भांगरभूंय | प्रतिनिधी
मुख्यमंत्री : पडोश्यांच्या नयेंकार कुटुंबाक दिली भुजवण
दिवचल: शिरगांवां जी घडणूक घडली ती सामकी दुर्दैवी आशिल्ली. जात्रेक प्रशासन तशेंच भावीक, भक्त धोंड ह्या सगल्यांनी योग्य तरेन लक्ष दिवप गरजेचें. हाचे फुडें ते विशीं सरकार विशेश जतनाय घेवपाचे नदरेन म्हत्वाचीं पावलां उबारतले, अशें मुख्यमंत्री डॉ. प्रमोद सावंत हांणी सांगलें. शिरगांवां जाल्ले खेटाखेटींत मरण आयिल्ले सुर्या नयेंकार हांच्या कुटुंबीयांक मुख्यमंत्री येवन मेळ्ळे. ह्या वेळार तांणी सगले तरेची मजत करतलों, अशी हमी दिली. सरकारान जी 10 लाखांची मजत जाहीर केल्या, ती बारा दिसां उपरांत तांकां दितले अशेंय तांणी सांगलें.
जात्रेक धोंड आनी भाविकांनी योग्य तरेन जतनाय घेवप गरजेचें. हे नदरेन प्रशासनूय आतां चड सक्षमपणान लक्ष दिवन, तशेंच म्हत्वाचे निर्णय घेतना, असल्यो घडणुको केन्नाच घडच्यो न्हय हाची जतनाय घेतलें, अशें मुख्यमंत्र्यान सांगलें.
मयेंकार कुटुंबाक मेळ्ळे उपरांत मुख्यमंत्री भावूक जाले. जी घडणूक घडली ते विशीं तांकांय बरोच धपको बसलो. तीन दीस सगळ्यो सरकारी कार्यावळी रद्द केल्यात.
जांकां मरण आयलें तांच्या आत्म्यांक सद्गती मेळूं अशें तांणी मागलें. ही घडणूक कित्याक लागून घडली हाचीं कारणां सोदपा खातीर मुख्यमंत्र्यांनी एक विशेश समिती नियुक्त केल्या. ती समिती तपास करता. हे समितीचो अहवाल सोमारा मेळटलो, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
