उत्पादन सुविधा उबारपाक गोंया कडेन पळयात

भांगरभूंय | प्रतिनिधी

मॉवीन गुदिन्होः गोंयच्या उद्देग मळा वयलो आराखडो गुजरातांतल्या ग्लोबल ळिखर परिशदेंत सादर

भांगरभूंय । प्रतिनिधी

पणजीः उत्पादन सुविधा उबारचे खातीर गोंया कडेन एक मुखेल थळ म्हूण पळयात, असो उलो उद्देगमंत्री मॉवीन गुदिन्हो हांणी व्हायब्रंट गुजरात समिटांत गुंतवणूकदारांक मारलो. गुजरातांत आयोजीत केल्ल्या व्हायब्रंट ग्लोबल समीट 2024 त गोंय उद्देग विकास म्हामंडळान वांटो घेतिल्लो.

उद्देग संघटणां असोचेमच्या पालवान थंय आयोजीत उद्देगीक वाड, संद, आकांक्षा ह्या विशया वयल्या परिसंवादांत उद्देगमंत्री गुदिन्हो हांणी हाजीर रावून गोंयांत उद्देगा खातीर आशिल्ल्या विवीध सवलतींची म्हायती दिली. तशेंच पर्यावरणपूरक प्रदुशणमुक्त उद्देगांनी गोंयांत येवचें, अशें तांणी मागलें.

ह्या वेळार माचयेर असोचेम, गोवा विकास परिशदेचे अध्यक्ष मागिरीष पै रायकार, गुजरात चेंबर ऑफ कॉमर्स अ‍ॅण्ड इंडस्ट्रीचे अध्यक्ष पथीक एस पटवारी आनी गोंय मुख्यमंत्र्यांचे सहसचीव तुषारकुमार जोशी हाजीर आशिल्ले.

गोंयांत उद्देगीक सुविधा उबारचे खातीर प्रक्रिया सोंपी करचे खातीर राज्य सरकारान उखलिल्लीं पावलां आनी गोंयांत सुविधा उबारपाचे फायदे, गुदिन्हो हांणी सांगलें. 29 जानेवारीक दोनापावला जावपी इन्व्हेंट गोंय समीट 2024 विशींय तांणी म्हायती दिली. शिखर परिशदेक हाजीर रावून गोंयांत कामकाज सुरू करपाचो विचार करपाक तांणी गुंतवणूकदारांक सांगलें.

ह्या वेळार गुंतवणीक उर्बा मंडळाची सीईओ स्वेतिका सचन, उद्देग संचालनालय संचालक एग्ना ल्किटस हांणीय वांटो घेतलो. उद्देग भागधारकांक गोंयाक उद्देगाखातीर योग्य सुवात करप, ह्या विशयाचेर सचन हांणी पीपीटी सादरीकरणान हाजीर आशिल्ल्यां कडेन विचार मांडले. तशेंच गोंयांतले गुंतवणूक संदीक उर्बा दिवचे खातीर विवीध उर्बा येवजण आनी अनुदान येवजण्यांचें प्रदर्शन केलें.

स्वितिका सचन आनी उद्देग संचालक एग्ना क्लिटस हांणी उद्देग प्रशासना खातीर डिजिटल भौशीक वस्तूंची उदरगत, 2023 त गोवा- आयडीसीच्या नव्या नेमांची अधुसुचोवणी हाचे सयत वेवसाय सहज करचे खातीर गोंयान चालीक लायिल्ल्या विवीध उपाय येवजण्यां विशीं सांगलें.