भांगरभूंय | प्रतिनिधी
देशांतल्या जायत्या शारांक प्रदुशणान वेटाळो घाला. प्रदुशणाक लागून दिल्ली सारक्या शारांत कितें जालें तें आमी पयलींच पळयलां. मुंबय हें देशांतलें दुसरें प्रदुशीत शार. हांगाचें हवा प्रदुशण उंचेले पातळेर पावलां. उद्देगीकीकरणाक लागून आनी वाडत वचपी प्रदुशणाक लागून हवेंत विखारी वायू भरसूक लागल्यात. रोगांक आमंत्रण मेळत आसा. सैमान मनशाक भरपूर दिलें. हवा आनी उदक हें सैमा कडल्यान मनशाक मेळिल्लें दान. पूण ह्या दानाक मान दिवचे बदला मनीस तातूंत हस्तक्षेप करपाक लागलो, देखूनच प्रदुशणा सारकी भिरांकूळ समस्या आयज निर्माण जाल्या.
आयज उदका प्रदुशणूय वायु प्रदुशणा इतलोच गंभीर प्रस्न जाला. संवसारांतलीं चडशीं मरणां दूशित उदकाक लागून जातात. संवसारभर 1.8 अब्ज लोक दुशित उदक पितात. संवसारीक भलायकी संघटनेच्या आंकड्यां प्रमाण, भारतांत 9 कोटी परस चड लोक दुषित उदक पियेवन दुयेंत पडटात. गांवगिऱ्या वाठारांतले सत्तर टक्के लोक दुषित उदक पितात. ह्या इबाडिल्ल्या उदकांत फ्लोराइड चड आसता. ताका लागून मणक्याचीं दुयेंसां जातात. हाडां भुसभुशीत जातात. दांत हळडुवे जातात. हागवण, टायफॉयड, कामिण सारकिल्लीं दुयेंसां निर्माण जातात.
उदक प्रदुशणाचो धोको फकत मनशां पुरतो मर्यादीत ना. प्रदुशणाक लागून उदकांतल्या जिवांकय धोको आसा. ह्या उदकांत ऑक्सिजनाचें प्रमाण उणें आसता. देखून उदकांतल्या जिवांकय धोको निर्माण जाला. अशें आसून लेगीत उदकाचें प्रदुशण उणें करपा विशीं आमी गंभीर नात. कारण सगळ्यो न्हंयो प्रदुशणान इबाडल्यात. केंद्रीय प्रदुशण नियंत्रण मंडळान ताज्या अहवालांत देशांतल्या 289 न्हंयो 311 जाग्यांचेर प्रदुशीत जाल्यात, अशें सांगलां. हालींच संसदेंत हो अहवाल मांडला. ह्या अहवाला प्रमाण देशांतल्यो सगळ्यो मुखेल न्हंयो आनी तांच्यो उपन्हंयो प्रदुशीत जाल्यात आनी तांचें उदक आतां पिवपाक योग्य ना. नमामी गंगा येवजण आनी न्हंय संवर्धन येवजणेक लागून न्हंयांचें प्रदुशण आळाबंदा हाडपाक आदार जाला, असो सरकाराचो दावो आसा. हो अहवाल मात सरकाराच्या ह्या विधानाचें खंडन करता. हाचो अर्थ सरकार सांगता तशी परिस्थिती ना.
मध्य प्रदेशांतल्यान उगम पावपी तुमसर ते आश्टी मेरेनचो वाईंगंगा न्हंयेचो 707 किमी वाठार सामको प्रदुशित आसा. नागपूर जिल्ह्यांतल्यान व्हांवपी न्हंयांचोय तातूंत आस्पाव जाता. भीमा, कृष्ण, गोदावरी ह्यो म्हत्वाच्यो न्हंयोय प्रदुशीत जाल्यात. वारीच्या निमतान महाराष्ट्रांतले आनी हेर कडले लाखांनी वारकरी पंढरपूराक येवन चंद्रभागेंत न्हातात; पूण आतां चंद्रभाग न्हंयचें उदक फकत तीर्थ म्हूण धोक्याचेच न्हय तर न्हावपाकय धोक्याचे आसा हें उजवाडाक आयलां. चंद्रभाग न्हंयेच्या उदकांत घाण, कोयर, किडे आसतात.
प्रदुशणाक लागून देशांतल्या न्हंयांचें उदक पिवपाक योग्य ना. कोयर, घाणयारें उदक, कारखान्यांतल्यान रसायनां भरसून जाल्लें दुशित उदक जिवाक सामकें वायट. न्हंयांचें हें प्रदुशण आडावपा खातीर केंद्रीय पर्यावरण मंत्रालयान ठोस पावलां उबारचीं. कारखान्यांतल्यान दूषित उदक न्हंयांनी सोडपी कारखान्यांचे परवाने रद्द करचे. लोकांनी घाणयारें उदक, कोयर न्हंयांनी उडोवचो न्हय. उदका प्रदुशण आडावपाची जापसालदारकी जितली सरकाराची तितलीच लोकांची. ‘जल है तो कल है…’ म्हणटात. मागीर फुडले पिळगेची आनी जिणेची राखण करपाक जाय जाल्यार उदका प्रदुशण आडावंकूच जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
