भांगरभूंय | प्रतिनिधी
नवी दिल्ली, खबरां संस्था ः ‘उत्तर प्रदेश मदरसा शिक्षण मंडळ कायदो, २००४’ रद्द थारावपाच्या इलाहाबाद उच्च न्यायालयाच्या आदेशाक सर्वोच्च न्यायालयान अंतरिम स्थगिती दिल्या. ताका लागून उत्तर प्रदेशांतल्या १७ लाख मदरसा विद्यार्थ्यांक थाकाय मेळ्ळ्या. मुखेल न्यायाधीश धनंजय चंद्रचूड हांच्या फुडारपणा खाला तीन वांगडी खंडपीठान केंद्र सरकार, उत्तर प्रदेश सरकार आनी हेरांक नोटीस धाडल्या.
मदरसा कायद्यांत धर्मीक सुचोवण्यांची तरतूद ना, उच्च न्यायालयान कायद्याच्या तरतुदींचो चुकीचो अर्थ लायला अशें सरन्यायाधीश चंद्रचूड, न्यायाधीश जे बी पारडीवाला आनी न्यायाधीश मनोज मिश्रा हांच्या खंडपिठान स्पश्ट केलें. मदरसा शिक्षण मंडळाचो उद्देश आनी हेतू नियामक स्वरुपाचो आसा आनी मंडळ स्थापन केल्यार धर्मनिरपेक्षतायेचें उल्लंघन जातलें हें इलाहाबाद उच्च न्यायालयाचें मत स्पश्टपणान चुकीचें आसा अशें न्यायालयान फुडें सांगलें.
मदरसांत शिकपी विद्यार्थ्यांक दर्जेदार शिक्षण मेळचें असो हुस्को आसल्यार मदरसा कायदो रद्द करप हो ताचेर उपाय न्हय, पूण विद्यार्थ्यांक दर्जेदार शिक्षण मेळचें हे खातीर योग्य निर्देश जारी करप हो उपाय आशिल्लो अशें सर्वोच्च न्यायालयान सांगलें.
उच्च न्यायालयान 22 मार्चाक हो कायदो असंवैधानिक आनी धर्मनिरपेक्षतायेच्या तत्वाचें उल्लंघन करपी अशें म्हणून काडून उडयल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
