भांगरभूंय | प्रतिनिधी
लखनौ, खबरां संस्था: दादलो टेलरांनी (दरजी) बायलांचें माप घेवचें न्हय, बायलेचे केंस कापचे न्हय वा जिमांत प्रशिक्षण दिवचें न्हय असो प्रस्ताव उत्तर प्रदेश राज्य बायलां आयोगान मांडला. बायलांक राखण दिवपा खातीर आनी ‘अशोभनीय स्पर्श’ आनी दुर्भावना आडावपा खातीर आयोगान हे संबंदी प्रस्ताव मांडल्यात. फाटल्या म्हयन्यांत २८ ऑक्टोबराक हे संबंदी बसका जाल्ली. हे बसके उपरांत जिम, कपड्यांच्या दुकानांनी आनी कोचिंग सेंटरांनी सीसीटीव्ही लावपाचो आनी शाळेच्या बशींत सुरक्षा खातीर बायलांक नेमपाचोय प्रस्ताव मांडलो. ह्या मार्गदर्शक तत्वां संबंदी आयोगान सगल्या जिल्लो दंडाधिकार्यांक पत्रां धाडल्यांत.
उत्तर प्रदेश बायलां आयोग अध्यक्ष बबीता चौहान हांणी, शिंपी दादलो आसल्यार हरकत ना, पूण माप बायलेन घेवचें. बायलांच्या जिम आनी योग केंद्रांनी प्रशिक्षक म्हणून बायलूच आसपाक जाय. अशा संस्थांनी सीसीटीव्ही आनी डीव्हीआर चालू दवरपाक जाय. बायलांचे कपडे विकपी दुकानांनी फकत बायलांच आसूंक जाय अशें म्हणलें.
प्रस्ताव
-कपड्यांच्या दुकानांनी बायलां कर्मचारीच आसपाक जाय.
-जिम, योग केंद्रांत बायल प्रशिक्षक.
-शाळेच्या बशींत बायलांची नेमणूक.
समाजवादी पक्षाची आमदार रागिनी सोनकार हांणी सांगलें, खंयच्या टेलरा कडेन कपडे शिंवचे वा खंयच्या जिमांत वच्चें, हो निर्णय ते- ते व्यक्तीचेर सोडचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
