भांगरभूंय | प्रतिनिधी
म्हापश्यां मिलाग्रीस चर्ची कडेन प्रकार
भांगरभूंय । प्रतिनिधी
म्हापशें: राजवाडो म्हापश्यां भुंयगत वीज केबल घातिल्ल्या रस्त्याचेर उटंगराच्या पावसाच्या उदकान स्वताची वाट तयार केल्या. हाका लागून थंय नवें गटार तयार जालां. ह्या रस्त्याची योग्य तरेन ताकतिकेन दुरुस्ती करची, अशी सुचोवणी नगरसेवक प्रकाश भिवशेट हांणी पालिकेच्या अभियंता विभागाक केल्या.
बुधवारा सांजे वेळार थळावे नगरसेवक प्रकाश भिवशेट हांचे विनवणे वयल्यान नगराध्यक्ष प्रिया मिशाळ हांणी पालिका अभियंते प्रशांत नार्वेंकार हांचे सयत ह्या रस्त्याची पळोवणी केली. ह्या वेळार कनिश्ठ अभियंता संगीता सातार्डेंकार आनी पालिका कर्मचारी तशेंच थळावे लोक हाजीर आशिल्ले.
फाटल्या दोन दिसां सावन पडपी दडकाच्या पावसाक लागून राजवाड्या वयल्या मिलाग्रीस चर्चीचे फाटले वटेंनचो रस्तो व्हांवून गेला. हो रस्तो भुंयगत वीज केबल घालपा खातीर खणिल्लो. केबल घातले उपरांत तो दुरुस्त लेगीत केल्लो, पूण पावसाच्या उदकान तो व्हावून गेला आनी थंय नवें गटार तयार जालां. फेअराआल्त दोंगुल्ले वयल्यान येवपी पावसाच्या उदकाच्या लोटान चर तयार केला. ह्या रस्त्याचे कुशीक गटार आसा, पूण उदक तातूंतल्यान वचूंक नाशिल्ल्यान हो चर पडला. ह्या रस्त्या वयल्यान व्हड प्रमाणांत येरादारी चालू आसता. हो रस्तो आनीक व्हावून वच्चे आदीं वा अकादो अपघात जावचे आदीं रस्त्याची योग्य पद्दतीन दुरुस्ती करची, अशी सुचोवणी आपणे नगराध्यक्ष आनी पालिका अभियंत्यांक पळोवणे वेळार केल्या, अशें नगरसेवक भिवशेट हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
