फकत रस्तो आनी इमारती विभाग आसतले. उदका स्रोत खातें वेगळें उरतलें. उदका पुरवण खात्याक स्वतंत्र मुखेल अभियंतो, हेर अभियंते आनी कर्मचारी आसतले. भौशीक बांदकाम खात्यांतल्या अभियंत्यांक उदका पुरवण खात्यांत वचपाची इत्सा आसल्यार तांकां तांच्या मर्जी प्रमाण वचपाक मेळटलें.
फुडल्या 25 वर्सांचो विचार करून पिवपाच्या उदकाची वेवस्था करतले. हाचे खातीर फावो तें नियोजन करप गरजेचें. भौशीक बांदकाम खात्याचेर आशिल्लो ताण उणो करुन फुडल्या 25 वर्सां खातीर येवजण करपा खातीर स्वतंत्र खाते तयार केलां. धरणांची देखरेख, बांदकाम तशेंच प्रकल्पांत उदकाची पुरवण करपाची जापसालदारकी पयलीं भशेन उदका स्रोत खात्या कडेन उरतली अशें मुख्यमंत्र्यांनी सांगलें.
मजगतीं, गोंय वैजकी म्हाविद्यालयांतल्या पेडिएट्रिक विभागांतल्या व्याख्यात्यांचीं 3 पदां कंत्राटी पद्दतीन भरपाक मान्यताय दिल्या.
नोकरी दिवपाचें हांयस दाखोवन फटवणूक
परदेशांत नोकरी दिवपाचें हांयस दाखोवन गोंयच्या तरणाट्यांची जावपी फटवणूक ही हुसक्याची गजाल. तरणाट्यांनी पयशे दिवचे पयलीं वा नोकरे खातीर नोंदणी करचे पयलीं सादूर रावचें. एजन्सी वा एजंट बनावट ना न्हय हाची खात्री करची असो उलो डॉ. सावंत हांणी केलां. परदेशांत फटोवपी तरणाट्यांच्या कागाळींचो एनआरआय आयुक्त कार्यालय फाटपुरवण करता. फटवणूक जाल्ल्या दरेका तरणाट्याचे कागाळीचो नियाळ सुरू आसा अशी म्हायती डॉ. सावंत हांणी दिली. गोंय हें ल्हान राज्य आसलें तरी एका वर्सांत सायबर भानगडींत शंबर कोटी रुपया लुकसाण जालां. हें व्हड अर्थीक लुकसाण अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
