भांगरभूंय | प्रतिनिधी
वाळपय : सत्तरी म्हालांतल्या वांतो नवचेतना सेल्फ हेल्प ग्रूप सत्तरी गोंय आनी अनुसुचीत जनजाती संचालनालय पणजी हांच्या जोडपालवान उत्सव रानभाजी विशयाचेर सर्त आयोजीत केल्ली. हे सर्तींत रानभाजये पसून एकादो खाद्य पदार्थ करून हाडपाक जाय आशिल्लो.
ही सर्त आयतारा वांते नवचेतना वाचपघरांत जाली. सभाघरांत भिरोंडें, पिसुर्ले आनी गुळेली पंचायत वाठारा पुरती मर्यादीत ही सर्त बायलां खातीर उक्ती आशिल्ली. हे सर्तीक बरी प्रतिसाद मेळ्ळो. हे सर्तींत 22 बायलांनी वांटो घेतिल्लो.
हे इनामां वांटप कार्यावळीक सुरेश बायेकार, दया तेंडुलकार, पर्यावरण मोगी सूर्यकांत गांवकार, नितीन शिवडेकार, लता गांवकार, बिंदिया गावडे हाजीर आशिल्ली.
गांवगिऱ्या वाठाराक सैमान भरभरून दिलां. ताचो बरो वापर आपले भलायके खातीर कसो करपाक मेळटा, हें रानभाजी सर्तींत दिसलें. ती रांदपाची पद्दत एकामेकाक सांगल्यार पालक आपल्या भुरग्यांक लेगीत रानभाजयो रांदून दिवपाक शकतात. त्यो भलायके खातीर फायद्याच्यो आसात. तशेंच गांवच्या बायलांनी संघटीत रावून वावर करचो. दुसऱ्याच्या सुखदुख्खांत वांटेकार जावचे. आमची संस्कृती हीच आमची खरी वळख आसा, अशें मत दया तेंडुलकार हांणी कार्यावळींत उलयतना सांगलें. हे सर्तींत पयलें इनाम प्रतिमा शिवडेकार, दुसरें इनाम चरित्रा गावडे, तिसरें इनाम उषा पिळयेकार, चवथें इनाम सुजता गावडे, पांचवें इनाम रुक्मिणी नायक हांकां फावो जालें. वांटो घेतिल्या सगल्या स्पर्धकांक प्रमाणपत्र आनी भेटवस्तू दिली. सर्तीचें परिक्षण सूर्यकांत गांवकार आनी दया तेंडुलकार हांणी केलें. प्रतिमा शिवडेकार हांणी सुत्रसंचालन केलें आनी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
