भांगरभूंय | प्रतिनिधी
खासदार विरीयातो फर्नांडीस हांची मागणी
पणजीः धरणांचें वेवस्थापन चुकीचें आशिल्ल्यान आनी राज्यांतल्या व्हडल्या- व्हडल्या बांदकाम प्रकल्पांक लागून गोंयकारांक चार वरां उदक मेळप कुस्तार जालां. राज्यांत उदकाची पुरवण सुरळीत करपाक मास्टर प्लॅन तयार करचो, अशी मागणी करपी निवेदन खासदार कॅ. विरायतो फर्नांडीस हांणी बांदकाम खात्याच्या मुखेल अभियंत्यांक भेटयलां.
कॅ. फर्नांडीस हांणी गोंयच्या उदका समस्ये विशीं कागाळ मांडपा खातीर कॉंग्रेशीच्या फुडार्या वांगडा आल्तिना वयले बांदकाम खात्याचे कचेरेंत मुखेल अभियंते उत्तम पार्सेकार हांची भेट घेतली.
फावो तितलें उदक आसा, भिवपाची गरज ना अशीं विधानां दोन- दोन दिसांनी मुख्यमंत्री करीत आसा. जर उदक आसा जाल्यार ताची पुरवण कित्याक जायना, असो प्रस्न फर्नांडीस हांणी उपरांत केलो. दर मतदारसंघांत आमी भोवल्यात आनी थंय कांय कडेन उदक सोडटात जाल्यार कांय सुवातींनी नळ सुकल्यात. एका वाठारांत दोन दीस उदक सोडचें आनी उपरांत फुडले दोन दीस दुसर्या वाठारांक उदक दिवचें. पावस ये मेरेन आमकां उदकाचें वेवस्थापन करपाक जाय अशे निर्देश खात्याक आयल्यात. ही परिस्थिती सद्या गोंयांत निर्माण जाल्या, असो आरोप फर्नांडीस हांणी केलो.
पयलीं २४ वरां उदकाची पुरवण जातली म्हणपी मुख्यमंत्र्यान कांय दीस पयलीं २४ मदलो २ काडून उडयलो आनी ४ वरां उदक दिवपाचें सांगलें. सरकाराक दुरदृश्टी ना, मास्टर प्लॅन ना. तशेंच धरण आनी जलाशयांचेर सराकारचें लक्ष ना, हीं कारणां ही परिस्थिती जावपा फाटल्यान आसा. पावस खंयच उणो जावंक ना. कितली वर्सांच जालीं, पावस पडपाची साडे चार म्हयन्यांची सरासरी तितलीच उरल्या. खंयतरी सरकार ही समस्या सोडोवपाक उणें पडलां, असो आरोप फर्नांडीस हांणी केलो.
बंगल्यांनी स्विमींग पूल
राज्यांत जमनींचो उणाव आसून लेगीत जमीन विकून थंयसर बांदकाम प्रकल्प येवपाक लागल्यात. तातूंत चार-पांच हजार फ्लॅट, लक्झरी बंगले काडून दर बंगल्याक स्विमींग पूल दितात. सरकार हांचे कडल्यान पयशे घेवन निज गोंयकारांचो उदकाचो हक्क चोरून गिरेस्तांक दिता आनी दोन दिसांनी उदक सोडून पायप फुटल्या वा गळटी लागल्या असल्यो उदका चोरयेच्यो काणयो सांगतात, असो थोमणो फर्नांडीस हांणी मारलो.
फकत उदकाचो उणाव जाता तेन्ना वाट पळोवचे परस आतां सावन सरकारान उदका पुरवणे विशीं आपल्या धोरणाचेर लक्ष दवरचें. उदकाची गरज भागोवपा खातीर हे विशीं मास्टर प्लॅन तयार करचो. जर हे करपाक सरकाराक जमना जाल्यार आमी हो तयार करून दिवपाक तयार आसात. जो मेरेन उदक मेळना तो मेरेन आमी सरकाराचेर चेंपण घालप चालूच दवरतले, अशी शिटकावणी फर्नांडीस हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
