भांगरभूंय | प्रतिनिधी
करहळ, खबरां संस्था: महाराष्ट्र आनी झारखंड राज्यांत विधानसभा वेंचणूक जातना आयज उत्तर प्रदेशांत विधानसभे खातीर पोट वेंचणूक जाता. महाराष्ट्रांत एके कडेन मतदाना मजगतीं बोवाळ निर्माण जालो. जायत्या सुवातांवेल्या उमेदवारांचेर हल्ले जाले. जाल्यार कांय सुवातांचेर पयशे वाटपाच्यो घडणुको घडिल्ल्यान ताण निर्माण जालो.
उत्तर प्रदेशाच्या करहळांतूय अशीच एक घडणूक घडली. एके दलीत तरणाटेची कपड्यां विणें कूड एके बॅगेंत सांपडली. हे घडणुकेक लागून मैनपूरी जिल्ह्यांतले करहळ विधानसभा मतदारसंघांत बरोच बोवाळ निर्माण जालो. मरण आयिल्ले तरणाटेचे आवयन हे घडणुके उपरांत समाजवादी पक्षाचेर आरोप केलो. प्रशांत यादव हांणी आपले धुवेक राजकी दुस्मानकायेंतल्यान खून केल्ल्याचो आरोप केला.
मरण आयिल्ले तरणाटेचे आवयन म्हणलें, आपले धुवेचो खून करचे पयलीं तिचेर बलात्कार केल्लो. आपले धुवेन भाजपाक मतदान करपाचो निर्णय उलोवन दाखयिल्ल्यान प्रशांत रागार आशिल्लो. जर तिणें समाजवादी पक्षाक मतदान करूंक ना जाल्यार परिणामांक मुखार वच्चें पडटलें, अशी धमकी तिका दिल्ली.
तरणाटेच्या कुटुंबियांनी दिल्ले म्हायती प्रमाण, १९ नोव्हेंबराक तिका मारून उडोवपाची धमकी दिल्ली. दोगां प्रत्यक्षदर्शींनीनी सांगलें, १९ नोव्हेंबराक दुचाकी वेल्यान आयिल्ल्या दोगां तरणाट्यांनी तिका बळयां दुचाकीचेर बसोवन पळोवन व्हेली. उपरांत तिची कूड सांपडली. पुलिसांक हे विशीं म्हायती मेळटांच तांणी घडणुके सुवातेर वचून तपासणी केली.
ते तरणाटेच्या बापायन दोगां जाणां आड गुन्यांव नोंद केला. एकल्याचें नांव प्रशांत यादव आनी दुसर्याचें नांव मोहन कथेरिया. त्या दोगांकूय अटक केल्या. तांची चवकशी सद्या पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
